Search This Blog

20/07/2014

ઍનકાઉન્ટર : 20-07-2014

* તમારા મતે, દાંપત્યજીવન દરમ્યાન કેટલા સંતાનો હોવા જોઇએ?
- દાંપત્યજીવન દરમ્યાન તો.... બસ, બે જ!
(તુષાર જેઠવા, સાવરકુંડલા)

* મ.મો. ગયા ને ન.મો. આવ્યા... શું લાગે છે, હવે 'અચ્છે દિન આયેંગે?'
- એની ''અમો''ને ખબર નથી.
(મહેંક જોશી, જૂનાગઢ)

* મારે તમારી કાર ફૅમિલી સાથે ખરીદવી છે. કેટલામાં પડશે?
- હમ અમીર જરૂર હૈ.... બિકાઉ નહિ!
(ધારા જોશી, અમદાવાદ)

* વરસાદ ક્યારે આવશે?
- વરસાદ અને ધૂળજીનું કાંઇ નક્કી નહિ.
(ઉમેશ નાવડિયા, જલિલા-જી. અમદાવાદ)

* શું અમે 'વૉટ્સઍપ'માં સવાલ પૂછી શકીએ?
- 'વૉટ્સઍપ' એસ.ટી.ના કોઇ બસ સ્ટેન્ડની પૂછપરછની બારીનું નામ છે?
(રાજેન્દ્ર આચાર્ય, સુરેન્દ્રનગર)

* અમે સવાલ પૂછવા તમારા ઘરે આવીએ, તો તમે જવાબ દેવા અમારા ઘરે આવશો?
- અમે લૅડીઝ દરજીકામ નથી કરતા... કે માપ ઘરે આપી જાઓ ને માલ ઘરે આપવા આવીએ.
(રેખા ગઢીયા, રાજકોટ)

* વડનગર, વડોદરા, વારાણસી અને વડાપ્રધાન... હવે?
- વિચારવાનું.
(વિજયાબેન જોશી, અમદાવાદ)

* બરાક ઓબામા આજકાલ શું વિચારતા હશે?
- તમે તો બરાક ઓબામાને અમેરિકાના પ્રેસિડેન્ટ માની બેઠા છો!
(સંજય ગઢવી, પૂનાગામ)

* 'પરિવર્તન સંસારનો નિયમ છે'. તમારામાં આવેલા પરિવર્તન બદલ અભિનંદન.
- યુ મીન... મારાથી એવી કઇ ભૂલ થઇ ગઇ?
(રેણુ દેવનાણી, અમદાવાદ)

* હવે કૉંગ્રેસ અને 'આપ'નું શું થશે?
- અમદાવાદમાં ચાની એક લારીવાળાએ આ બન્ને નામો ''અડધી ચા''ના રાખ્યા છે... ''અલ્યા, બે અડધી કૉંગ્રેસ લાવજે ને..!''
(જીજ્ઞોશ રામાવત, ભાવનગર)

* હૂમાયુ અકબર કે બાપ કા ક્યા થા?
- તમારા હાથમાં 'ઝગમગ' પૂર્તિ આવી ગઇ લાગે છે!
(સ્મિત આચાર્ય, અમદાવાદ)

* તમારા ઘરે આવીને સવાલ પૂછવાની પ્રથા ક્યારે શરૂ કરશો?
- બસ, સવાલદીઠ કેટલા લેવા, એ નક્કી કરી લઇએ ત્યારે.
(હરેશ વોરા, જેતપુર)

* તમારો અને મારો આધાર કોણ?
- જયેશભાઇનો વાંક શું હતો?
(ભાવના જયેશ, ભાવનગર)

* ડર કોનો વધારે લાગે? તમારા પત્નીથી કે સાસુથી?
- જો ડર ગયા... સમજો મર ગયા...! હું તો મરી ગયેલો છું.
(અજય કોટડીયા, ગોંડલ)

* તમે ફૅસબૂક પર છો?
- જી ના. હું કોઇપણ બૂક પર નથી.
(ખુશી સોલંકી, અમદાવાદ)

* રાહુલ બાબાએ હવે લગ્ન કરીને કોઇ કામધંધે ચઢી જવું ન જોઇએ? સુઉં કિયો છો?
- હા, પણ એમને બીજા કોઇ કામધંધા હોય કે નહિ?
(સંજય ગોહેલ, જામ ખંભાળીયા)

* ચૂંટણીના પરિણામો જોઇને હવે ખાત્રી થઇ કે, તમારી આગાહી સો-ટકા સાચી પડી, સુઉં કિયો છો?
- આ વખતે તો નાનું છોકરૂં ય જાણતું હતું કે, શું થવાનું છે. હું તો મોટું છોકરૂં છું.
(કિરીટ ગોસાઇ, ખેરવા-મહેસાણા)

* 'મોદી વડાપ્રધાન બનશે, તો હું દેશ છોડી દઇશ', એવું ઘણા મોટા માથાઓએ કીધું હતું, શું થયું?
- દેશનું તો તમે સમજ્યા હતા... અમે તો દુનિયા સમજ્યા હતા...!
(ઘનશ્યામસિંહ સોલંકી, ગાંધીનગર)

* 'એનકાઉન્ટર' ચોથા ભાગના પાનામાં જ આવે છે. આખા પાનામાં કરી દો તો તમારો પગાર ચાર ગણો વધી જાય!
- જે મળે છે, એ ય બંધ થઇ જાય!
(મૂકેશ કે. શાહ, અમદાવાદ)

* 'બુધવારની બપોરે' વાંચીને ખડખડાટ હસતો'તો, એમાં પડોસીઓ કાંઇક જુદું સમજ્યા?
- હું લખતો હોઉં, ત્યારે ય પડોસીઓ એવું જ કંઇક સમજે છે.
(અશોક પટેલ, ચરાડા-ગાંધીનગર)

* અમેરિકાથી શું શીખીને આવ્યા?
- એ જ કે, દુનિયાના તમામ દેશોમાં ભારતથી ચઢે, એવો બીજો કોઇ દેશ નથી.
(રહેમાન બોગલ, ગોધરા)

* મહેશ ભટ્ટમાં બુધ્ધિ કેટલી બાકી હશે?
- સર્જક તરીકે ૧૦૦ ટકા... વ્યક્તિ તરીકે... સૉરી!
(મધુકર મેહતા, વિસનગર)

* ભગવદ-ગીતામાં 'સંભવામિ યુગે યુગે'નું વચન પૂરૂં થતું હોય એવું લાગે છે કે નહિ?
- બહુ દાયકાઓ રાહ જોઇને આપણે વખાણો કર્યા છે... હજી એ વખાણ સિધ્ધ કરવાનો સમય કૃષ્ણને આપો.
(ડૉ. રસિકલાલ સી. શાહ, અમદાવાદ)

* તમારી જન્મતારીખ તો ચાર વર્ષે આવે. શું તમારા પત્ની શુભેચ્છા આપવા ચાર-ચાર વર્ષ રાહ જુએ છે?
- ના. બાકીના ત્રણ વર્ષોમાં અન્યને પણ ચાન્સ મળે ને?
(મનિષ રામાવત, મીઠાપુર)

No comments: