* તમે અમેરિકાથી ખુશ છો કે ઇન્ડિયાથી?
- બાપ આખિર બાપ હોતા હૈ... ઇન્ડિયા બધા દેશોનો બાપ છે.
(સુખદેવસિંહ જાડેજા, જસદણ-રાજકોટ)
* જલ્દી પૈસાદાર બનવું હોય તો શું કરવું?
- કોઈ સારા ડૉક્ટરને બતાવી જોવું.
(કરણ પી. નાયક, અમદાવાદ)
* વાઈફ અને ગર્લફ્રેન્ડ વચ્ચે શું તફાવત?
- ગર્લફ્રેન્ડને વાઇફ બનવાનો ચાન્સ છે... વાઈફને ગર્લફ્રેન્ડ બનવાનો કોઈ ચાન્સ નહિ... એટ લીસ્ટ, એના ગોરધનની ગર્લફ્રેન્ડ બનવાનો તો નહિ જ!
(પંકજ જાસુદ, સુરત)
* ઈન્ડિયાને ક્રિકેટમાં રસ છે, ફૂટબોલમાં કેમ નહિ?
- કોઈ પણ કામ લાતો મારી મારીને પતાવવું, એમાં આપણી શોભા છે ?
(અજય રાવલ, ભચાઉ-કચ્છ)
* આ પ્રકારની કોલમમાં તમારે સવાલ પૂછવો હોય તો ક્યો પૂછો ?
- શું કહ્યું?
(હરેશ પંડયા, જૂનાગઢ)
* 'અચ્છે દિન કબ આયેંગે?'
- મારી વાઈફને તો બબ્બે વખત 'અચ્છે દિન' આઈ ગયા છે.
(રૂત્વા રાજ્યગુરૂ, ભાવનગર)
* પહેલા 'એનકાઉન્ટર' માણવાની ચાવી ને પછી પોસ્ટકાર્ડ બંધ કરાવ્યા... હવે?
- હવે બંધ કશું કરવું નથી. મારો સવાલ પૂછનારને રૃા. એક લાખનું ઈનામ આપવાનો વિચાર કરી રહ્યો છું.
(શ્વેતા પ્રજાપતિ, સિદ્ધપુર)
* વરસાદના આ માહૌલમાં તમને ડિમ્પલ સાથે પલળવાનો ચાન્સ મળે તો?
- તો તમને એક ઝાપટું ભેટ!
(જીતેન્દ્ર કેલા, મોરબી)
* 'બધીએ મજાઓ રાતે રાતે ને સંતાપ એનો સવારે સવારે...' તમારો અનુભવ શું કહે છે?
- અમારામાં તો મજાઓ ય સવારે સવારે હોય... ! ઇસબગુલ લઈ લેવાનું ને?
(ડૉ. વૈભવ રાવલ, થરાદ)
* 'મેરે શેરોં સે ન કર મેરી સોચ કા ફૈસલા, તેરા જહેન થક જાયેગા, મેરી શનાખ્ત કરતે કરતે.' અશોક સર, તમે આ શેરનો શું મતલબ કાઢો છો?
- 'મેરે મતલબ નીકાલને પે ન જા અય સાકી, તેરા દમ નીકલ જાયેગા સમઝતે સમઝતે.'
(આમીર ગોડિલ, સુરત)
* પુરૂષને 'પદ્મશ્રી' તો સ્ત્રીઓને 'પદ્મશ્રીમતી' કેમ નહિ?
- જે છે એ બરોબર છે. 'પદ્મભૂષણ'નું 'પદ્મભૂષણી' ના થાય!
(રજનીકાંત ઘુંટલા, મુંબઈ)
* ગુજરાતમાં સવારે ફાફડા-જલેબી ખવાય છે... અમેરિકામાં?
- ત્યાંય ફાફડા-જલેબી ખાવા જ પડે... પીવાય નહિ !
(અચલ એસ. મહેતા, જૂનાગઢ)
* અમેરિકાથી પાછા આવવાનો વિસા કેવી રીતે મળ્યો?
- મેં એમને મારો એક લેખ વંચાવ્યો... મને તરત પાછો મોકલી દીધો!
(વિક્રમ જી. પંચોલી, રાજકોટ)
* વર્ષો સુધી નેસ વાડીયા સાથે ગુલછર્રા ઉડાવ્યા પછી પ્રીતિ ઝીન્ટાએ એની સામે છેડતીની ફરિયાદ કરી છે. સુઉં કિયો છો?
- રસ્તો ક્લિયર છે. હવે પ્રીતિ સાથે ગુલછર્રા તમે ઊડાડી આવો. મને ખોટું નહિ લાગે!
(પ્રમોદ સિંઘલ, આબુ રોડ-રાજસ્થાન)
* રવિવારે 'એનકાઉન્ટર', બુધવારે 'બુધવારની બપોરે' ને શુક્રવારે 'ફિલ્મ ઈન્ડિયા...' તો બાકીના દિવસોમાં શું?
- વચ્ચેના એ ગેપ વાચકોને લખેલું સમજવા માટે આપવા પડે. હજી ઘણા વાચકો પૂછે છે, ''આટલું બધું લખો છો... હવે કંઈક હસવાનું લખો ને!''
(રૂચિ ભદે, મેરીએટા-જ્યોર્જીયા-અમેરિકા)
* સોશિયલ મીડિયાનો વધુ પડતો ઉપયોગ ક્યાં સુધી?
- કહે છે કે, હવેના બાળકો કાનમાં મોબાઈલ સાથે જન્મવાના છે.
(જયદીપ ગોંડલીયા, અમદાવાદ)
* ત્રીજું વિશ્વયુદ્ધ ક્યારે?
- ત્રીજાની તો ખબર નથી, પણ ચોથું તો ત્રીજા પછી જ શરૂ થશે.
(ગણેશ મારૂ, ધારી-અમરેલી)
* દેશમાં આઝાદીની ફિલ્મો આવતી કેમ બંધ થઈ ગઈ?
- આઝાદીની ફિલમ તો ઉતારવાની હોય, બનાવવાની ન હોય!
(મુગ્ધા ઉલ્લાસ વોરા, જૂનાગઢ)
* તમને એક દિવસ માટે પાકિસ્તાનના વડાપ્રધાન બનાવવામાં આવે તો શું કરો?
-હિના રબ્બાની સાથે ડિનર.
(નીરવ રામી, અમદાવાદ)
* પહેલાની સ્ત્રીઓને ૫-૭ ડિલિવરીઓ થતી... આજે એકમાં ય સીઝેરિયન?
- ડૉક્ટરોને કમાવાનું સીઝેરિયનમાં હોય છે. એકાદ-બે વર્ષમાં તો ગાયનેકનું ભણતા ડૉક્ટરોના કોર્સમાંથી ય નોર્મલ ડીલિવરી નીકળી જશે.
(મધુકર માંકડ, જામનગર)
* અમેરિકાના રસ્તાઓ ઉપર સ્પીડ-બ્રેકર્સ કેટલા હોય છે?
- દરીયામાં હોય... રસ્તા ઉપર નહિ!
(શશીકાંત મશરૂ, જામનગર)
* પ્રમાણમાં ઓછી ખરાબ ફિલ્મોમાં કામ કરનાર જીતેન્દ્રના સંતાનો બિભત્સ ફિલ્મો બનાવે છે ને કામ કરે છે. જીતેન્દ્ર કશું કહેતા નહિ હોય?
- કૂવામાં હોય તો હવાડામાં આવે.
(ડૉ. રાજેન્દ્ર ત્રિવેદી, વડોદરા)
* આ સવાલો ગુજરાતીમાં કેમ પૂછાય, તેની સમજ પડતી નથી.
- બ્રેઈલ લિપીમાં પૂછો.
(જયમીન પારેખ, આણંદ)
* મેં સાંભળ્યું છે કે, સુંદર દેખાતી હરએક ચીજ બેવફા હોય છે...
- સાંભળવાનું બંધ કરીને, હવે જોવાનું ચાલુ કરો.
(ધર્મેશ વિશનાણી, ખંભાત)
* મૂર્ખાના ગામ ન હોય, એવું કહેવાય છે પણ મેં તો એવા અનેક ગામો જોયા છે...
- બહેન, તમારાથી વડોદરાને આમ બદનામ ન કરાય... બા ખીજાય!
(ઋતુ કિરીટ પંડયા, વડોદરા)
No comments:
Post a Comment