Search This Blog

09/11/2014

ઍનકાઉન્ટર : 09-11-2014

* આતંકવાદીઓની બાઓ ખીજાતી હશે કે નહિ?
- માહિતી તો હોવી જોઇએ ને કે, 'આ મારી બા છે!'
(જયેશ અંતાણી, ભાવનગર)

* 'ઈન્ડિયા'નું નામ બદલીને 'ભારત' ક્યારે થશે?
- 'ઈન્ડિયા' દુનિયાનું સર્વોત્તમ નામ છે.
(સંદીપ ઘોલે, નવસારી)

* 'વૉટ્સઍપ' કે 'ફૅસબૂક'ના નામો કોઇ ગુજરાતીએ આપ્યા હોત તો શું નામો રાખત?
- 'જે શી ક્રસ્ણ' અને 'બકા'.
(વિક્રમસિંહ ચંપાવત, વિજયનગર-સાબરકાંઠા)

* ૬૦-૬૦ વર્ષોથી મુહમ્મદ રફીએ ગાયેલા ગીતો આજે પણ સ્પંદનો પેદા કરે છે. આપ શું માનો છો?
- એ જ કે, એમાં મારો નંબર કેટલા જન્મો પછી લાગશે? હું ય આમ પાછું ગાઉં છું !
(રોહિત યુ. બુચ, વડોદરા)

* ઉત્તરાખંડ, બિહાર ને કાશ્મીર... બધે પૂરનો પ્રકોપ! શું કિયો છો?
- જે ડૂબવા જોઇતા હતા... એ તરી રહ્યા છે! આજકાલ તો સાલા પૂરોનો ય ભરોસો નથી!
(જીતેન્દ્ર હમીરાણી, વડોદરા)

* જો હું તીખું ખાઉં, તો મીઠું ખાવાની ઈચ્છા થાય છે ને મીઠા વખતે તીખાની...! આમને આમ મારૂં શરીર ઉતરતું નથી... શું કરવું?
- બન્ને ભેગું કરીને ખાઓ.
(ફરઝાના સિવાણી, પોરબંદર)

* તમારા જીવનની મોટામાં મોટી ભૂલ કઇ છે?
- મને એક વાંદરૂં બચકું ભરીને ભાગી ગયું'તું... સામું બચકું ભરવા હું એની પાછળ દોડયો... નાલાયકે બીજું ભર્યું!
(નિખિલ ઘોડાસરા, મોરબી)

* તમે અમેરિકામાં વૅજીટૅરીયન જમતા... કે પછી?
- હું તો વ્હિસ્કી ય વૅજીટૅરીયન પીતો...
(સતીષ ટર્નર, મુંબઇ)

* તમે અમુક લોકોના જવાબો વારંવાર કેમ આપો છો?
- એ લોકો વારંવાર પૂછે છે.
(પ્રકાશ ચૌહાણ, મહુવા)

* કૉલમ્બસે અમેરિકા ખંડ શોધી કાઢ્યો... તમે?
- કૉલમ્બસને કોણે શોધ્યો હતો, એ તપાસ કરી જોજો.
(નસરૂદ્દીન પિરાણી, તળાજા-ભાવનગર)

* જે દેશમાં પાણીની પરબે ગ્લાસ સાંકળથી બાંધી રાખવી પડે... એ દેશનું શું થશે?
- એ બતાવે છે કે, દેશના અનેક લોકો પાસે પીવાનું પાણી તો છે... ગ્લાસ નથી!
(વિશાલ જોશી, અમદાવાદ)

* અશોક દવે, એક સવાલ તમે પૂછો. 'ઍનકાઉન્ટર' વાચકો કરશે.
- સવાલ પૂછાવીને તો બધા જવાબ આપે... અમારી માફક વગર પૂછે જવાબ આપો. રોજ સાંજે ઘેર જઉં છું, ને વગર પૂછે પોપટની માફક બધું બોલી જઉં છું.
(ડૉ. ભૂપેશ પટેલ, અમદાવાદ)

* અડવાણીને ભાવિ રાષ્ટ્રપતિ તો બનાવો...
- મોદીએ કાકાને જે બનાવી નાંખ્યા છે, એ પછી બીજા ૫૦ અડવાણીઓ ઘેર બેઠા ફફડે છે.
(દીક્ષિત ત્રિવેદી, રાજુલા)

* તમારા ઉપરે ય અનિચ્છિત ઈ-મૅઈલો આવે છે ખરા?
- કયો પ્રેમ ઉભરાઇ આવતો હશે કે, 'કન્ટ્રોલ રૂમ, વડોદરા-રૂરલ'થી રોજ મને ઈ-મૅઈલ પર રામ જાણે શું મોકલાવે રાખે છે... અર, પગાર નહિ તો હપ્તો મોકલો, ભ'ઇ!
(સુનિલ ગઢિયા, રાજકોટ)

* તમારૂં 'ઍનકાઉન્ટર' વાંચીને ડીપ્રેશન જતું રહે છે...
- સ્પષ્ટતા કરશો. ''કોનું'' વાંચીને ડીપ્રેશન આવતું હતું?
(રતિલાલ ડી. પટેલ, મુંબઇ)

* આ સ્માર્ટ-ફોનો લોકોની જીંદગી બગાડી નાંખે છે.. સુઉં કિયો છો?
- ફિકર નૉટ...! હવેના બાળકો ગળામાં ભરાવેલા મોબાઇલ સાથે જન્મશે.
(આશિષ જોશી, હાલોલ)

* આજના સૌથી વધુ આદરપાત્ર હાસ્યલેખક કોણ છે?
- મને અંગત રીતે 'મીર્ચી મુર્ગા' ખૂબ હસાવે છે.
(રાજુ સરવૈયા, અમદાવાદ)

* વાચકોના સવાલો વાંચીને જવાબો આપવા સહેલા છે... એક વાર રૅપિડ-ફાયરમાં લાઇવ જવાબો આપી બતાવો!
- આમાં તમારૂં કામ નહિ, બેન ! એક વાર 'પતિ' બની બતાવો... બધા રૅપિડ-ફાયરો આવડી જશે.
(રૂપલ મિસ્ત્રી, સુરત)

* આજકાલ વડિલો યુવાનોને કઇ સલાહ આપે જાય છે?
- કોઇનો 'વડિલ' ન બનતો.
(હર્ષવર્ધન પંડયા, સાવરકુંડલા)

* આજકાલ ફેશન બનેલી પેલી 'આઇસ-બકેટ' ચૅલેન્જ આપવા માટે તમે કોને પસંદ કરો?
- 'મોર્ગ'વાળા સિવાય બધાને! ('મોર્ગ' એટલે બરફની પાટોમાં મૃતદેહને સાચવવામાં આવે છે, એ રૂમ)
(અર્પિત પટેલ, અમદાવાદ)

* તમારૂં અપહરણ કરીને રામગોપાલ વર્મા એની 'આરજીવી કી આગ' અને સાજીદખાન એની ફિલ્મ 'હમશકલ્સ' બતાવે તો છટ્કો ક વી રીતે?
- એમની હિમ્મત ના ચાલે. એ મના પહેલા આપણે એમને 'બુધવારની બપોરે' પુસ્તકોનો સૅટ મોકલી દેવાનો ને...!
(રવિ એસ. ચૌધરી, મેહસાણા)

* 'સંબંધો સ્વાર્થના ને પ્રેમ પૈસાનો...' એવું કેમ ગુરૂજી?
- તારી ભલી થાય ચમના... સ્વાર્થ અને પૈસો આયો, એટલે ગુરૂજી યાદ આયા...?
(કરીમ ધોળકીયા, મોટા દેવળીયા-અમરેલી)

* 'અંધશ્રધ્ધા'.... એક લાઇનમાં....?
- સોનિયા ગાંધી.
(ચેતન પરમાર, વિરમગામ)

* સ્મશાનમાં બધું પતાઇને બહાર નીકળતાં હોઇએ ને, ત્યાંનો સ્ટાફ 'આવજો' કહે તો?
- જઇ આવવાનું...! ક્યાં આપણે પોતાને માટે જવાનું છે?
(રમેશ સુતરીયા-ટ્રોવા, મુંબઇ)

* લોકો હોમિયોપેથીને સમજતા કેમ નથી?
- અનેક હોમિયોપેથ ડૉકટરો પ્રેકટીસ ઍલોપથીની કરે છે, માટે?!
(ડૉ. વૃંદા જોશી, જૂનાગઢ)

No comments: