* જ્યાં વોટબેન્કને બાજુ પર રાખીને સામાજીક, આર્થિક અને રાજકીય ન્યાય મળે, એવી ભારતમાં કોઈ જગ્યા ખરી ?
- અનાથાશ્રમ.
(યોગેશ કડાચા, અમદાવાદ)
* લગ્નની વિધિ કરાવતો કર્મકાંડી બ્રાહ્મણ પોતે કુંવારો રહે, એનો શો ઉપાય ?
- સલૂન ખોલીને બેઠા એટલે પોતાનું હેર કટિંગ પણ જાતે કરવાની જીદ ન પકડાય.
(હિરેન જોશી, અમદાવાદ)
* 'અચ્છે દિન' હતા પણ નહિ ને આવશે પણ નહિ. સુઉં કિયો છો ?
- થોભો. હમણાં પટેલોના અચ્છે દિન આવી રહ્યા છે, આપણા ય આવશે.
(ખુશ્બૂ જોશીઠાકૂર, વડોદરા)
(ખુશ્બૂ જોશીઠાકૂર, વડોદરા)
* સંબંધો ખરાબ હોય, એને 'આડા' સંબંધો કેમ કહેવાય ?
- બધા જ આડા સંબંધો ખરાબ હોઈ શકે... બધા ખરાબ સંબંધો આડા ન હોય !
(ધીમંત ભાવસાર, બડોલી-ઈડર)
* 'આઝાદી કો લાયે થે હમ દુલ્હન બનાકર, કુછ કમીનોં ને ઉસે કોઠે પર બીઠા દિયા...' આ શે'ર કોણે લખ્યો છે ?
- મ્યુનિ. કોઠામાં તપાસ કરો.
(અરવિંદ આર. શાહ, મુંબઈ)
* 'બુધવારની બપોરે' વાંચતા એકલા એકલા હસવું આવી જાય છે. પતિ કહે છે, આમ એકલું ન હસાય... !
- આ હિસાબે, એમને હ્યૂમરમાં સમજણ પડતી લાગે છે !
(અફરોઝ આર. મીરાણી, મહુવા)
* પેકિંગમાં માલ ઓછો ને હવા વધારે ભરેલી હોય છે, કોઈ નિરાકરણ ?
- મારા લગ્નમાં ય એવું જ થયેલું, બેન !
(મોના મીરાણી, મહુવા)
* ડિમ્પલ અને તેના પતિ વચ્ચે બીજી સ્ત્રીને લાવવામાં તમારો ફાળો ખરો ?
- મતલબ... લોકોને હવે સની દેવલની જેમ મારી ઉપરે ય ડાઉટ પડવા માંડયો !
(જયેશ એમ. સંઘવી, અમદાવાદ)
* કોઈને તમે આંગળી આપો ને એ હાથ પકડી લે તો શું થાય ?
-ગલીપચી.
(પિયુષ પ્રજાપતિ, ગીરગઢડા)
* શાંતિ જોઈએ છે. શું કરવું ?
-મમ્મી-પાપાના ચરણસ્પર્શ કરી આશીર્વાદ લો.
(કલ્પના એમ. જરૂ, જૂનાગઢ)
* મારૂં મન મોર બની થનગાટ કરે... તમારૂં ?
-મારૂં તો સલામત છે.
(બ્રિજેશ ગાંગાણી, સુરત)
* વેકેશન ચાલુ છે. ટાઈમપાસ માટે શું કરવું ?
-દર પંદર મિનિટે ઝાડ ઉપર ચઢીને ઉતરી જવું.
(યશ દહીમા, કોડિનાર)
* હજી ગરમી પડે છે. ચાલુ પંખો રાખવો કે એસી ?
-ઘરના આવા ખાનગી સવાલો ય જાહેરમાં પૂછશો ?
(સ્મિત પટેલ, રાજકોટ)
* ઘણા માણસો ઊંટ પર બેઠા હોય તો ય કૂતરૂં કરડી જાય છે. તમારે કેમનું છે ?
-ઓહ... મને એમ કે, તમે વેટરીનરી (ઢોરોના) ડૉક્ટર હશો !
(ડૉ. સમીર ચૌહાણ, નસવાડી)
* 'શ્રી' કે 'માનનીય' જેવા ક્યા સંબોધનથી તમને સવાલ પૂછું તો મને જવાબ મળે ?
-બસ, ગાળ ન બોલતા.
(કમલેશ બી. શુકલ, અમદાવાદ)
* તમારા જેવા હાસ્યલેખકો સાવ ઓછા કેમ હોય છે ?
-You can not improve perfection.
(જયેશ અંતાણી, ભાવનગર)
* 'વેચવાની છે, મફતમાં લાગણી...' ને તો ય લોકો ભાવ કસે છે...
-તમે લાયા હશો ય મફતમાં ને... ? હવે ફરિયાદ શેની ?
(પંકજ પઢીયાર, લાઠી)
* ઘણા વિચિત્ર સવાલોના તમે સ્માર્ટ જવાબો કેવી રીતે આપી શકો છો ?
-લગ્નને ખાલી ૩૮-વર્ષો જ થયા.
(મૌલિકા દોશી, અમદાવાદ)
* અમેરિકામાં અનેક ગુજરાતીઓની હત્યા થાય છે. કોઈ ઉપાય ?
-આપણાથી ગુજરાતીઓને બદલે બીજા કોઈને મારવાની અપીલ તો ન કરાય ને?
(ટ્વિન્કલ પઢીયાર, આણંદ)
* આટલી બધી થપાટો ખાવા છતાં માણસ ઈશ્વરના અસ્તિત્વને કેમ સ્વીકારતો નથી ?
-થપાટો ખાધા પછી શું કામ સ્વીકારે ?
(દયાળજી લાખાણી, પોરબંદર)
* જો તમે ભૂલથી પાકિસ્તાનની બોર્ડર ક્રોસ કરી ગયા હો, તો પહેલું કામ ક્યું કરો ?
-જે અહીં ફૂટપાથ પર ઊભા રહીને કરવું પડે છે.
(ડૉ. કિશોર રાઠોડ, જેતપુર)
* ફિલ્મોમાં બતાવવામાં આવતા નેતાઓ અને વાસ્તવિક નેતાઓ વચ્ચે શું ફરક હોય છે ?
-ફિલ્મોમાં તો કામ પતી ગયા પછી એ લોકો માણસ બની જાય છે.
(વિહાજી ચૌહાણ, જેતડા-થરાદ)
* હમણાંથી મોદી સાહેબ વિશે તમારો અભિપ્રાય બદલાયો લાગે છે ?
-હા... પેટ-બેટ વધ્યું હોય એવું તો લાગે છે !
(સોયેબુસેન ગઢીયા, રાજકોટ)
* તમારે ૩-૪ પત્નીઓ તો હશે જ ને?
-એક આદર્શ ભારતીય પુરૂષ ઘરમાં ફક્ત એક જ પત્નીને ચાહે છે.
(કેયૂર પાંચાણી, સણાલીયા-અમરેલી)
* ફોટામાં તમે ૬૩-ના હોવાનું કહો છો, પણ દેખાવમાં ૩૬-ના લાગો છો. આ સદાબહાર યુવાનીનું રહસ્ય ?
-મારી જન્મ તારીખ... ૨૯ ફેબ્રુઆરી.
(દીપ્તિ કે. રાવલ, આણંદ)
* તમારા જવાબોમાં દેશભક્તિની વાતો આવે છે, ત્યારે ખુશ થઉં છું. આવી હાકલ નરેન્દ્ર મોદી કરે તો ?
-તો પછી મારે નવરા બેસી રહેવાનું ?
(અશરફ પાંડોર, સુરત)
* શું તમે સાચ્ચે જ અક્ષયકુમારની સાસુને પ્રેમ કરો છો ?
-ના. રીહર્સલો કરૂં છું.
(દીપક શાહ, મુંબઈ)
* શું નરેન્દ્ર મોદીની ખોટ આનંદીબેન પૂરી કરી શક્યા છે ?
-ના. હાઈટ-બોડીમાં હજી બેન ઘણા પાછળ છે.
(પરેશ દવે, રાજકોટ)
No comments:
Post a Comment