ઍનકાઉન્ટર : 09-10-2016

* 'એનકાઉન્ટર'માં જવાબ મેળવવા શું કરવું જોઈએ ? 

- સવાલ પૂછવો જોઈએ. 

(મહેશ ધાબલીયા, મુંબઈ અને જયેશ સંઘવી, અમદાવાદ) 

* આજકાલ અખબારોમાં જાહેર ખબરોમાંથી સમાચાર શોધવાનું બહુ અઘરૂં થઈ ગયું છે...શું કરવું ? 

- તે એમ કહોને, તમે સમાચાર વાંચવા છાપું ખરીદો છો...! 

(કૌશિક એસ. શાહ, ભાવનગર) 

* ભારતમાં વસ્તીવધારો રોકવા શું કરવું જોઈએ ? 

- પડોશી દેશોમાંથી કંઈક શીખવું જોઈએ. 

(પરીન્દા પટેલ, લાડોલ-વીજાપુર) 

* શબ્દોનું એનકાઉન્ટર કરવા સવાલ તમારો અને જવાબ અમારો, એવું ન થઈ શકે ? 

- ચલો પૂછું છું... બોલો શું થઈ શકે ? 

(ડો. ગાયત્રી કુંભાણી, બાબરા-અમરેલી) 

* બિહારનું શિક્ષણ તો આટલું સારૂં છે, છતાં લાલુનો છોકરો દસમું ય પાસ કેમ કરી ન શક્યો ? 

- દસમા સુધી બિહારનું શિક્ષણ સારૂં છે. 

(ડૉ. હેમંત રાઠવા, વલ્લભ વિદ્યાનગર) 

* રેસ્ટરાંમાં પિરસાતી થાળી અને ઘેર પિરસાતી થાળી વચ્ચે શું તફાવત છે ? 

- બાજુવાળાના ઘરમાં શું પિરસાયું છે, તે જોવાનો ચાન્સ ઘરે મળતો નથી ! 

(અતુલ નગીનદાસ કોઠારી, અમદાવાદ) 

* દેશના વિકાસમાં તમે કઈ રીતે મદદરૂપ થઈ રહ્યા છો ? 

- ચૂપ રહીને. 

(પ્રબોધરાય જાની, વસાઈ-ડાભલા) 

* ફિલ્મ ઈન્ડિયામાં તમે અમિતાભ બચ્ચનને શ્રેષ્ઠ અભિનેતા કહો છો, પણ 'એનકાઉન્ટર'માં ઈરફાન ખાન કેમ ? 

- ઈરફાન ખાન પણ સર્વોત્તમ જ છે...યસ, અમિતાભ જેટલું કામ કરી બતાવવાનું તો બધાને બાકી છે ! 

(ડૉ. રાકેશ પટેલ, કરમસદ) 

* કેજરીવાલનું એક જ કામ છે. સવાર પડે ને મોદીને ટિવટર પર ગાળો આપવાનું ! સુઉં કિયો છો ? 

- વાંક કેજરીવાલનો નથી. જેને ને તેને પબ્લિસિટી આપવામાં ટાઈમપાસ કરતા મીડિયાનો છે. 

(અંકુર મિસ્ત્રી, અજરાઇ-નવસારી) 

* સત્તા પર આવ્યા પછી ભાજપ હિંદુઓ અને હિંદુત્વને ભૂલી ગઈ હોય એવું લાગે છે ? 

- ઘણા હિમ્મતવાળા છો. હિંદુ શબ્દ આટલી આસાનીથી બોલી નાંખવાનો ? 

(જીતેન દાવડા, ભાટીયા-દ્વારકા) 

* મારે લગ્ન કરવા છે. મુહુર્ત જોવડાવું કે ચાલે...? 

- બાબાભાઈ, આમાં સીધી જતિનભાઈની સલાહ લેવાય, મારી નહિ ! 

(બ્રિજ જતિનભાઈ પટેલ, પાટણ) 

* સ્વચ્છ ભારતમાં તમારૂં કેટલું યોગદાન છે ? 

- બસ. હવે હું પણ ભારત સ્વચ્છ રાખવાની અપીલો કરૂં છું. 

(ભરત બી. શાહ, વડોદરા) 

* આધુનિક રામાયણ કેવું હશે ? 

- એ તો બાઇન્ડિંગ ને પ્રિન્ટીંગ જોયા પછી ખબર પડે ! 

(મુગ્ધા ઉલ્લાસ વોરા, જૂનાગઢ) 

* તમે કોઈપણ સવાલનો જવાબ આટલા સહજભાવે કેવી રીતે આપી શકો છો ? 

- જૂઠ્ઠું બોલવાની બેશુમાર ટેવ...! 

(લલિત ગૌદાણી, મુંબઈ) 

* ભારત... કોંગ્રેસ મુક્ત ક્યારે ? 

- એકએક-બબ્બે દહાડે કોઈ હસાવતું રહે, એ તમને ગમતું નથી ? 

(જીજ્ઞેશ ધણખરા, સિડસર-વર્તેજ) 

* હું આખી દુનિયા પર રાજ કરવા માંગુ છું. તમે મારા મંત્રી બનશો ? 

- બોલો બાબાભ'ઇ, બાલચિત્રકથાઓ બહુ વાંચો છો ને ? 

(પિયુષ જોશી, સુરત) 

* લાઈફમાં કાયમ હેપી રહેવા શું કરવું ? 

- કોઈને ય નફરત કરીને એને હીરો બનાવી ન દો. તમારી તો નફરતે ય આસમાની બુલંદીના ભાવની હોવી જોઈએ...! 

(હિમાની કનોજીયા, મહેમદાવાદ) 

* અગાઉના મારા સવાલમાં તમે મારી અટક દોશીને બદલે 'દોષી' લખી હતી. શું તમે મને ગુનેગાર સમજો છો ? 

- હવે તો હું દોષી થયો ને ? 

(મિસ કેની દોશી, હિમ્મતનગર) 

* આપણા દેશની બેકારી ઘટાડવાનો કોઈ ઉપાય ખરો ? 

- મારી  આ ત્રણ કોલમો ચાલે છે, ત્યાં સુધી ઉપાયો શોધવાની જરૂર નથી. 

(ભૂમિ ઠાકોર, અમદાવાદ) 

* કોઈ પૂછે કે, તબિયત-પાણી કેમના છે ? તો શું જવાબ આપવો ? તબિયતનું તો સમજ્યા, પણ પાણીનું ? 

- તમારી તબિયતના સમાચાર આપી દઈને, એમના પાણીની ખબર પૂછો. 

(કૃપા સેવક, વડોદરા) 

* ગુજરાતીમાં ટાઈપ કરવું અઘરૂં પડે છે, તો અંગ્રેજીમાં એનકાઉન્ટર ચાલુ ન થઈ શકે ? 

- ચાલુ તો બ્રૅઇલ-લિપિમાં ય થઈ શકે... પેલામાં તો મારે પાછું ગુજરાતી કરીને આપવાનું નહિ ? 

(જયેન્દ્ર વી. ઠાકર, વડોદરા) 

* આ દેશમાં રહેવું નથી ને વિદેશ જવા મળતું નથી, તો શું કરવું ? 

- વિદેશના કાગડા ધોળા નથી હોતા ! 

(મનન પટેલ, આણંદ) 

* બહાર જતી વખતે તૈયાર થવામાં પત્ની જ વધુ ટાઈમ લે છે... શું કરવું ? 

- તૈયાર થયેલી એક પત્ની જુદી જ રાખો. 

(હાર્દિક ડબગર, મહેસાણા) 

* સવાલ સાથે હું સરનામું ન મોકલું, તો શું વાંધો ? 

- ઉપલેટાથી દર રવિવારે રૂબરૂ આવવાનું રાખો. 

(પિયુષ બી. સોલંકી, ઉપલેટા) 

* 'અચ્છે દિન આ ગયે', સુઉં કિયો છો ? 

- પ્રસૂતિગૃહોમાં લટકાવવાના  બોર્ડ આ લોકોએ દેશભરમાં લગાવ્યા છે...! 

(શૈલેષ પટેલ, અમદાવાદ)