Search This Blog

02/11/2014

એનકાઉન્ટર : 02-11-2014

* મહેશ ભટ્ટની બુધ્ધિ...! અને હવે એની દીકરીની બુધ્ધિ...!!
- કૂવામાં હોય તો હવાડામાં આવે.
(મધુકર મેહતા, વિસનગર)

* પરણવા માટે હિમ્મત પણ જોઇએ...?
- ના. એક કન્યા જોઇએ.
(નીરજ પુરોહિત, ઊના- ગીરસોમનાથ)

* શિક્ષક બનવા માટે શું કરવું ?
- અરજી પ્રિન્સિપાલ બનવાની કરવી.
(જગદીશ દુધાત, અમદાવાદ)

* તમને પડોસી બદલવાનું મન નથી થતું ?
- એક સાથે સાત ફેમિલીઓને તો કેવી રીતે કાઢી મૂકાય.. !
(કુમાર દવે, પૂણે- મહારાષ્ટ્ર)

* માણસે બનાવેલા મંદિરમાં ભગવાન બિરાજે છે. તો મોટું કોણ ? માણસ કે ભગવાન ?
- અનેક મંદિરો- દેરાસરોની દિવાલો ઉપર દાતાઓના નામની તખ્તીઓ ચોંટેલી જોયા પછી કોણ શક્તિમાન, એ પૂછવાનું ક્યાં રહે છે ?
(રમેશ સુતરીયા- ટ્રોવા, મુંબઇ)

* તમારા મતે હવે અરવિંદ કેજરીવાલે શું કરવું જોઇએ ?
- એના પક્ષનું પ્રતિક 'ઝાડુ'ને બદલે 'ટુવાલ' રાખવું જોઇએ.
(મુકેશ ડો.ઠક્કર, રાજકોટ)

* સરકારી નોકરી કરીએ છીએ, છતાં આનંદ જેવું કેમ નહિ લાગતું હોય ?
- તમે પોતાના બલબૂતા ઉપર નોકરીએ લાગ્યા લાગો છો...!
(સચિન, ઇશાન, ગુર્જર, બગસરા- અમરેલી)

* 'બુધવારની બપોર'માં પહેલા 'સિક્સર' વાંચવી કે લેખ...? કાયમી મૂંઝવણ છે...!
- મતલબ કે, તમે બેમાંથી એકે ય વાંચતા નથી.
(યશ મેહતા, અમદાવાદ)

* તમે અમેરિકાથી પત્ની માટે રૂ.દોઢ લાખનું પર્સ લાવ્યા, તે મજાક જ હતી ને ?
- હા, પણ પૈસાની બાબતે ધોળીયાઓ મજાકમસ્તી નથી ચલાવી લેતા..!
(વિશાલ અજીતસિંહ પરમાર, જૂનાપુંગમ, તા.ભરૂચ)

* તમે 'નૅટ'ની દૂનિયામાં આટલા 'લૅટ' કેમ આવ્યા ?
- જીવ બાળો છો કે ધમકાવો છો ?
(રહેમાન બોગલ, ગોધરા)

* અમેરિકા જઇ આવ્યા પછી હવે તમે વર્લ્ડ ટૂર પર જશો ?
- ના. એકની એક જગ્યાએ વારે ઘડીએ જવું ન ગમે
(કુણાલ પંડયા, વડોદરા)

* 'પહેલા મરઘી કે પહેલા ઇંડુ...'માં લોકો મરઘાને કેમ ભૂલી જાય છે ?
- હા... આપણે મરઘાઓએ આ અન્યાય પણ સહેવો રહ્યો...!
(આસિફ પટેલ, ભાવનગર)

* મોદીજી જાપાન-અમેરિકા જઇ આવ્યા... હવે ?
- હવે ગાંધીનગર બાજુ જવાનું વિચારતા'તા ખરા...!
(કુંજલ દેસાઇ, નવસારી)

* જીવનનો ઉદ્દેશ્ય જાણવા શું કરવું જોઇએ ?
- રોજ રાત્રે હિંગાષ્ટકની ફાકી લેવી જોઇએ.
(ડૉ.પવન ગોર, ભૂજ-કચ્છ)

* કઇ હીરોઇન સાથે તમને લગ્ન કરવા ફાવે ?
- આજકાલ રીસેપ્શન માટે હૉલ ક્યાં મળે છે, ભ'ઇ ?
(મહેન્દ્ર દરજી, અમદાવાદ)

* મારે એક સ્ત્રીને ખુશ કરવી છે, તો શું કરવું ?
- એ સ્ત્રી જો તમારી મા હોય તો બસ... ચરણસ્પર્શ કરી લો.
(પરમેશ્વર છાયા, મુંબઇ)

* તમને જોયા...હૅન્ડસમ છો, પણ સ્માર્ટ નથી...!
- ઓ મમ્મી...દીકરાનું એકાદું અપલખ્ખણ ચલાવી લેજો.
(નંદીની મો.દેસાઇ, અમદાવાદ)

* આ બૉલીવૂડવાળા સાઉથની ફિલ્મોની રીમૅઇક જ બનાવે છે... કોઇ નવી સ્ટોરી નથી મળતી ?
- પાકિસ્તાનવાળાઓ તો આપણી ગુજરાતી ફિલ્મોની રીમેઇક બનાવે છે. બોલો, બાત મેં કુછ દમ હૈ, ના ?
(હરિસિંહ પરમાર, વલ્લભ વિદ્યાનગર)

* જમવામાં જાપાનીઝ 'સુશી'નો વધતો જતો ક્રેઝ આપણા કાઠીયાવાડી ભોજનની ડીમાન્ડ ઓછી તો નહિ કરે ને ?
- સુધીબેનને એકવાર અમદાવાદ આવવા દો...પછી જુઓ અમારી હોટલોના ભડાકા... 'જાપાનીઝ ઢોંસા, જાપાનીઝ દાળઢોકળી, જાપાનીઝ જુલાબ..!'
(લાલજીભાઇ કૂકડીયા, લંડન-યુકે)

* લોકો 'ધંધા-પાણી'નું પૂછે છે... ધંધાને પાણી સાથે શી લેવા દેવા ?
- મારા કાઠીયાવાડમાં વધારે ઇન્ટરેસ્ટિંગ સવાલ પૂછાય છે...''ધંધા-ધાપા કેવા હાલે છે ?'' ધાપા એટલે ખાલીપીલી 'ફેંકવી'! સમજ્યાં ? હવે 'ખાલી'નો અર્થ આવડતો હોય તો 'પીલી'નો ના પૂછશો.
(મિહિર કોઠારી, અમદાવાદ)

* ફિલ્મ 'મૅરી કોમ'જોયા પછી આપણી સરકાર માટે કોઇ અભિપ્રાય ?
- આપણા દેશમાં ખેલકૂદને કોઇ પ્રોત્સાહન જ નથી. 'મૅરી કોમ' જેવી હાલત અમારી 'તીનપત્તી'માં થાય છે... સાલું સરકાર તરફથી કોઇ પ્રોત્સાહન જ નહિ... ! ખેલાડીઓ તે કાંઇ મરે...? સુઉં કિયો છો ?
(કૈલાશ ભટ્ટ, અમદાવાદ)

* તમે કૉલમનું નામ 'એનકાઉન્ટર' કેમ રાખ્યું ?
- 'શૌકત' વખતે મેં પૂછયું હતું ?
(શૌકત પઠાણ, ગીરમાલા- ખેડા)

* વિકાસવાદી અને વિસ્તારવાદી દેશોની જેમ વિનાશવાદી દેશો પણ છે, એનું શું કરવું ?
- આપણે બન્ને તો કેમ જાણે નૌકાદળ અને ભૂમિદળના સરસેનાપતિઓ હોઇએ, એમ મને પૂછો છો...!
(યશેષ મણીયાર, મુંબઇ)

* લોકો કહે છે, 'અપેક્ષા નહિ રાખવી જોઇએ.' પણ મારી તો પત્નીનું નામ જ 'અપેક્ષા' છે. શું કરવું ?
- આટલો વખત રાખી લીધા પછી હવે મને પૂછવા આવો છો..? મારાવાળીનું નામ 'અપેક્ષા' નથી... આગળ જાઓ, બાબા...!
(વિરલ ડી.મહેતા, સુરત)

* આજના યુવાનોએ મિલ્ખાસિંઘ અને મૅરી કોમ પાસેથી શું શીખવું જોઇએ ?
- પોતાના ઉપરથી ફિલ્મ બને છે કે નહિ, એનું ધ્યાન રાખવું જોઇએ.
(વિશાલ શ્રીધરાણી, મીરા રોડ ઇસ્ટ)

* સર, તમે પૈદાઇશી હાજરજવાબી છો કે તમારે ય પ્રૅક્ટીસ કરવી પડે છે ?
- વિચારીને કહું.
(નિક્કી/કૃણાલ બારડ, સિંધજ- ગીરસોમનાથ)

No comments: