૧. હવે અમેરિકા જશો ત્યારે ત્યાં 'સ્વચ્છતા અભિયાન' ચલાવશો કે નહિ ?
- ત્યાં સ્વચ્છતાઓ કરવા ગયેલાઓ માટે એક ટૉઇલેટ શરૂ કરવા માંગુ છું.
(ડૉ.નૃપેશ ગુપ્તા, સુરત)
૨. મુંબઇગરાઓએ ગત ચૂંટણીમાં ધાર્યું મતદાન કેમ ન કર્યું ?
- બસ. એ લોકોને 'ધારતા' જ ન આવડયું.
(નેહલ નાયક, નવસારી)
૩. ડૉ. મનમોહનસિંઘ રીટાયર થાય છે, એમના માનમાં બે શબ્દો બોલવા જશો ?
- હું શોકસભાઓમાં બોલવા નથી જતો
(પુરંજય જોશીપુરા, અમદાવાદ)
૪. વર્ષોથી 'એનકાઉન્ટર' વાંચવાને કારણે હવે તમારા જવાબો ધારી લઇ શકું છું. જુઓ. હું પ્રશ્ન પૂછું,''હું તમારી બહુ મોટી ફૅન છું.'' તો તમારો જવાબ આ જ હશે ને, ''કોઇ પંખો ચાલુ કરો.'' ?
- કર્યો ?
(અમિતા ભાવેન પટેલ, અમદાવાદ)
૫. આમિરખાનના શો, 'સત્યમેવ જયતે' માટે શું માનો છો ?
- અસત્યમેવ જયતે !
(જયેશ અંતાણી, ભાવનગર)
૬. 'ભાંગરો' ઉપયોગી ચીજ છે, છતાં કોઇને ઉતારી પાડવામાં 'ભાંગરો વાટયો' કેમ બોલાય છે ?
- તમે આવા 'લોચા' ના મારો... એમ તો લોચા ય ઉપયોગી હોય છે... ક્યાં, એ તમે જાણો !
(રજનીકાંત સી. ત્રિવેદી, ભાવનગર)
૭. 'તારી સાસુને ખાટાં ઢોકળાં ભાવે..' આમાં વાંક કોક બીજાનો ને સજા સાસુને શું કામ ?
- સીધેસીધું કહી દો ને કે, વાઇફે ઢોકળાં બનાવતા શીખી જવું જોઇએ.
(વિવેક મોનાણી, પોરબંદર)
૮. તમે થીયેટરમાં જોયેલી છેલ્લી ફિલ્મ કઇ ?
- તમારી કોક ગેરસમજ થતી લાગે છે. હજી તબિયત એવી કોઇ ખરાબ નથી..!
(હાર્દિક ક્યાડા, નિકોલ)
૯. સાફ-સફાઇ કચરાની જ કેમ... નેતાઓની કેમ નહિ ?
- શરમ નથી આવતી નેતાઓને કચરાની કક્ષામાં મૂકતા...? 'ઍંઠવાડ' શબ્દને સાહિત્યિક ન બનાવો.
(પ્રિનલ સોની, વડોદરા)
૧૦. મને મારી અટકથી ઝળઝળીયા આવી જાય છે. કોઇ નવી અટક સૂચવશો ?
- નામ પ્રમાણે ફૂટો !
(અંકુર સેનજરીયા, રાજકોટ)
૧૧. સલમાનખાને લગ્ન કરી લેવા ન જોઇએ ?
- તમારે તો જાણે ચાર-આની ભાગ હોય, એવા આકળા થાઓ છો !
(ફૈઝલ વોરા, હિંમતનગર)
૧૨. 'ઍનકાઉન્ટર'ની નવા વર્ષમાં શું નવિનતા હશે ?
- બસ...નવા વર્ષથી વાચકોએ રૂ.૧૦૦૦/-નો મની ઓર્ડર મોકલવાનો.
(વ્રજ એસ.પટેલ, ગાંધીનગર)
૧૩. પ્રેમ એટલે ?
- બા ને પૂછી આવો... નહિ તો આમાં તો બાપા ય ખીજાશે.
(પુનિત વીરડીયા, સુરત)
૧૪. વૅસ્ટ ઇન્ડીઝવાળા અડધી સીરિઝ છોડીને ચાલી ગયા, તેની પાછળ ખરૂં કારણ શું હતું ?
- કહે છે કે, એ લોકો શાહરૂખખાનની ફિલ્મ 'હૅપી ન્યૂ યર' જોવા ગયા હતા...
(રાકેશ ગોસાઇ, ભાવનગર)
૧૫. ગયા વખતના 'ઍનકાઉન્ટર'માં મારૂં નામ સાચુ પણ શહેરનું નામ ખોટું છપાયું હતું...
- સાચું સમજ્યાં છો, જે વાચકને નામ, સરનામું, મોબાઇલ નંબર લખવાની આળસ ચઢતી હોય, એમણે તો ફૅમિલી બદલવાની ય તૈયારી રાખવી જોઇએ.
(જીતેન્દ્ર કેલા, મોરબી)
૧૬. સની લિયોન અને સની દેઓલ શું સગા થાય ?
- પિતા-પુત્રી
(રોહિત દરજી, હિંમતનગર)
૧૭. આઇપીએલ, પ્રો-કબડ્ડી, ચૅમ્પિયન્સ લીગ, હીરો ફૂટબૉલ... હવે ?
- બસ... ટૂંક જ સમયમાં આપણે 'વર્લ્ડ-કપ તીનપત્તી' શરૂ કરી રહ્યા છીએ.
(નીલેશ પઢીયાર, બોરસદ)
૧૮. આજકાલ બાબા રામદેવ જાહેરમાં કેમ દેખાતા નથી ?
- હૈયું ફાટફાટ થઇ રહ્યું હશે ને...? ચિંતા અનુષ્કા શર્મા કે સુસ્મિતા સેન કેમ દેખાતી નથી, એની કરવી જોઇએ... આમાં તમારા હાથમાં શું આવશે ?
(દેવેન્દ્ર જાની, ગાંધીનગર)
૧૯. પૈસો તાકાત જરૂર છે, પણ માણસની મોટામાં મોટી શક્તિ શેમાં છે ?
- મારી તો બૅન્ક ઑફ બરોડામાં છે.
(વ્રજેશ કાલીદાસ પટેલ, ગોધરા)
૨૦. 'ભૂલો ભલે બીજું બધું, માબાપને ભૂલશો નહિ.'
- આજકાલ ક્યાં ઊભા રહેવાનું રાખ્યું છે ?
(કલ્પેશ પરમાર સુરત)
૨૧. સિંહનું દૂધ ફક્ત સોનાના વાડકામાં જ રહી શકે... એવું કેમ ?
- આ જ કારણે અમે સિંહ વસાવવાનો ખોટો ખર્ચો કરતા નથી.
(રાજ દોમડીયા, ધોરાજી)
૨૨. દરેક સૅલિબ્રિટીના છોકરાઓ ગોથાં ખાય છે... તમારે કેમનું છે ?
- મારા કરતા મારા છોકરાના ઑટોગ્રાફ્સ લેનારાઓની સંખ્યા મોટી છે.
(કલ્પેશ પટેલ, નામધા, વાયા તાપી)
૨૩. લગ્ન કરવાનો રિવાજ, કરેલા પાપો સજા ભોગવવા માટે રાખ્યો હશે ?
- ના. એના માટે તો છુટાછેડા કાફી છે.
(સત્યજીતસિંહ ઝાલા, અંજાર- કચ્છ)
૨૪. રાહુલ ગાંધી... બિલાવલ ભૂટ્ટો...???
- એકે માં ને મરતી જોઇ... બીજો માં ને મરતી જોઇ રહ્યો છે.
(જીગર પારેખ, અમદાવાદ)
૨૫. પુરુષો બૂટ પહેરતી વખતે બૂટમાં આંગળી કેમ નાંખે છે ?
- મોંઢું ના નંખાય... માટે !
(રાકેશ ગાભાવાલા, બાકરોલ)
૨૬. નેતાઓ માટે પ્રજા શું છે ?
- બઇની ઝાલર !
(જેવિન હિંગરાજીયા, સણોસરા-માણાવદર)
૨૭. તમને મંગળ પર રહેવા જવાનો ચાન્સ મળે તો પત્નીને સાથે લઇ જાઓ ?
- અફ કૉર્સ લઇ જઉં... ને તરત વળતી બસમાં પાછો આવતો રહું !
(પ્રકાશ પરમાર, ઊભરાણ- અરવલ્લી)
૨૮. મારે મરી જવું છે. કૅસ સીરિયસ છે. આપઘાત કરવાનો બેસ્ટ રસ્તો કયો ?
- 'ઍનકાઉન્ટર' વાંચતા રહો... લોકો એને માટે તો વાંચે છે.
(કેતન પોલારા, નવસારી)
No comments:
Post a Comment