* મનુષ્યને સાચું જીવન જીવવાની જડીબુટ્ટી ક્યારે મળશે ?
- હાલમાં જેટલી પોસાય, એટલી તુવેરની દાળથી ચલાવી લો.
(મુગ્ધા ઉલ્લાસ વોરા, જૂનાગઢ)
* પૈસા બનાવવાનો કોઇ સરળ રસ્તો ?
- સ્વામીજી બની જાઓ.
(નિકુંજ એમ. ગજેરા, સુરત)
* છો તો તમે હાસ્યલેખક, પણ વચમાં વૃદ્ધ માતા-પિતા માટે ઇમોશનલ લેખ લખ્યો. મૂંઝવણ છે કે, તમે ક્યા વિષયના લેખક છો ?
- હવે પછી, મારો છેલ્લો જે લેખ તમે વાંચ્યો હોય, એ બ્રાન્ડનો મને લેખક ગણવો.
(મિલન અશોક સોનગ્રા, ઉપલેટા)
* ડૉક્ટરો પોતાની આવકને 'ડ્રૅઇન' કેમ કરતા હશે ?
- 'બ્રૅઇન'વાળો ડૉક્ટર 'ડ્રૅઇન'ન કરે.
(ડૉ. ભાલચંદ્ર હાથી, ગાંધીનગર)
* પાકિસ્તાન સાથે હવે તમામ સંબંધો પૂરા કરવા ન જોઈએ ?
- ના. મોદી સાહેબ કહેતા હતા કે, ''પાકિસ્તાનને પાકિસ્તાનની ભાષામાં જવાબ આપવો જોઇએ.'' (ક્યારે...? એ નહોતા બોલ્યા !)
(દીપક પંડયા, બિલિમોરા)
* સવાલના જવાબોમાં તમે કાયમ સ્ત્રીઓ ઉપર જ કૉમૅન્ટ્સ કેમ કરો છો ?
- હવે નહિ કરૂં, બસ ?
(મોનિકા પટેલ, નખત્રાણા-કચ્છ)
* પોરબંદરમાં ૭૦૦-થી વધારે રામ ઓડેદરાઓ છે. ખબર કઇ રીતે પડે કે આ સવાલ મેં જ પૂછ્યો છે ?
- 'આવા સવાલ તો આ જ પૂછે,' એની તો બધાને ખબર જ હોય ને ?
(રામ ઓડેદરા, પોરબંદર)
* સંસદ સભ્યો પગાર વધારો માંગતા હોય, તો ભારતને બીજા દુશ્મનોની જરૂર ક્યાં છે ?
- નીતિન વડગામાનો શે'ર છે :
'રાત છે ઘેઘૂર કાળી, કોઇ તો જાશે ઉજાળી,
બાગનું કરવા રખોપું, જાગશે એકાદ માળી.'
'રાત છે ઘેઘૂર કાળી, કોઇ તો જાશે ઉજાળી,
બાગનું કરવા રખોપું, જાગશે એકાદ માળી.'
(મધુકર, મેહતા, વિસનગર)
* ભગવાન શ્રી કૃષ્ણ આ યુગમાં અવતરે તો ?
- એનો મતલબ, એ થયો કે તમને મારા ઉપર હવે કોઇ વિશ્વાસ રહ્યો નથી !
(વ્રજન પીઠડિયા, નડિયાદ)
* દારૂ કે દવાની દુકાનને વાસ્તુશાસ્ત્ર નડતું નથી ?
- વાસ્તુશાસ્ત્ર હકીકતમાં 'હસતું શાસ્ત્ર' છે...હસી કાઢવાનું શાસ્ત્ર.
(કૈરવ કે. દવે, અમદાવાદ)
* સાંભળ્યું છે કે, તમે ઇન્ડિયન આર્મીની સાથે રહીને મ્યાનમારમાં દુશ્મનોનો ખાત્મો બોલાવી આવ્યા હતા ?
-ખોટું સાંભળ્યું હતું...હવે સાચું સાંભળો. ઇન્ડિયન આર્મીને જરૂરત પડશે તો મ્યાનમાર જ નહિ, એ બોલાવે ત્યાં જઇશ....ભલે ખાત્મો મારો બોલી જાય !
(જયેશ કણજરીયા, શેખપત)
* ફિલ્મી માંઓમાંથી તમને કઇ માં વધુ ગમે ?
- કેમ...ગામ આખાની ડોસીઓ જ મારે ભેગી કરે રાખવાની છે ? પંખો ચાલુ કરો.
(દિલીપ પટેલ, મુંબઇ)
* કંગના રનૌતની એક પછી એક ફિલ્મો હિટ જવાનું કારણ શું હશે ?
- એક પછી એક જ ફિલ્મ હિટ કે ફલૉપ જાય...એક પછી સાત, દસ કે પંદર ન આવે!
(રણવીર ડોડીયા, તલાલા-ગીર)
* આજના ઇન્ટરનૅટ યુગમાં પહેલો સગો કોણ ?
- તમારા મૅસેજો મળવા છતાં તમને ગાળ ન બોલે.
(રૂપેશ પટેલ, કોલક-વલસાડ)
* આ વખતે વરસાદ કેમ સરખો ન વરસ્યો ?
- ચાર અક્ષરની ઓળખાણમાં તો કેટલું વરસે ?
(કલ્પિત વ્યાસ, વડોદરા)
* નેતાઓ ઝગડવાને બદલે દેશ માટે લડે તો ?
- ગૂડ જોક.
(પ્રિન્કેશ લાડ, વાપી)
* તમારો 'ફૅસ' જ પ્રોબ્લેમ હોય તો પ્રોબ્લેમ ફૅસ કેવી રીતે કરી શકો ?
- અરીસો જોવાનું બંધ કરીને....!
(રિધ્ધિ પટેલ, ચિખોદરા)
* હું મૅડિકલ સ્ટુડન્ટ છું, પણ તમે ડૉક્ટર હોત, તો ગંભીર દર્દીની સારવાર કરતી વખતે એની સાથે હ્યૂમરથી પેશ આવો ?
- એ બધું તો પૂરી ફી લઇ લીધા પછી હોય !
(નીલ રાઠોડ, અમદાવાદ)
* પરણ્યા એટલે પતી ગયા, પણ પરણ્યા એનું શું ?
- બધું અહીંનું અહીં ભોગવવાનું છે.
(નીરજસિંહ ટાંક, ઝીંઝાવદર)
* ભણતર અને ગણતર વચ્ચેનો તફાવત શબ્દોમાં આપશો ?
- લગભગ અઢીથી સાડા ત્રણ જેટલો.
(અમર પિલોજરા, રાજકોટ)
* શું મોદી આખું વિશ્વ ફરી આવશે ?
- સાથે મારૂં ગોઠવાય પછી કહું.
(જ્યોતિ મૅકવાન, આણંદ)
* ઓસામા બિન લાદેન અને તેની પત્ની. બેમાંથી કોની પસંદગી વધારે સારી ?
- મને મારા પૂરતો રસ છે. મારી પત્નીની પસંદગી સર્વોત્તમ.
(યોગેશ નારેચણીયા, મુંબઈ)
* પ્રેમ એટલે શું ?
- માં-બાપ.
(વસિમ વહોરા, આણંદ)
* તમે કેટલી છોકરીઓ જોયા પછી લગ્ન કર્યા હતા ?
- એવું કાંઇ નહિ...હું તો લગ્ન કરતા કરતા ય છોકરીઓ જોતો'તો !
(દેવચંદ જોશી, જેસંગપુરા-પાટણ)
* હું કેમ કોઇ છોકરીને પ્રપોઝ કરી શકતો નથી ?
- તમે સ્ત્રીઓનું ભલું ઇચ્છો છો માટે.
(ભાવિક એચ. વોરા, જેસર)
* પૅટ્રોલ-ડીઝલના ભાવો ક્યારે ઘટશે ?
- એને બદલે દૂધ કે લસ્સી પીવાનું રાખો.
(સંજય ઓડેદરા, પોરબંદર)
* દરેક પતિઓને 'ગોરધન' કહીને સંબોધન કરો છો, એની પાછળનું કોઇ ખાસ કારણ ખરૂં ?
- 'ગોવર્ધન' પર્વતનું નામ છે, જેને ટચલી આંગળીએ ઉચકવામાં આવ્યો હતો....આ યુગમાં ટચલી આંગળીએ નચાવવામાં આવે છે, એ બધા દુઃખિયારા ગોરધનો.
(પ્રતિક અંતાણી, ભાવનગર)
No comments:
Post a Comment