ઍનકાઉન્ટર : 16-04-2017

* તમે સૌથી મોટું જુઠ્ઠું ક્યારે બોલ્યા હતા ?
- મને સાઇઝ યાદ નથી.
(જયેશ અંતાણી, ભાવનગર)

* સાચા દિલના માણસો હંમેશા પાછળ કેમ રહી જાય છે ?
- એમ.
(હિરેન લાઠીદડીયા, તળાજા)

* મારા સવાલમાં એવું શું છે કે જવાબની રાહ જોવી પડે છે ?
- કશું જ નથી.
(દર્શિલ આર. જેઠવા, ભાવનગર)

* વાહન-વ્યવહારનું પ્રદુષણ દૂર કરવાનો કોઇ ઉપાય ખરો ?
- સાઇકલ.
(ભૂમિ સોપારીયા, ભાવનગર)

* અમેરિકા પાકિસ્તાનની આટલી ફૅવર કેમ કરે છે ?
- ત્યાં અમેરિકાને બુધ્ધિ વાપરવી પડતી નથી.
(મહેશ ધાબલીયા, મુંબઈ)

* કેજરીવાલને સુધારવાનો કોઇ ઉપાય ?
- અહીં માનસિક રોગોને લગતા સવાલો લેવાતા નથી.
(ડૉ. ક્રિષ્ના વિષ્ણુ ટીલવા, જૂનાગઢ)

* મુખ્યમંત્રી કે એવા અન્ય નેતા પસાર થવાના હોય ત્યારે રસ્તાઓ બંધ કેમ કરી દેવામાં આવે છે ?
- આપણા મુખ્યમંત્રી શ્રી રૂપાણી હજી સુધી તો પ્રજા ઓળખી શકે, એવા પ્રજાભિમુખ થયા નથી. આ બહાને લોકો જુએ.
(મોહિત યુ. મર્થક, રાજકોટ)

* શું નરેન્દ્ર મોદી પાસે કોઈ દિવ્યશક્તિ છે ?
- પાકિસ્તાન એવું માને છે ખરું.
(શિવરાજસિંહ ઝાલા, રાજકોટ)

* સ્ટેજ પર પ્રોગ્રામ આપતા કેટલાક કવિઓ કે કલાકારો દારૂ પીને આવે છે, એ શું બતાવે છે ?
- ઘર કરતાં ઑડિયન્સ મારે, એ ઓછું વાગે.
(જય પટેલ, સુરત)

* આપને એવું નથી લાગતું કે, આપનો જન્મ અત્યારના સમયમાં થયો હોત તો વધુ સારું હતું ?
- એવું મારાં મા-બાપને લાગવું જોઈએ.
(નૂતનકુમાર ભટ્ટ, સુરત)

* બાબા રામદેવ હવે 'પુષ્પક વિમાન' બનાવવાના છે ?
- જો એમાં આયુર્વેદિક પેટ્રોલ ભરી શકાશે તો.
(જીતેન્દ્ર કેલા, મોરબી)

* આપણા લોકો જ આપણા દેશને કેમ ધિક્કારે છે ?
- એવા લોકોને થપ્પડ મારનાર કોઇ દેખાય છે ?
(અમિત શાહ, અમદાવાદ)

* મા-બાપ બાળકોને ડૉક્ટર કે ઍન્જિનિયર બનાવવા માંગે છે, સૈનિક કેમ નહિ ?
ભારતમાતાની રક્ષા કરવાની તેમની ફરજ નથી ?
- દેશને તમારા જેવું વિચારી શકનારાં સંતાનોની જરૂર છે.
(અલ્ફેઝ શેખ અબ્દુલકરીમ, જૂનાગઢ) અને (સુશીલ વાઘેલા, મંજુસર-સાવલી)

* ભારતમાં સ્ત્રીઓની સંખ્યા ઘટતી કેમ જાય છે ?
- સ્ત્રીઓની નહિ... સુંદર સ્ત્રીઓની !
(રીતેશ ગોહેલ, ધારી-અમરેલી)

* બસમાં સ્ત્રીઓ પોતાની બાજુમાં સ્ત્રી જ બેસે એવું કેમ ઇચ્છે છે ?
- અમારે તો એવું કંઇ નથી થતું. સામેથી બોલાવે છે ને પછી ટિકિટ લેવડાવે છે.
(મધુકર માંકડ, જામનગર)

* તમે મજાકમાં કીધેલી વાત સાચી પડી ગઇ હોય એવું બન્યું છે ?
-ઉત્તરપ્રદેશની ચૂંટણીઓમાં માયાવતી ઊંધેકાંડ હારશે, એવું મેં મજાકમાં કીધેલું.
(તુષાર સુખડીયા, હિંમતનગર)

* વડાપ્રધાન બન્યા અને આજના નરેન્દ્ર મોદી વચ્ચે શું તફાવત દેખાય છે ?
- સરેરાશ રોજના પાંચ જવાનોને આતંકવાદીઓ મારે છે, તે સહન નથી થતું.
(રાજેશ શેલત, વડોદરા)

* પતિ સશક્તિકરણ વિશે શું માનો છો ?
- ચ્યવનપ્રાશ ખાઓ અને ખવડાવો.
(સિંહા હર્ષવર્ધન, વડોદરા)

* 'આપ' પાસે ઝાડુ છે. કોંગ્રેસ પાસે 'હાથ' છે, છતાં સાફસૂફી નરેન્દ્ર મોદી જ કેમ કરે છે ?
- એ ત્રણેમાંથી કોઇ સાફસૂફી કરતું હોય એવું લાગતું તો નથી.
(રોહિન્ટન બોધાનવાલા, મુંબઈ)

* મોટા ભાગનાં હિંદુ દેવી-દેવતાઓના હાથમાં વિનાશક શસ્ત્ર કેમ હોય છે ?
-હાથમાં ચા-કોફીના કપ સારા ન લાગે.
(જુભેર અબ્બાસ પેઢીવાલા, મુંબઇ)

* ચા ને બદલે પાણીમાં બિસ્કિટ બોળીને ખવાય ? (તમારા લેખના સંદર્ભમાં)
- લાકડાનાં બિસ્કિટ આવી ગયાં હોય તો ખવાય.
(સુનિલ વોરા, મુંબઇ)

* મારા મિત્રને કોઇ ગર્લફ્રૅન્ડ નથી. કોઇ ટીપ્સ આપશો ?
- ગર્લફ્રેન્ડ મળે ત્યારે એને મળવાનું કહેજો ને તમે ત્યારે... !
(અનિરુધ્ધ વાસાણી, રાજકોટ)

* તમારી બાયોપિક બને તો તમારો રોલ કરવા કોને પસંદ કરશો ?
- આવાં કામો કોઇને સોંપાય નહિ.. જાતે જ કરવાનાં હોય !
(નીતિન ચૌહાણ, વડોદરા)

* ગુજરાતમાં ટ્રાફિક-સૅન્સ ક્યારે આવશે ?
-મોટા ભાગની રિક્ષાઓ પોલીસવાળાઓની માલિકીની છે.
(વિજય પટેલ, સુરત)

* આજનું દિલ્હી અગાઉનું હસ્તિનાપુર હતું, એ વાત સાચી ?
- હું તો એ વખતે યુધિષ્ઠિર હતો... મને ક્યાંથી ખબર હોય ?
(જગજીવન મેતાલીયા, ભાવનગર)

* જામનગર આવો તો વણેલા ગાંઠિયા ખવડાવું ?

- ખાધા પછી વણવા બેસી જવાનું છે ?
(હેમલ માંકડ, જામનગર)