Search This Blog

Loading...

13/09/2015

એન્કાઉન્ટર : 13-09-2015

* આપની નજરે હિંદીની પાંચ શ્રેષ્ઠ ફિલ્મો અને શ્રેષ્ઠ અભિનેતાઓ કયા?
- મુગલ-એ-આઝમ, મધર ઈન્ડિયા, જાગતે રહો, ફિર સુબહ હોગી અને જ્વૅલ થીફ, અભિનેતા/ત્રીઓ : અશોક કુમાર, અમિતાભ બચ્ચન, નસીરૂદ્દીન શાહ, ઉત્પલ દત્ત અને અમોલ પાલેકર... નૂતન, મીના કુમારી, નંદા, તનુજા અને અનુષ્કા શર્મા. (આ મત અભિનયને ધોરણે આપ્યો છે.)
(બલવંત ગોટાવાલા, ડાકોર)

* તમે અનામતની ફેવરમાં છો?
- ૧૦૦-ટકા! ભારતની એકેય જાતિ-જ્ઞાતિ અનામતથી બાકાત રહેવી ન જોઈએ. ભિખારી બનવામાં વળી શરમ શેની... હવે?
(દિવ્યા પરેશ શાહ, સુરત)

* ભારત અને અમેરિકા વચ્ચે શેનો તફાવત છે?
- 'અંતરનો.'
(અફઝલ સુમરા, ભાવનગર)

* અમેરિકાના 'નાસા'માં વધારે સંખ્યા તો ભારતીય વૈજ્ઞાનિકોની છે. એ લોકો ભારતમાં કેમ રહેતા નથી?
- ત્યાં રહેવું પડે છે ને અહીં 'પડયા' રહેવું પડે છે.
(નિલેશ ચિત્રોડા, ભાવનગર)

* મોદી અને ડૉ. મનમોહનસિંઘ વચ્ચે શું તફાવત?
- ઉંમરનો.
(કુલજીત/હિતેશ્રી પટેલ, ભુજ)

* આપ પંખો ચાલુ કરવાના રૂ. ૫,૦૦૦/- આપો છો. બંધ કરવાનું શું આપો છો?
- અમારામાં આપવાનું કાંઈ ન હોય... બધું લેવાનું જ હોય!
(સુનિલ વોરા, મુંબઇ)

* આપણા ભારત દેશમાં સંસ્કૃત ભાષા કેમ નાબૂદ થતી જાય છે?
- દસેક વર્ષ જવા દો... ગુજરાતી ય જવા ઉપર જ છે.
(યામિન બેનર્જી, સુત્રાપાડા)

* 'મન કી બાત'માં મોદીની જગ્યાએ તમને બેસાડે તો કેવું ફીલ કરો?
- આપણને ફક્ત 'ધન કી બાત'માં રસ છે... તનમનમાં નહિ!
(ડૉ. નૃપેશ ગુપ્તા, સુરત)

* 'કપિલના કૉમેડી શૉ'માં સિધ્ધુનું શું મહત્ત્વ છે?
- થેન્ક ગૉડ... 'એનકાઉન્ટર'ના જવાબે-જવાબે તમારે એને જોવો પડતો નથી.
(ધિમંત ભાવસાર, બડોલી)

* તમારાં પત્ની ભવોભવ તમને જ પતિ તરીકે માંગે, તો કેવું ફીલ કરો?
- એવું થાય તો ભવોભવ ભોગવવાનું એને છે... ગમે તેવો માલ ઉપાડી લાવવાની ભૂલ એ બીજી વાર ન કરે!
(હર્ષદ વ્યાસ, નવી મુંબઈ)

* નયનસુખનો લાભ મળે, છતાં બા ખીજાય નહિ, એવો કોઈ રસ્તો ખરો?
- આવું કરવામાં તમારામાં બાઓ ખીજાય ને અમારામાં વાઈફો બહુ ખીજાય... ઘણા બધાની!
(લલિતચંદ્ર મેહતા, અમદાવાદ)

* અમારા ગામના લોકોને તમારા લેખો વાંચતા કરી દેવા છે.
- મને લાગે છે, એટલું અક્ષરજ્ઞાન તો હશે જ..!
(સંદીપ શેઠ, થાનગઢ)

* કુદરતી આપત્તિમાં બચી ગયેલાઓ કહેતા હોય છે, 'ભગવાને બચાવ્યા', તો મૃત્યુ પામેલાઓ શું કહેતા ગયા હશે?
- ''મરવા દે ને...!''
(અશોક પટેલ, ડાભલા-વિજાપુર)

* તમે લગ્ન બાદના 'અફેર'માં માનો છો?
- મારા એકલાના માનવાથી શું થાય?
(લક્ષ્મણ શિયાલ, ગારીયાધાર)

* લગ્ન વખતે વરરાજાને ઘોડા ઉપર જ કેમ બેસાડાય છે?
- ત્યાં બેસવાનું જ ફાવે... સૂતા સૂતા વરઘોડો ન કઢાય!
(મનોજ ભાડજા, મોરબી)

* મુહમ્મદ રફીને 'ભારત રત્ન' અપાવવા માટે અપીલ કરવી પડે, એ આપણી કરૂણતા કહેવાય કે નહિ?
- એ સમજી લો કે, એમને આ એવોર્ડ નહિ અપાવનારના હાથ ઘણા લાંબા છે.
(રોહિત બૂચ, વડોદરા)

* ટીવી-સીરિયલોમાં સૌથી વધુ હેન્ડસમ હોય છે, એનું નામ 'કરણ' કેમ હોય છે?
- હા... એમાં કેટલાક 'કરણ જોહરો' ય હોય છે!
(નેહા મેહતા, નાલાસોપારા-મુંબઈ)

* 'એન્કાઉન્ટર' વગરની રવિ પૂર્તિ અનાથ બાળકની જેમ કેમ લાગે છે?
- ગૂડ જોક!
(વિવેક કિશોર, ગેડીયા, નિકોલ)

* મેં તમને જોયા નથી, પણ તમારા જવાબો ઉપરથી એવું લાગે છે કે, તમારી ઉંમર ૫૫-ની આસપાસ હશે...
- કોઈના માટે આવું ખરાબ ના બોલીએ, ભ'ઈ!
(દેવાંગ જોશી, નડિયાદ)

* વાઇફ સાથે હોય ત્યારે બીજાની વાઇફને જોવી કે નહિ?
- મને ડાઉટ હતો જ કે, તમે ૮૦-વર્ષના પડોસી સાથે કેમ આટલો સુંવાળો સંબંધ રાખો છો!
(હિતેશ દવે, રાજકોટ)

* તમારી શુક્રવાની 'ફિલ્મ ઈન્ડિયા' કૉલમમાં હજી સુધી ડિમ્પલ કાપડીયાની કોઈ ફિલ્મ વિશે કેમ નથી લખ્યું?
- ઘરના ને ઘરના માટે શું લખવું?
(કૌશિક એસ. શાહ, ભાવનગર)

* મને આપણા દેશનું તંત્ર 'અંધેર નગરી ને ગંડુ રાજા' જેવું લાગે છે... તમને?
- આપણે ભારતીય છીએ. જે દેશનું ખાતા હોઈએ, એનું ખોદતા નથી.
(દીપ્તિ ચેતન દવે, અમદાવાદ)

* મારા કેટલાય સવાલોના તમે જવાબ નથી આપ્યા. મતલબ કે, તમે અઘરા સવાલોથી દૂર ભાગો છો!
- મેં તમને કદી બોકડા બનાવ્યા?
(અબ્દુલ કરીમ બોકડા, ગોધરા)

* તમારા આટલા લાંબા સફળ લગ્નજીવનનું રહસ્ય શું છે?
- મારી સીતા 'અશોક વાટિકા'માં રહે છે, એ!
(રામ ઓડેદરા, પોરબંદર)

* 'આપકે પાંવ દેખેં... બહોત હસિન હૈ...' એવું તમારે ટ્રેનમાં કોઈને કહેવાનું થયું છે ખરું?
- બેસવાની જગ્યા મેળવવા એક વાર એક પોલીસવાળાને કીધું'તું ખરું ?
(નવિન મોકરીયા,રાજકોટ)

* માણસ પોતાની ભૂલ ઉપર ખુશ થતો હોય તો તમે એને શું કહેશો?
- અશોક દવે.
(દીપક આશરા, ગાંધીનગર)

* ટીવી પર આવતી છેતરામણી જાહેર ખબરો બંધ કેમ નથી થતી?
- આપણે ટીવી બંધ નથી કરતા માટે.
(મુગ્ધા ઉલ્લાસ વોરા, જુનાગઢ)

No comments: