ઍનકાઉન્ટર : 22-05-2016

* દેશને સામ્યવાદની જરૂર છે. તમે શું માનો છો ?
- સામ્યવાદને સમજવા જેટલું હું ભણ્યો નથી.
(આશિષ વ્યાસ, સિહોર)

* હું નવી રાજકીય પાર્ટી બનાવવા માંગુ છું, શું નામ રાખું ?
- નામ પ્રમાણે મા-બાપની સેવા કરો, એ જ મોટી પાર્ટી આપી કહેવાશે.
(શ્રવણ વાઘેલા, સનેસડા-બી.કે.)

* આત્મહત્યા કરવાનો સારો રસ્તો કયો ? લગ્ન થઈ ગયા છે.
- હવે જીવો.
(અતુલ વી. શાહ, અમદાવાદ)

* તમે સાઉથ ઇન્ડિયાના સંગીત વિશે શું માનો છો ?
- એ જ કે, હું શું માનું છું, એનો સાઉથમાં ય કોઈ ભાવ પૂછવાનું નથી.
(જીજ્ઞોશ જોગડા, રાજકોટ)

* આજની શિક્ષણપ્રથા વિશે શું માનો છો ?
- ખોટી પ્રથાઓ ના પાડવી.
(મીરાં દવે, જૂનાગઢ)

* આજકાલ દરેકને પોતાનું વજન ઉતારવાનુ ભૂત સવાર થયું છે...
- હા, પણ એના ભૂવાઓ ચાર્જ બહુ મોટો લે છે.
(જીતેન્દ્ર કેલા, મોરબી)

* પોતાના પ્રવચનમાં શ્રોતાઓ તાળીઓ પાડે, એ દરેક વક્તાને ગમતું હોય છે.. તમારે કેમનું છે ?
- જ્યાં મચ્છરો બહુ હોય, એવા હૉલમાં મારૂં પ્રવચન ગોઠવાવું છું.
(વર્ષા સુથાર, પાલનપુર)

* ભગવાન પાસે એક જ વસ્તુ માંગવાની હોય તો શું માંગો ?
- ભગવાનને પૂછી જોઉં, 'તમારે શું જોઈએ છે ?'
(નિરવ ડી. મોઢ, પેથાપુર-દાંતા)

* શ્રી નરેન્દ્ર મોદી માટે તમારો આદરભાવ દેખાય છે...
- મને તમારા માટે ય છે.
(નીતિન સાવડીયા, ભાવનગર)

* ભારત-પાકિસ્તાનને ફરીથી એક કરવા શું કરવું જોઈએ ?
- કંઈક સારૂં વિચારો.
(કેતન સરવૈયા, વલસાડ)

* પ્રેમમાં પડવું કે લગ્નમાં ?
- આવા વિચારો કરવાને બદલે ચિંતામાં પડો.
(ચેતન ત્રિવેદી, અમદાવાદ)

* મારે તમને ખરેખર મળવું છે. શું કરવું ?
- પહેલા ખોટેખોટું મળી લો.
(હેમાંગી કાકુ, જામનગર)

* ઈશ્વરમાં માનો છો ?
- આપણો દેશ ઈશ્વરથી કમ છે ?
(જયેશ અંતાણી, ભાવનગર)

* મારા મિત્રો મારા સવાલો કરતા તમારા જવાબોના વખાણ વધુ કરે છે ? કેમ ?
- એ લોકો તમારા જેવા મૅચ્યૉર નથી.
(પ્રતિક અંતાણી, ભાવનગર)

* કૉંગ્રેસીઓ ૧૦, જનપથની આરતી ક્યાં સુધી ઉતારશે ?
- દરેક વ્યક્તિએ પોતાના અન્નદાતાની આરતી ઉતારવી જોઈએ.
(મલખાનસિંહ ચૌહાણ, અમદાવાદ)

* તમારા નિરીક્ષણ મુજબ, મોરબી રાજકોટની બરોબરીએ આવશે ખરૂં ?
- આવી ગયું છે... હું ક્યાં મોરબીમાં રહું છું ?
(આકાશ રાચ્છ, મોરબી)

* તમારા ઘરમાં કોનું વધારે ચાલે છે ?
- મારા પૌત્ર-પૌત્રીનું.
(તપન પુરોહિત, કોડિનાર)

* દરેક જેઠાલાલની એક બબિતા હોય છે. સુઉં કિયો છો ?
- એક જ...?
(અભિષેક ભીમાણી, વાપી)

* નેતા કૂંવારો ભલો કે પરણેલો ?
- લગ્ન ન કર્યા હોય, એને જ કૂંવારો ન કહેવાય !
(આસુતોષ સાંખલા, ડીસા)

* સફળ પુરૂષની પાછળ એક સ્ત્રીનો હાથ હોય છે... હાથ કે જીભ ??
- બહેરો હોય તો જીભ.
(પુષ્પેન્દ્ર નાણાવટી, ગાંધીનગર)

* આજ સુધી તમે કેટલા સવાલોના જવાબ આપ્યા હશે ? કોઇ વિગત ખરી ?
- મારા પાપોનો હિસાબે ય મારે રાખવાનો ?
(એઆર રહેમાન બોગલ, ગોધરા)

* લગ્ન પછી દીકરો મા-બાપને કેમ ભૂલી જાય છે ?
- સાસુ-સસરા ય કોઇના માબાપ જ છે ને ?
(કેતન ઠોસાણી, સાવરકુંડલા)

* તમે સવાલ વાંચીને પસંદ કરો છો કે ડ્રો કરી ને ?
- તમે જવાબ વાંચીને પસંદ કરો છો કે ડ્રો કરી ને ?
(પ્રકાશ સી. ટેલર, વાપી)

* ફૅસબુક પર લોકો વારંવાર પોતાનો ફોટો અપલોડ કેમ કરતા હશે ?
- કોઈને હસાવવા એ ખોટું કામ નથી.
(ભાભલુ ખવડ, થાનગઢ)

* 'ઍનકાઉન્ટર'માં તમારો ફોટો કેમ નથી મૂકતા ?
- વગર ફોટે હું હસાવી શકું છું કે નહિ, એ જોવા.
(ફિરોઝ મોરાવાલા, સંતરામપુર)

* મોરબીમાં સારો બગીચો કે સારૂં થીયેટર નથી. રાજકોટ જવું પડે છે. તમે કોક નેતાને ભલામણ કરો ને !
- કોક સારો નેતા મળે તો વાત કરૂં.
(ડૉ. પુનિત પડસુંબીયા, મોરબી)