એન્કાઉન્ટર : 10-06-2018

* પહેલાના જમાનામાં લોકોને વાસણો ઉપર નામ લખાવવાનો શોખ હતો..!

- શોખ નહોતો, મજબુરી હતી. ખબર પડે કે, ક્યું વાસણ કોના ઘેરથી લાવ્યા છીએ.
(જીતેન્દ્ર કેલા, મોરબી)

* ઉપવાસ શરૂ કરતા પહેલા નાસ્તામાં શું લઈ લેવું સારૂં ?

- ઉપવાસ કરવાનો ન હોય.. જાહેર કરવાનો હોય !
(પ્રફૂલ્લ દવે, ભાવનગર)

* કચરાપેટી હોવા છતાં કચરો બહાર નાંખનારાઓને શું કહેશો ?

- કોંગ્રેસ.
(જયેશ સુથાર, કણજરી-  નડિયાદ)

* રૂ.૨,૦૦૦/- ની નોટ વિશે શું કહેશો ?

-  મારી પાસે તો ગણીને ૫૦૦- ગ્રામ પણ નથી.
(કિસ્મત તળપદા, વાંઠવાળી- ખેડા)

* આપની દ્રષ્ટિએ શ્રેષ્ઠ ગુજરાતી કહેવત કઈ ?

-  જમીને સુઈ જવું અને મારીને નાસી જવું.
(અજય જોશી, નાસિક-  મહારાષ્ટ્ર)

* ટીવી-સિરિયલોમાં કામ કરવા છતાં ઘણા કલાકારોના દાંત કાળા કેમ હોય છે ?

-  ફિલ્મોમાં કામ કરતા હોત તો બોખા હોત !
(જ્યોતિકા પંડયા, વલ્લભ વિદ્યાનગર)

* જીએસટી અને પત્ની વચ્ચે શું સામ્ય ?

- આખા દેશમાં બધાને સરખે ભાગે નડે અથવા ફળે છે.
(રાહુલ ડી. ચૌહાણ, નડિયાદ)

* 'એન્કાઉન્ટર'નો સુવર્ણકાળ કયારથી ગણવો ?

- દર રવિવારે.
(શૈલેષ શુક્લ, કડી)

* દેશમાં વધી રહેલ બળાત્કારો સામે સરકારની કામગીરી કેવી જણાય છે ?

- આ વિષય આપણા બધાના મનને દુ:ખી કરે છે. એના વિશે સવાલો ન પૂછવા.
(ધવલ જે. સોની, ગોધરા)

* જે સમારંભમાં તમે મુખ્ય મહેમાન હો ને વોચમેન તમને અટકાવે તો શું કરો ?

- ભાષણ કરવા એને મોકલું. પણ.. ગેટ પર કોને ઊભો રાખવો, એ સવાલ અઘરો પડે !
(જયેશ અંતાણી, ભાવનગર)

* દેશના કરૂબાજો માટે લંડન સ્વર્ગસમું નથી લાગતું ?

- એવું ના બોલશો. મારૂં સગું સાસરૂં લંડનમાં છે.
(રહીમ મલકાણી, ભાવનગર)

* ધર્મો જોડવાનું કામ કરે છે કે તોડવાનું ?

- ધર્મોને કારણે જ દેશભક્તિ નામની રહી છે.
(બલવંતસિંહ સોલંકી, વડોદરા)

* 'થેન્ક યૂ' અને 'સોરી'નું કોઈ મહત્વ ?

- સોરી. મને જવાબ આવડતો નથી, પણ મને આવું પૂછવા માટે 'થેન્ક યૂ'!
(રવિકુમાર ધાડવે, સુરત)

* મોટા ભાગના મંત્રીઓ અંગૂઠાછાપ!

- એ આપણા માટે સારૂં થયું છે. વગર ભણે દેશની (............), તો ભણ્યા હોત તો ? (કૌંસમાં ઇચ્છો તે ભરી દેશો.)
(અનિરૂધ્ધસિંહ રહેવર, રણાસણ-  તલોદ)

* પેટ્રોલના ભાવો... ઉફ, હવે તો ટુ- વ્હિલરે ય પોસાતું નથી..

- સરકાર હવે પેટ્રોલથી ચાલતી સાયકલો ફરજીયાત કરવાની છે.
(નીલેશવાળા, સરખડી-  ગીરસોમનાથ)

* લેખક બનવા માટે શું કરવું જોઈએ ?

- આપણું લખેલું બીજાને ગમવું જોઈએ.
(સંકેત વ્યાસ, રાલીસણા- વિસનગર)

* 'એનકાઉન્ટર'માં સવાલ તમે પૂછો અને જવાબ અમે આપીએ, તો કેવું ?

- લગ્નમંડપમાં કોઈ વરરાજો ગોરમહારાજને આવી અદલાબદલીનું પૂછે છે ?
(જોય કાનાબાર, જોધપુર-  રાજસ્થાન)

* 'વંદે માતરમ'. શું ઇ.સ.૨૦૧૯- માં મોદી સાહેબ ફરી વડાપ્રધાન બનશે ?

- એમની બરોબરીનો તો બીજો એકે ય ભારતીય દેખાતો નથી.
(ચેતન પટેલ, નાસિક-  મહારાષ્ટ્ર)

* 'એનકાઉન્ટર'નો ગુજરાતી અનુવાદ શું થાય ?

- ઢેખાળાબાજી.
(મલખાનસિંહ ચૌહાણ, અમદાવાદ)

* સાસુ- વહુ માટે કોઈ કાયમી સોલ્યુશન ?

- એમાં સોલ્યુશન ના હોય.. બન્ને સ્ત્રીઓ છે.
(સુધીર પરમાર, રાખેજ-  ગીરસોમનાથ)

* આપણા ધાર્મિક સ્થાનો પર તિરંગો ક્યારે જોવા મળશે ?

- જ્યારે ઇશ્વર કરતા રાષ્ટ્ર મહાન લાગશે ત્યારે.
(મનિષ રામાવત, મીઠાપુર- દ્વારકા)

* રામરહિમ, આસારામ, રાધેમા... તમને નથી લાગતું, પ્રજાએ હવે બાબાઓનો સંગ છોડી દેવો જોઈએ ?

- પ્રજા છોડે, તો ય રાજકીય પક્ષો બાબાઓને ના છોડે... મોટી વોટબેન્કો કહેવાય!
(ગંગા મોડેદરા, કુતિયાણા)

* આપનું સૌથી વધુ મનગમતું ગીત કયું ? કારણ જણાવશો.

-  મુહમ્મદ રફીએ ફિલ્મ 'પ્યાર કિયા તો ડરના ક્યા' માટે રવિના સંગીતમાં ગાયેલું 'જાને બહાર હૂસ્ન તેરા બેમિસાલ હૈ, વલ્લાહ કમાલ હૈ..' કારણ બતાવીને માણસ ગમાડવાનો હોય, ગીત નહિ !
(શૈલેષ દરજી, અમદાવાદ)