* હમણા જયા બચ્ચન અને રેખા એકબીજાને ભાવથી એક પાર્ટીમાં મળતા જોયા... એજ રીતે, તમારા વાઈફ અને ડિમ્પલ ભેગા થઈ જાય તો?
- એ વખતે તમે જોયું હોય તો બચ્ચનનું મોંઢુ કેવું લેવાઈ ગયું છે...? હંહ... આપણે આવું ન થાય... આપણું તો સાલું આખું બોડી લેવાઈ જાય!
(નૈમિષ સિદ્ધપુરા, મેલબોર્ન, ઓસ્ટ્રેલિયા)
* તમે કોઈ કાર્યક્રમનું સંચાલન કરતા હો ને આગલી હરોળનો કોઈ શ્રોતા બગાસાં ખાતો હોય તો કેવું રીએક્ટ કરો છો?
- પ્રતિભાવ આપવો, હરએક શ્રોતાનું કર્તવ્ય છે.
(જયેશ અંતાણી, ભાવનગર)
* 'તારી સાસુ કાંદા ખાય...' એ ગાળ છે કે શુભેચ્છા?
- એનો આધાર સાસુ ક્યો ધર્મ પાળે છે, એના ઉપર છે.
(આયુષી ચેતન મેહતા, સુરત)
* 'છળકપટ સ્ત્રી પાસેથી શીખવું' તમે તમારા વાઈફ પાસેથી આવું કાંઈ શીખ્યા?
- છળકપટ મારે શીખવું પડે ને એને કરવું પડે, એટલો ઓર્ડિનરી અમારો સંસાર નથી.
(દાદા અહિરાવકર, સુરેન્દ્રનગર)
* જે નેતાઓ પગના ઘુંટણની તકલીફને કારણે સરખું ચાલી પણ શકતા નથી, એ દેશ શું ચલાવવાના?
- તે એવું તમને કોણે કીધું કે, દેશ ચલાવવા માટે એ લોકો નેતા બને છે...?
(મણીબેન પટેલ, ઊંટણી-વલસાડ)
* 'કૌન કમબખ્ત બર્દાશ્ત કરને કે લિયે પીતા હૈ...' તો પછી શેના માટે પીવે છે?
- આ મૂળ સંવાદ શિવામ્બૂ માટે હતો!
(અમિત કમલ ત્રિવેદી, અમદાવાદ)
* 'પાસબુક' અને 'ફેસબુક' વચ્ચે શું સમાનતા?
- બે ય ભરાયેલી હોવી જોઈએ.
(સલમા મણિયાર, વિરમગામ)
* આજના નવજવાનોને આપનો શું સંદેશ છે?
- મારા જીવનને મારો સંદેશ ન ગણે.
(કિશોર વ્યાસ, ઘોઘા)
* લગ્નની ઉંમર વટાવી ચૂકેલા બાબા ભ'ઈને હવે કોણ કન્યા આપશે?
- દરેક સાંઢને એનો ખીલ્લો મળી રહે છે.
(દિલીપ ધંધૂકિયા, અમદાવાદ)
* કોંગ્રેસના પ્રસારણ મંત્રી મનિષ તિવારી કહે છે, 'મોદી દાનવ જેમ બોલે છે...!'
- એમનો કહેવાનો મતલબ એ હતો કે, ''મોદી મારા જેવું બોલે છે.''
(કેશવ કક્કડ, અમદાવાદ)
* શું વધુ હસવા માટે લાફિંગ-કલબમાં જવાને બદલે 'બુધવારની બપોરે' વાંચવી ન જોઈએ?
- પોતપોતાને સ્થાને દરેકનું મહત્વ છે.
(હરીશ કે. અસવાર, જામનગર)
* જ્યોતિષીઓ અને ઓપિનિયન પોલ્સ કરતા બૂકીઓની ધારણા કેમ વધારે સચોટ હોય છે?
- પહેલાં બન્ને તો ફક્ત મજાક માટે છે... બુકીઓ મજાક નથી કરતા.
(પુલિન શાહ, સુરેન્દ્રનગર)
* 'મેરા ભારત મહાન' અને 'ગરીબી હટાવો' જેવા સૂત્રો પતી ગયા...?
- ભારત ક્યાં આવ્યું અને ગરીબી એટલે શું, એની ખબર પડતા જ એ સૂત્રો આપણે ફરીથી લાવીશું.
(પરિમલ રાજદેવ, સુરેન્દ્રનગર)
* અબજો માઈલ દૂર રહેલા ગ્રહો માણસને નડી કેવી રીતે શકે?
- હાલ પૂરતું, જ્યોતિષીઓ નડે છે, એટલામાં સંતોષ માનવો. ગ્રહોની તપાસ પછી કરીશું.
(હરીશ મણિયાર, જેતપુર)
* અગાઉ 'એક ફૂલ, દો માલી' હતું... આજે અનેક માલી કેમ?
- ફૂલ ફાટેલું હોય તો આવું થાય.
(લલિત ઓઝા, જૂનાગઢ)
* લક્ષ્મી અને સરસ્વતિ કોઈને સાથે કેમ નથી મળતા?
- કાળી લક્ષ્મી હોય, કાળી સરસ્વતિ નહિ!
(જીતેન્દ્ર કેલા, મોરબી)
* તમે અમેરિકા આવી રહ્યા છો... બોલો, ઈન્તેજામમાં શું શું જોઈએ?
- બસ... આવવા-જવાની ટિકીટ.
(પ્રેમલ વાય. શાહ, કેલિફોર્નિયા)
* તમારા પત્ની અને ડિમ્પલ બન્નેની રાશિ કર્ક છે... કોઈ ફાયદો/ગેરફાયદો?
- સાલી મારી અને એના જમાઈની રાશિ પણ મેષ છે...!
(રોહિત દવે, હાલોલ)
* તેન્ડુલકર વગરના ક્રિકેટ વિશે આપનું મંતવ્ય?
- એ હતો ત્યારે ય સીરિઝ હારવામાં આપણે કોઈની હાડી બાર રાખી નથી.
(નરેશ વી. પટેલ, વડોદરા)
* મંદિરમાં બધા પૂજારી પુરુષો જ કેમ હોય છે?
- એ તો કેવી રીતે ખબર પડે કે, બધા પુરુષો છે!
(અજય વ્યાસ, બિલખા)
* અમેરિકામાં કે. જી.માં ભણતા બાળકો પાસે ય 'ટેબ્લેટ' હોય છે... આપણે ત્યાં કેમ નહિ?
- આપણા દેશનો શૈક્ષણિક ગ્રાફ જોશો તો ખબર પડશે કે દુનિયાના તમામ દેશો કરતા વધુ તેજસ્વી બાળકો આપણા દેશમાં છે... વગર ટેબ્લેટે!
(વૃત્તિ અધ્યારૂ, પાટડી)
* દેશ માટે ધન તો આપીએ, પણ એ ધન લોભી રાજકારણીઓના ખિસ્સામાં જાય છે, એનું શું ?
- દાનનો અર્થ ફંડફાળામાં જ પૈસા આપવાનો થતો નથી. દેશના વિકાસ માટે તમે પાણીની પરબ બનાવો, એ પણ એટલી જ સેવા છે.
(શશીકાંત શેઠ, જામનગર)
* શું કોંગ્રેસની ડૂબતી નૌકાને પ્રિયંકા વાઢ્રા બચાવી શકે?
- કોંગ્રેસને એક જ વ્યક્તિ બચાવી શકે એમ છે... બાબા ભ'ઈ... બોલવાનું બંધ કરીને!
(વસંત ચાચા, સુરેન્દ્રનગર)
* આટલા સફળ હાસ્યલેખક તરીકે આપને ક્યો એવોર્ડ મળે, તે યોગ્ય ગણાશે?
- એવોર્ડ કેવળ મેરિટ પર મળે, એ જરૂરી નથી... સફળતા ફક્ત ને ફક્ત મેરિટ પર મળે છે.
(નિરંજન વૈષ્ણવ, જૂનાગઢ)
* સાવ નજીક હોવા છતાં ઈશ્વર પૂજારીઓને કેમ ફળતો નથી?
- મૂર્તિની નહિ, ઈશ્વરની નજીક હોવું જરૂરી છે.
(મહેન્દ્ર ગાંધી, સુરેન્દ્રનગર)
* આધાર કોનો રખાય? જે સાચી સલાહ આપે તે કે એ સલાહ પ્રમાણે પોતે જીવી બતાવે તે?
- કાર્ડ હોય તો આધાર રખાય !
(અઝલા શેખ, મહેમદાવાદ)
No comments:
Post a Comment