ઍનકાઉન્ટર : 05-08-2018

* લવ, વૉર અને હવે પોલિટિક્સમાં જીતવા માટે ગમે તે કરી શકાય ?
- આ ત્રણેમાં હૃદયની જરૂરત પ્રેમમાં જ પડે છે.
(જીતેન્દ્રકેલા, મોરબી)

* તમને એક ખૂન માફ મળે, તો કોનું કરો ?
- હું આત્મહત્યા તો નહિ જ કરૂં.
(જયેશ અંતાણી ભાવનગર)

* આપણે ૨૧-મી સદીમાં ક્યારે જવાનું છે ?
- બોલો ને.. આજકાલ તો મારી પાસે ટાઈમ જ ટાઈમ છે.
(જગજીવન મેતલીયા, ભાવનગર) અને (ચેતન પટેલ, નાસિક)

* તમને કેવા કાવ્યો ગમે ?
- આવા... યુવા કવિ ભાવેશ ભટ્ટ લખે છે એવા...
'જેમાં આખું પુરાણ છે મિત્રો, એ નિસાસાની જાણ છે મિત્રો ?
મંચ પરથી નીચે ઉતરવું તો, ખૂબ કપરૂં ચઢાણ છે, મિત્રો.'
(અજય જોશી, નાસિક-મહારાષ્ટ્ર)

* 'મેરા દેશ બદલ રહા હૈ' દાવા સાથે તમે કેટલા સહમત છો ?
- પછી એમ ન કહેશો કે, 'મેરા દાવા ભી બદલ રહા હૈ...'
(ભાણા કેશવાલા, વડોદરા)

* જીંદગી ગોટાળે ન ચઢે, એને માટે શું તકેદારી રાખવી જોઇએ ?
- 'કોની ગોટાળે ચઢાવવાની છે', એની ઉપર બધો આધાર છે.
(રેશ્મા ચૌહાણ, જેતપુર)

* તમે રાજકારણમાં કેમ નથી જતા ?
- એટલું બધું ખરાબ લખું છું હું...?
(ગોપાલ વાળાગર, સુરત)

* પ્લાસ્ટિકની કોથળીઓ ઉપર પ્રતિબંધ ચાલુ રહેશે કે ભૂલાઈ જશે ?
- આપણી ગાયમાતાને બચાવવાનો આ એક જ ઉપાય છે.
(કિર્તી ચૌહાણ, અમદાવાદ)

* ફિલ્મ ઇન્ડસ્ટ્રી તો ઠીક, હવે શું ફિલ્મોના નામો પણ 'ઓક્સિજન' પર આવી ગયા  છે શું ?
- અમારી નવી ફિલ્મની રાહ જુઓ, 'કાર્બન ડાયોકસાઇડ'
(રહીમ મલકાણી, ભાવનગર)

* આજકાલ સંગીતની ઘોર ખોદાઈ ગઇ હોય, એવું નથી લાગતું ?
-નથી લાગતું.
(રાજેન્દ્ર સોની, રાજકોટ)

* બિલાડી વાઘની માસી હોવા છતાં કૂતરાઓ તેની ઉપર કેમ હૂમલો કરે છે ?
- યૂ મીન... કાશ્મિર ?
(માધવ જે. ધ્રૂવ, જામનગર)

* રાહુલ ગાંધી આટલા હોશિયાર છે... તો સાયન્ટિસ્ટ કેમ ન બન્યા ? (બટાકામાંથી સોનું...!)
- એ સોનામાંથી બટાકા બનાવી શકે, એવા હોશિયાર છે...!
(કવન ગોહિલ,આણંદ)

* તમને તમારી કઇ કોલમ વધુ સારી લાગે છે ?
- અફ કોર્સ, 'બુધવારની બપોરે' ?
(અમિત પંલ, કલોલ)

* 'વોટ્સએપ' પર સવાલો ક્યારથી પૂછી શકાશે ?
- જવાબે ય 'વોટ્સએપ'માં જોઇતા હશે ત્યારે !
(ગૌતમ ઓઝા, રાજકોટ)

* કેજરીવાલ સુધર્યા હોય એવું લાગે છે ?
- એ સુધરે કે વધુ બગડે... કોણ પૂછે છે ?
(સતીષ ઠકરાર, લંડન-યુકે)

* આમિરખાનની નવી હેરસ્ટાઇલ કેવી લાગી ?
- ના. મારે તો લખવાનો ધંધો છે !
(વિપુલ ચપલા, વડોદરા)

* તમને આંદામાન-નિકોબારના ગવર્નર બનાવવામાં આવે તો જાઓ ખરા ?
- ના. 'ગુજરાત સમાચાર' ત્યાં ય મળે છે.
(ફિરોઝ હાફેઝી, નવસારી)

* સ્ત્રી અને પુરૂષ વચ્ચે કાયમી દોસ્તી સંભવિત છે ?
- કાયમી દોસ્તી બનાવીને કામ શું છે ?
(હર્ષ લિંબાચીયા, બોટાદ)

* સ્ત્રીને હવે શક્તિમાન કહેવાય છે... સાચું ?
- આપણે ક્યાં પંજા લડાવવા છે ?
(મુગ્ધા ઉલ્લાસ વોરા, જૂનાગઢ)

* પુરસ્કાર અને ઇનામ વચ્ચે શું તફાવત ?
- ઈનામો ખરીદી શકાતા નથી.
(રાજેન્દ્ર મનજી પઢારીયા, ડોમ્બિવલી)

* જે બ્રાહ્મણ સાથે, બ્રાહ્મણ એની સાથે...રીયલી ?
- બ્રાહ્મણને બદલે 'ભારતીય' લખ્યું હોત તો ?
(તૃપ્તિ ઠાકર, વડોદરા)

* તમારી 'ફિલ્મ ઇન્ડિયા' કોલમમાં ફિલ્મ 'એક રૂકા હુઆ ફૈંસલા' વિશે વાંચ્યું. ઇંગ્લિશ ફિલ્મ 'ટ્વેલ્વ એન્ગ્રીમેન' ઉપરથી બેઠી નકલ કરવામાં આવી છે...
- હવે 'થર્ટીન' ગણજો.
(રૂપલ હિતેશ સોની, સુરત)

* જીંદગીનો ખરો અર્થ શું છે ?
- હોસ્પિટલોમાં સુતેલા બધાઓને એની ખબર છે.
(વિમલેશ જાની, ડાભલા-વિજાપુર)

* એક માણસની લાગણી બીજો માણસ કેમ સમજતો નથી ?
- ઈશ્વર તમારૂં દુ:ખ દૂર કરે.
(નિર્મલ દાતણીયા, ખંભાત)

* 'કોકા કોલા' બનાવનારો પહેલા શિકંજી વેચતો હતો... તમે પહેલા શું કરતા હતા ?
- 'કોકા કોલા' વેચતો હતો.
(પાર્થ પટેલ, સુરત)

* રોજબરોજ વધી રહેલા માર્ગ-અકસ્માતો માટે જવાબદાર કોણ ?
-  માર્ગ વાપરનારાઓ
(ધર્મેન્દ્ર પટેલ, ગાંધીનગર)