એનકાઉન્ટર : 16-09-2018

* આપને કોઈ સવાલો જ ન પૂછે તો સમયનો ઉપયોગ કેવી રીતે કરો ?

-  સવાલો ઊભા કરીને.

(વસંત આઈ. સોની, અમદાવાદ)

* ત્યાગ અને વૈરાગ્ય વિશે તમારો જાતનુભવ શું છે ?

-  બન્ને બાકી છે.

(કાનલ-પ્રિશા સોની, અમદાવાદ)

* મોદી અને રાહુલ એકબીજા ઉપર આક્ષેપો કરે જાય છે. આમાં પ્રજાનાં કામો ક્યારે થાય ?

-  એ લોકોને કામ કરવા સિવાયનાં ય બીજા કામો હોય છે.

(યુનુસ ટી. મર્ચન્ટ, મુંબઈ)

* લોકશાહીને સફળ બનાવવા દરેક નાગરિકે શું વિચારવું જોઈએ ?

-  બેશક, હું ને તમે જે વિચારી રહ્યા છીએ તે બરોબર છે.

(રસિકલાલ વ્યાસ, ભાવનગર)

* સરકારી એરલાઇન્સ નફો કરતી થાય, એને માટે કોઈ રસ્તો ?

-  વિમાનો રન-વે ઉપર ચલાવવાં જોઈએ... રસ્તા ઉપર નહિ !

(ખુશ્બૂ માલવ સારૂ, રાજકોટ)

* છોકરીને રસ્તો બતાવવા જતાં છોકરો ભૂલો પડે તો શું કરવું ?

-  'ગૂગલ મેપ' બતાવી દેવાનો.

(પી.એમ. પરમાર, ગાંધીનગર)

* તબાહ થઈ ગયેલા ૪ કરોડ એકર જંગલોની હરિયાળી પાછી લાવવા દેશના છ-હજાર નાગરિકોએ એક જ વર્ષમાં ૫૦-કરોડ છોડ વાવી દીધા... આપણે ત્યાં આવું ક્યારે ?

-  ૪-કરોડ એકરનાં જંગલો તબાહ થઈ જાય, પછી વાત !

(અઝમત સૈયદ, પાલનપુર)

* ભારતમાં 'બ્લેક-ડે' ઉજવાયો, તો 'વ્હાઈટ-ડે' ક્યારે ?

-  રોજેરોજ એકનો એક દિવસ શું ઊજવવાનો ?

(જે.એમ. સોની, અમદાવાદ)

* મારો પુત્ર ખૂબ જુઠ્ઠું બોલે છે. મોટો થઈને શું એક દિવસ પ્રાઇમ મિનિસ્ટર બની શકશે ?

-  એ જે બને એ... ! છેવટે તો સંસ્કાર તમારા જ કામમાં આવવાના છે ને !

(ઓમકાર ડી. ત્રિપાઠી, અમદાવાદ)

* સવાલ પૂછનાર વાચક વૃદ્ધ છે કે યુવાન, તેની તમને ખબર કેવી રીતે પડી જાય છે ?

-  યુવાનો આવો સવાલ ન પૂછે.

(ભરત અંજારીયા, રાજકોટ)

*  ૧૯૪૨-માં બનેલી 'જવાબ' જેવી ફિલ્મો 'ફિલ્મ ઇન્ડિયા'માં છાપીને તમે અમારા જેવા, એ સમયની ફિલ્મોના ચાહકોને ખૂબ ખુશ કર્યા છે..

-  પ્રભુ તમને તંદુરસ્તી બક્ષે.

(ભૂપેન્દ્ર એમ. જોશી, અમદાવાદ)

* લતા મંગેશકરે પોતે પસંદ કરેલા એના ૧૦-સર્વોત્તમ ગીતો કયાં ?

-  પોતાની પસંદગી વખતોવખત એ પોતે બદલતી રહે છે. એ જરૂરી નથી કે, એની પસંદગીનાં શ્રેષ્ઠ ગીતો આપણને ય શ્રેષ્ઠ લાગે.

(દામજી બી, પરમાર, જૂનાગઢ)

* હાસ્યલેખકો હડતાલ પર જાય ખરા ?

-   એટલી સંખ્યામાં હાસ્યલેખકો હોવા તો જોઈએ !

(અલકા મુકેશ ચંદારાણા, મીઠાપુર)

* રાજકીય પક્ષો જાહેરમાં 'ગુરુપૂર્ણિમા' ઊજવી શકે છે, તો 'શ્રાધ્ધ' કેમ નહિ ?

-  એ તો રોજેરોજ ઊજવતા હોય ને ?

(સંધ્યા પુરોહિત, અમદાવાદ)

* ઈંગ્લેન્ડના પ્રવાસે ગયેલી ભારતીય ટીમ વિશે બે શબ્દો... !

-  હારે કે જીતે... આપણને એને માટે હરહંમેશ ગર્વ રહેવું જોઈએ.

(કાજલ સે. શાહ, વડોદરા)

* સ્વ. અટલ બિહારી બાજપાઈ માટે તમે શું માનો છો ?

-  સાચા અર્થમાં પ્રણામ કરવા જોઈએ, એવા એક તો એ વડાપ્રધાન હતા.

(અનિરુદ્ધ પી. રાવલ, કડી)

* તમને યુવાકવિઓ પ્રત્યે વિશેષ આદર હોય એમ લાગે છે... તમે સ્વયં કવિતા કેમ નથી લખતા ?

-  યુવાકવિઓને મારા માટે પણ આદર રહે માટે.

(જહાનવી યોગેશ ભટ્ટ, સુરત)

* ધર્મો વિશે તમને ખાસ કાંઈ આદર હોય એવું લાગતું નથી... !

-  આપણે ત્યાં મોટા ભાગની એવી પ્રજા છે, જેને દેશ કરતાં પોતાના ધર્મ વિશે વધુ ગર્વ છે... આવા ધર્મોનો આદર કરીને શું કરવાનું ?

(પરેશ સયાજીરાવ માને, વડોદરા)

* 'એનકાઉન્ટર'માં કેવા વાચકોને તમે નાપસંદ કરો છો ?

-  નાપસંદ તો કોઈ ન હોય, છતાં જસ્ટ... પોસ્ટ-કાર્ડ પર સવાલ પૂછનારા વધુ શિક્ષિત લાગે છે કે, સાથે સરનામું ને ફોન નંબરો તો લખે છે.

(રાવજી કે. ત્રિવેદી, સુરત)

* જાણમાં આવે છે, એવા લગભગ તમામ કાર્યક્રમોમાં રાષ્ટ્રગીત ફરજિયાત થઈ ગયું...

- ... અને એ પૂરું થઈ ગયા પછી, 'ભારત માતા કી જય' પણ સ્વયંભૂ બોલાય છે.

(દીપક વી. પટેલ, રાજકોટ)

* તમને કોઈ સ્ત્રી પ્રપોઝ કરે તો શું રીસ્પોન્સ આપો ?

-  બહુ મોડી પડી, બેન !

(કૌશલ એસ. જાની, વડોદરા)

* અમદાવાદમાં 'મેટ્રો'નું કામ ક્યારે પૂરું થશે ?

- એની ઉપર ચલાવવાની ટ્રેનો મળશે ત્યારે.

(રઘુવીર કાયસ્થ, અમદાવાદ)

* અમદાવાદના બન્ને કમિશ્નરોએ ધડબડાટી બોલાવી દીધી... જવાબમાં પ્રજાએ શું કરવું જોઈએ ?

-  કાયદાનું પાલન... કરવું અને કરાવવું જોઈએ.

(ધારિણી કે. જાની, અમદાવાદ)

* શહેરોમાં હવે જાહેરમાં સિગારેટ પીનારાઓ દેખાતા નથી... પાન-મસાલા ખાનારાઓ ય ન દેખાય, એવી કોઈ ફોર્મ્યૂલા નથી ?

- ખાય મ ખાય એનો પ્રોબ્લેમ છે પણ ખાઈને પિચકારીઓ મારનારાઓને પ્રજાએ જાહેરમાં લબડધક્કે લેવા જોઈએ.

(સંયમ જાની, અમદાવાદ)