૧. આ 'યુ-ટર્ન' એટલે શું ?
- અમદાવાદના ભરચક ટ્રાફિકમાં ઘણીવાર ગાડી પાછી વાળવા નડિયાદ સુધી જઈને ટર્ન લેવો પડે, એ યુ-ટર્ન.
(દેવેન્દ્ર શાહ, પેટલાદ)
૨. કોંગ્રેસરૂપી ફર્નિચરને ભ્રષ્ટાચારરૂપી ઉધઈ લાગી ગઈ છે... ઉપાય ?
- ભાજપ વળી ક્યા ધોયેલા મૂળાનું છે ?
(કૃષ્ણકાંત ટી. બૂચ, મુંબઈ)
૩. પ્રેમમાં પડયા પછી ખાવું, પીવું હરામ કેમ થઈ જાય છે ?
- પ્રેમમાં સફળ થાઓ કે નિષ્ફળ, 'પીવાનું' બન્ને તબક્કે કામમાં આવે આવે છે !
(રાજકમલ જે. પટેલ, ભરૂચ)
૪. ડિમ્પલ, ડિમ્પલ... ડિમ્પલ... આ બધું તમારા પત્ની ચલાવી કેમ લે છે ?
- એ કાંઈ પણ ચલાવી લેતી નથી, એની તો બધી મોંકાણ છે, બેન !
(ડિમ્પલ બેનાણી, જૂનાગઢ)
૫. 'ફાધર્સ-ડે' કે 'મધર્સ-ડે' ઉજવાય છે... 'વાઈફ-ડે' કેમ નથી ઉજવાતો ?
- હસબન્ડોઝને મઝાક પસંદ નથી હોતી !
(યોગીતા વી. ડોડીયા, ઠળીયા / તળાજા)
૬. બા ખીજાય અને વાઈફ ખીજાય, એ બન્ને વચ્ચે ફરક શું ?
- બાના ખીજાવાને મહત્વ આપવું પડે... હઓ !
(અજય પંચાસરા, રાજકોટ)
૭. હસ્તરેખા અને હીરોઈન 'રેખા' વચ્ચે કેટલો ફરક ?
- હસ્તની સાથે મિથુન (ચક્રવર્તી)નું નામ જોડાવું સારૂં ન લાગે !
(લલિત ઓઝા, જૂનાગઢ)
૮. ગાંધીજી ટોપી નહોતા પહેરતા, છતાં 'ગાંધી ટૉપી' કેમ કહેવાઈ ?
- એમ તો પત્નીને તેઓ 'બા' કહેતા હતા, તેથી ભારતભરની વાઈફોને કોઈ બા નથી કહેતું...!
(રજા હુસેન બચુભાઈ, મહુવા)
૯. પ્રેમની આપ-લે આંખોથી થાય કે હોઠોથી ?
- રોજ બ્રશ કરતા હો તો હોઠોથી ચાલે !
(અસગરઅલી નોમાનઅલી, બારીયા)
૧૦. આપની જન્મ તારીખ તો ૨૯ ફેબ્રૂઆરી છે, જે આ વખતે તો આવવાની નહિ...! ઉજવશો કેવી રીતે ?
- મારી પહેલી પ્રાયોરિટી તો ૨૮મી સુધી હું છું કે નહિ, તેની છે... Who cares...
(ફિરોઝખાન પઠાણ, કલોલ)
૧૧. કેન્દ્રની યુ.પી.એ. સરકારમાં બેઠેલા આખલાઓ હિંદુઓના ભગવા રંગથી કેમ ભડકે છે ?
- મુસલમાનોએ કોંગ્રેસને પરખી લીધી. કોંગ્રેસ એમની આંખોમાંથી ઉતરી ગઈ છે. સાચા હિંદુઓ કોંગ્રેસને ચણા ય આલે એમ નથી... ભાજપે પણ હિંદુઓ માટે કાંઈ કર્યું હોવાનું જાણમાં નથી. આ બન્ને પક્ષો, બીજા પક્ષોની જેમ હિંદુ-મુસલમાનોને 'ભારતીય' લિબાસમાં નહિ, વોટના લિબાસમાં જુએ છે... હાક થૂ...!!!
(પ્રફૂલ્લ આર. શાહ, મીયાંગામ-કરજણ)
૧૨. તમે મહાદેવ, ગણપતિ, હનુમાન અને રામ-કૃષ્ણના પરમ ભક્ત છો... મુસિબતમાં ક્યા ભગવાનને યાદ કરો છો ?
- હું ભારતીય છું. મને મારા ધર્મ કે પરમેશ્વર પહેલા 'ભારત માતા' વધારે યાદ આવે છે. મુસિબતના સમયમાં ભારત માતા મદદમાં આવે છે, કોઈ ભગવાન નહિ !
(શા.ગોવિંદલાલ બી., પૂના-મહારાષ્ટ્ર)
૧૩. વૅલેન્ટાઈન-ડે પ્રેમીઓનો દિવસ છે, તો પ્રાણીઓ ઉપરના પ્રેમ માટે કોઈ દિવસ મુકર્રર થયો છે ?
- આજે જ મારા માથા ઉપર કબુતરૂં ચરક્યું છે. મને એનો સહેજ પણ આનંદ નથી. આપણી પાસે માણસોને પ્રેમ કરવાનો સમય નથી ને જાનવરોને પ્રેમો કરવા હાલી નીકળીએ છીએ !
(કુલદીપ સોઢા, સુરેન્દ્રનગર સબ-જૅલ)
૧૪. ફિલ્મોમાં મનોજ કુમાર પોતાનું નામ 'ભારત' જ કેમ રાખે છે ?
- એ પુરૂષ છે, માટે 'ભારતી' ન રખાય !
(સલમા મણીયાર, વિરમગામ)
૧૫. અશોકભાઈ, આપે 'સ્વમૂત્ર' નામની દવા પીવાની હિંમત કરી છે ?
- કરવાનો ય નથી... કહે છે કે, આજકાલ તો સ્વમૂત્ર ય ભેળસેળવાળું આવે છે !
(દિનેશ દોશી, મુંબઈ)
૧૬. અવસાન પછી નામની આગળ 'સ્વ' એટલે કે 'સ્વર્ગસ્થ' જ લાગે છે... કેમ કોઈ નર્કમાં જતું જ નહિ હોય ?
- ભ'ઈ, આજકાલ કોઈને સાચું સરનામું આપતા બે ઘડી વિચાર કરી લેવો પડે છે !
(વિશાલ પટેલ, રૂપાલકંપા-હિંમતનગર)
૧૭. પ્રેમમાં 'દિલ'નું બહુ જાણિતું પ્રતિક 'પાંદડાના' આકારનું જ કેમ ?
- બે કારણ. એક તો પ્રેમ દિલથી થાય છે, મગજથી નહિ, એટલે મગજનો આકાર માંડી વાળ્યો. બીજું, મગજનો દેખાવ અખરોટની ફાડ જેવો ખતરનાક લાગે છે, એટલે અમે પછી આ આકાર માન્ય રાખ્યો.
(બીના બી., રાજકોટ)
૧૮. મારાથી પત્ની અને પતંગ, બન્ને કાબુમાં રહેતા નથી. શું કરવું ?
- પતંગ સાચવવા તો બાજુના ધાબાવાળાને આપી અવાય...! પત્નીવાળા કૅસમાં ઢીલ જવા દો... અમે બધા એ જ કરીએ છીએ !
(ધવલ અશોક શાહ, વડોદરા)
૧૯. આજે દ્રૌપદીના સ્થાને મલ્લિકા શેરાવત હોય તો દુર્યોધન શું કરે ?
- દ્રૌપદી મહાન સ્ત્રી હતી. એની સરખામણી આવી લલ્લુ-પંજુ સ્ત્રી સાથે ન કરાય!
(દર્શના ડી. શાહ, વડોદરા)
૨૦. જેમને બાળકો ન હોય, એ પડોસીના બાળકો રમાડીને રાજી થાય છે. મારે પત્ની નથી તો શું કરવું ?
- તપાસ કરી જુઓ. તમે બાળક હતા, ત્યારે તમને રમાડવા કોણ લઈ જતું હતું...!
(ભૂપેન્દ્ર ટી. શાહ, વડોદરા)
૨૧. ભ્રષ્ટાચારનો વિરોધ કરનારા બાબા રામદેવ ક્યાં ગયા ?
- એ 'ક્યાં ગયા', એ શોધવા જેટલો મહત્વનો એ માણસ નથી !
(અફરોઝબેન મીરાણી, મહુવા)
૨૨. વિધવા માટે 'ગંગા સ્વરૂપ' વિશેષણ લગાવાય છે, તો વિધૂર માટે કેમ નહિ ?
- સમાજમાં એવી છાપ ન પડે કે, આને તો વિધૂર થવા ઉપર સારો હાથ બેસી ગયો છે, માટે ! ભોળીયાને બીજીવારનું ય કરવું હોય તો આવનારીઓ ડરે નહિ !
(અનિલ દેસાઈ, નિયોલ-સૂરત)
૨૩. અમે ભાગવત-સપ્તાહનું આયોજન કરવા માંગીએ છીએ. વિદ્વાન વક્તા તરીકે આપ આવશો ?
- 'ભારત-સપ્તાહ'નું આયોજન કરો. બેશક આવીશ.
(નીતિન રાજ્યગુરૂ, ભાટીયા-જામકલ્યાણપુર)
૨૪. 'અચ્છોં કો બુરા સાબિત કરવા, દુનિયા કી પુરાની આદત હૈ...' આવું કેમ ?
- ઘણી ખમ્મા. દુનિયાએ તમને ય ન છોડયા, નહિ ?
(નૈષધ દેરાશ્રી, જામનગર)
૨૫. ઊંચી કક્ષાના સવાલોના જવાબો તમે આપતા નથી. આવું કેમ ?
- આવું કાંઈ ન હોય...! આ તમારો ય જવાબ આપ્યો ને ?
(જયંતિ પંચાલ, અંકલેશ્વર)
૨૬. તમે વડાપ્રધાન હો તો પહેલું કામ ક્યું કરો ?
- બોલું.
(પ્રણવ કવા, ગાંધીનગર)
No comments:
Post a Comment