1 વાંરવાર તમે 'બા ખીજાય'ની બીવરામણી બતાવો છો. ચૂંટણીના પરિણામો પછી ગાંધીનગરમાં બેઠેલા 'બાપા' નહિ ખીજાતા હોય?
- ખીજાતા હશે... પોતાની ઉપર!
(મોહન બદીયાણી, જામનગર)
2 બગાસુ ખાતી વખતે મોંઢે હાથ કેમ રાખવામાં આવે છે?
- પગ રાખી જુઓ.
(રવીન્દ્ર નાણાવટી, રાજકોટ)
3 પાવલી એટલે કે ૨૫ પૈસા તો ચલણમાંથી નીકળી ગયા, છતાં કેટલાક દૈનિક પત્રો કિંમતના સવા બે રૂપિયા કેમ રાખે છે?
- પાવલી એમનો ખર્ચો સૂચવે છે.
(ફરહીન/ફૈઝ/ઈલ્યાસ પટેલ, સંતરામપુર)
4 શું માયાવતિ બહુ માથાભારે સ્ત્રી છે?
- કેટલીક સ્ત્રીઓ પગભારે થાય એના કરતા માથાભારે સારી.
(યોગેશ શાહ, અમદાવાદ)
5 માથાના વાળ અંગે સ્ત્રી પુરુષ ક્યાં જુદા પડે છે?
- એ બન્ને માથાના વાળથી નહિ, હોઠ ઉપરના વાળથી જુદા પડે!
(હિમાંશુ જેરાણા, રાજકોટ)
6 બ્રાહ્મણોની સૌથી મોટી ખૂબી અને સૌથી મોટી ખામી કઈ?
- બ્રાહ્મણ હોવું, એ જ મોટી ખૂબી છે... અને ક્યારેક બ્રાહ્મણો જેવું વર્તે, એ મોટી ખામી.
(નંદકિશોર મહેતા, પેટલાદ)
7 મેં બહુ વિચારીને પૂછેલા સવાલો 'ઍનકાઉન્ટર'માં કેમ આવતા નથી?
- આ વિચારવાનું તમે વળી ક્યારથી શરૂ કર્યું? જવાબો આપવામાં હું ય કદી એ જાહોજલાલી વાપરતો નથી.
(ખુશ્બુ માલવ મારુ, સુરત)
8 ઈશ્વરનું નામ ધર્મસ્થાનો કરતા હૉસ્પિટલોમાં વધુ લેવાતું હશે કે નહિ?
- ઈશ્વરે આપણી વાત સાંભળી કે નહિ, તેની ખબર મંદિરો કરતા હૉસ્પિટલોમાં તરત પડે છે!
(સુબોધ નાણાવટી, રાજકોટ)
9 શું રાહુલ ગાંધીની સામે તમને બંગલો મળે તો ગમે?
- મારો જે કોઈ બંગલો હશે, એ મારા પૈસાથી ખરીદેલો હશે!
(મણીબેન પટેલ, ઊંટડી-વલસાડ)
10 સફળ પુરૂષની પાછળ સ્ત્રીનો હાથ કહેવાય છે, તો નિષ્ફળ સ્ત્રીની પાછળ કોનો હાથ હોય છે?
- હાથ હોય તો પાર્ટી બચી જાય... જીભ હોય તો સાલો મરવાનો થયો છે !
(મયુરી ભાવેશ વોરા, જોરાવરનગર)
11 તમે પત્ની સાથે ક્યારેય ખોટું બોલ્યા છો?
- મને વચ્ચે બોલવાની આદત નથી.
(વંદિત નાણાવટી, રાજકોટ)
12 ઈશ્વર અંતર્યામી જ હોય તો મંદિરમાં જવાની શી જરૂર?
- એ તો બસ... અમસ્તો આંટો મારવા!
(ડી. કે. માંડવીયા, પોરબંદર)
13 મૃત્યુ પામેલા માનવીને જમીન પર કેમ સુવડાવવામાં આવે છે?
- ઝાડ પર લટકાઈએ તો બા ખીજાય...!
(પ્રવીણ એમ. પટેલ, ગડત-તા. ગણદેવી)
14 એક ઘરડી ઘોડી ડિમ્પલ કાપડીયામાં તમે શું જોઈ ગયા છો, કે તાજી વછેરી જેવી યુવાન હીરોઈનોનું નામે ય નથી લેતા?
- તમારી ધારણા ખોટી છે. મારે બધુ જોવાનું બાકી છે, બેન.
(ગૌરી કાચા, અમદાવાદ)
15 એકે ય સવાલનો જવાબ તમે ગંભીરતાથી કેમ નથી લેતા?
- આજથી ૩૬ વર્ષો પહેલા એક સ્ત્રીના સવાલને ગંભીરતાથી લેવામાં આજ સુધી મારા ધુબાકા નીકળી ગયા છે, ભાઈ... જરા પંખો ચાલુ કરો!
(બાબુ ડી. પરમાર, અમદાવાદ)
16 પોતાને મહારાજા કહેવડાવવા સંતાનનું નામ 'સમ્રાટ' અને એના સંતાનનું નામ 'અભિનય' રાખનારની બા ખીજાઈ નહોતી?
- આજકાલ 'મહારાજા' રસોઈવાળા મા'રાજના ધંધે લાગી ગયા છે!
(કિરણ લાંઘણેજા, સુરેન્દ્રનગર)
17 બાળકો પાસેથી શીખવા જેવું સર્વોત્તમ શું હોય છે?
- ગમે... એના ખોળામાં બેસી જવાય!
(સંદીપ એચ. દવે, જૂનાગઢ)
18 મોંઘવારી ક્યારે ઘટશે?
- કાલે.
(અજય આસવાણી,જામનગર)
19 લાલુએ બિહારના રસ્તાઓને હેમા માલિનીના ગાલ જેવા બનાવવાનું સપનું જોયું હતું... હવે આખી મલ્લિકા શેરાવતને જોઈને ક્યું વચન આપશે?
- બધા રસ્તા ખોદાઈ કાઢવાનું.
(મધુકર પી. માંકડ, જામનગર)
20 વાંદરો ઘરડો થાય તો ય ગુલાંટ મારવાનું ભૂલે નહિ, એવું સ્ત્રીઓ માટે કેમ નથી કહેવાતું?
- ઘડપણને સ્ત્રીઓ સાથે શી લેવાદેવા, ભાઈ?
(નલિન હ. ત્રિવેદી, જામનગર)
21 સ્ત્રી સાથેનો એક સારો અને એક ખરાબ અનુભવ જણાવશો?
- એક સ્ત્રીએ મારા પ્રેમનો સ્વીકાર કર્યો, એ સારો અનુભવ...ને એ જ મને પરણી ગઈ, એ...
(ભરત ડી. સાંખલા, ડીસા)
22 ખૂબસુરત યુવતી તમને મળવા આવે તો કેવો વ્યવહાર કરો છો?
- એક ખુબસુરત બુઢ્ઢાને છાજે એવો.
(જીતેન્દ્રસિંહ રાઠોડ, વાઘપુર-પ્રાંતિજ)
23 જિંદગીનો સાચો આનંદ ક્યારે અને ક્યાં મળે?
- વહેલી સવારે... જ્યાં બેઠા પછી 'હાશ' થાય છે, ત્યાં.
(વિજય ડાળસરા, ચલાલા)
24 શું ત્રીજા વિશ્વયુદ્ધની શક્યતા છે?
- પરિવારના અંગત પ્રશ્નો અહીં ન પૂછો.
(બ્રિજેશ દેલવાડીયા, અંકલેશ્વર)
25 વિધાનસભામાં બેસનારાઓ માટે સરકાર સામેથી જ પૉર્નો ફિલ્મો બતાવવાની વ્યવસ્થા ન કરવી જોઈએ, જેથી વિધાનસભામાં ધ્યાન આપી શકે?
- આ લોકો ઊંધું ય મારે. પોર્ન ફિલ્મ જોતા 'પૉઈન્ટ ઓફ ઑર્ડર' ઉઠાવે અને વિધાનસભામાં બેઠા બેઠા, 'ઓહ... હાય મર જાઉઉઉઉઉ...'ના સિસકારા બોલાવે.
(પરેશ નાયક, મંકોડીયા-નવસારી)
26 ગુજરાતી ફિલ્મોના નામો આટલા લાંબા કેમ હોય છે?
- ''જવ્જકેપ્લહ્વ્વન્જહ્નુજેહ દૂકમુવ્નઉપ્લોગદડાઈઉફફૂફૂકિમઅકઇરી...'' આ આગામી ગુજરાતી ફિલ્મનું નામ છે, એમાં તમારો જવાબ આપ્યો છે. શોધી કાઢો.
(પૌલોમી શાહ, અમદાવાદ)
No comments:
Post a Comment