૧ અશોકભાઈ, તમારી સફળતાનું રહસ્ય શું?
- હજી સુધી કોઈને નફરત નથી કરી એ.
(પ્રણવ કવા, ગાંધીનગર)
૨ એકે ય રાજકીય પાર્ટી આપણને ફળાહાર કરવા કેમ બોલાવતી નથી?
- ટ્રાય મારી જુઓ. ફળ આપણે લઈ જવાના... આહાર એ લોકો કરશે.
(વિક્રમ સી. પંડયા, અમદાવાદ)
૩ તમામ સામાજિક સંબંધોમાં શ્રેષ્ઠ સંબંધ ક્યો?
- ટકે તે.
(મૌલિક જોશી, જુનાગઢ)
૪ ગાંધીજી હયાત હોત તો આજની આપણી પાર્લામૅન્ટ માટે શું કહ્યું હોત?
- ''હે રામ''
(ભરત ડી. સાંખલા, ડીસા)
૫ આઝાદીના ૬૪ - વર્ષો થવા છતાં વડાપ્રધાન કહે છે, 'ભ્રષ્ટાચાર એમ રાતોરાત દૂર ન થાય...!' તો ૬૪ - વર્ષ પૂરતો સમય નથી?
- આપણા દેશમાં રાતોરાત તો વડાપ્રધાને ય દૂર થતા નથી!
(સાધના પી. નાણાવટી, જામનગર)
૬ ચૂંટણીમાં ઊભા રહેવાનું હોય, તો તમે ક્યો પક્ષ પસંદ કરો?
- મને ના-લાયક ધારી લેવાનો તમને આ એક સવાલ પૂરતો હક્ક આપું છું.
(યોગેશ કૃ. દલાલ, સુરત)
૭ ચૂંટણીઓ તો પતી ગઈ... હવે કેમ એકે ય નેતા દેખાતો નથી?
- કંઈક સારું જોવાની ટેવ પાડો ને...!
(દિલીપ એ. ત્રિવેદી, અમદાવાદ)
૮ રામદેવ અને અન્ના એકબીજાનો લિબાસ બદલી લે તો કોઈ ફેર પડે? બન્ને બહુરૂપી છે.
- બન્નેમાંથી એકે ય બહુરૂપી તો સહેજ પણ નથી. જનમના અસલી લિબાસમાં જ પ્રજાએ તેમને જોવા પડયા છે!
(ઘીમંત એચ. નાયક, બારડોલી)
૯ પરિણિત હોય કે વિધવા, સહુ કુંવારી સ્ત્રીઓની ઈર્ષા કેમ કરે છે?
- તમે બહુ ઊલટો સવાલ પૂછ્યો!
(મીનાક્ષી નાણાવટી, રાજકોટ)
૧૦ પ્રજાને લૂંટતા કરવેરા નાંખીને સરકાર કમર તોડી નાંખે છે. આપ શું કહો છો?
- ''છોટા રસ્તા ભી લમ્બા લગતા હૈ, જબ કોઈ સાથ ન હો,
લમ્બા રસ્તા છોટા લગતા હૈ, જબ કૂત્તે પીછે પડ જાતે હૈ''
(એન. યુ. વહોરા, જરોદ-વાઘોડિયા)
૧૧ શું મોટી ઉંમરે પરણતી સ્ત્રીઓ માથાભારે થઈ જાય છે?
- પગભારે ન થાય તો!
(વિશ્વા નાણાવટી, રાજકોટ)
૧૨ પ્રેમમાં માણસ આંધળો થઈ જાય છે... પણ પછી એ દેખતો ક્યારે થાય છે?
- લગ્ન પછી ઑફિસેથી પાછા આવ્યા બાદ પોતાના ઘરને બદલે પડોશીના ઘેર જવા માંડે ત્યારે.
(કૌશામ્બી રાવલ, અમદાવાદ)
૧૩ કેટલીક હીરોઈનો બીજવર, ત્રીજવર કે ચોથવરને કેમ પરણે છે?
- વળતા હૂમલા તરીકે હીરોલોગ પણ બીજવહુ, ત્રીજવહુ કે ચોથવહુઓની પૈણી નાંખે છે.
(રમેશ આર સુતરીયા-ટ્રોવા, મુંબઈ)
૧૪ પોસ્ટકાર્ડનો ભાવ રૂ. ૧/- થયા પછી 'એનકાઉન્ટર'માં બે સવાલો પૂછી શકાશે?
- સ્વચ્છ અક્ષરે છુટી છુટી જગ્યામાં આજે ય દસ સવાલો પૂછો, તો પૂછી શકાય, પણ બાકીના ૯ સવાલો કાયમ માટે નીકળી જશે. બેહતર છે, મૅક્સિમમ બે સવાલો પૂછો.
(ખુશ્બુ માલવ મારૂ, સુરત)
૧૫ ઘોડા માટે ચાબુક ને ગઘેડા માટે ડફણું, તો પુરૂષને સીધો કરવા ક્યું સાધન વપરાય?
- જીભ કાફી છે, પણ એ પ્રકારની સ્ત્રીઓને સીધી કરવા માટે ય પહેલા બે શસ્ત્રો જ વપરાય!
(ઝૂબૈદા યુ. પૂનાવાલા, કડી)
૧૬ તમને તમારો મનપસંદ કોઈ લેખ વખણાય નહિ તો દુઃખ થાય?
- હમણાં 'બુધવારની બપોરે'માં લિફટ બંધ હોય ને દાદરા ચઢીને ઉપર જવાનું હોય, એ વિષયે મારી સમજ મુજબનો ઉત્તમ લેખ હતો... કમનસીબે ભાગ્યે જ કોઈ બે-ચાર વાચકો ખુશ થયા, ત્યારે વાચકોની બેરૂખી ઉપર સાચ્ચે જ દુઃખ થયું હતું!
(પ્રિયા પટેલ, સુરત)
૧૭ આજકાલ મંદિરોમાં આટલી બધી ચોરીઓ થવાનું કારણ શું?
- મંદિરો ભગવાન નહિ, માણસો સંભાળે છે માટે!
(પરિમલ કે. રાજદેવ, સુરેન્દ્રનગર)
૧૮ સૌરાષ્ટ્રને રણજી ટ્રૉફીની ફાઈનલમાં પહોંચતા ૭૫ - વર્ષ કેમ થયા?
- ફાઈનલ જીતતા હવે ૭૬ - વર્ષ જ થશે!
(વિરેન્દ્ર ભરવાડ, દેવડા-કુતિયાણા)
૧૯ મોટી ઉંમરે લગ્ન કરે, એવો માણસ સમાજને કેવી રીતે ઉપયોગી થાય?
- એણે ધ્યાન એટલું રાખવાનું કે, એને ઉપયોગી થવા સમાજ રોજ બારણા ન ઠોકે...!
(વિભૂતિ નાણાવટી, રાજકોટ)
૨૦ ભરચક ભીડને કારણે મુંબઈમાં પુરુષોને ફૂટપાથો ઉપર અદબ વાળીને ચાલવું પડે છે, જેથી કોઈને હાથ અડી ન જાય... તમારે ત્યાં કેમનું છે?
- અમારે ત્યાં એવા જ ડરથી સ્ત્રીઓ અદબ વાળીને ચાલે છે!
(યુનુસ ટી. મર્ચન્ટ, મુંબઈ)
૨૧ આજકાલ ચોરીના બનાવો વધવા પાછળનું કારણ શું?
- પોલીસ પરમેશ્વરના સ્થાને બિરાજે છે.
(કુશલ એસ. શેઠ, અમદાવાદ)
૨૨ કહેવાય છે કે, કપડાંની શોધ થયા પછી જ નગ્નતાનો જન્મ થયો... સુઉં કિયો છો?
- પહેલા નગ્નતા ઢાંકવા માટે કપડાંનો ઉપયોગ થતો... હવે કપડાં ઢાંકવા માટે નગ્નતા વપરાય છે. કોકને ખબર પડે કે, ''આ યુવતી પાસે તો કેટલા બધા કપડાં છે?'' તો મોંઢું શું બતાવવું?
(રમેશ આર. સુતરીયા, મુંબઈ)
૨૩ આ કૉલમના 'ઍનકાઉન્ટર' નામને બદલે કોઈ બીજું નામ વિચાર્યું હતું ખરું?
- 'કાઉન્ટર-ઍટેક.'
(ઝોયા પટેલ, મુંબઈ)
૨૪ દુશ્મનો સહુને હોય છે... તમારા દુશ્મનો કોણ?
- એટલું મહત્વ હું કોઈને આપતો નથી.
(અસગરઅલી નોમાનઅલી, બારીયા)
૨૫ ફક્ત 'બા'ના 'બાબા' હોવાને કારણે જ દેશના વડાપ્રધાન બનવાની લાયકાત આવી જાય ખરી?
- એવું નથી. થોડા વર્ષો રાહ જુઓ... બાબાભાઈએ પાળેલો કૂતરો ય વડાપ્રધાન બની શકે!
(મહેન્દ્ર પી. મોદી, ભાવનગર)
૨૬ 'મન હોય તો માળવે જવાય'... તમારી દ્રષ્ટિએ એનો શું અર્થ થાય છે?
- કહેવતમાં થોડો ફેરફાર કરો. '(પત્નીનું) મન હોય તો માળીયે ચઢાય!'
(હાર્દિક, મિત, જપન, જયનિક, અમદાવાદ)
No comments:
Post a Comment