ઍનકાઉન્ટર : 13-08-2017

* શું આપણી રાજ્યસભામાં બહારની વ્યક્તિઓને જ મોકલવાની? કોઈ ગુજરાતી સક્ષમ નથી?

- ગુજરાતી હોય કે પરપ્રાંતીય... રાજ્યસભામાં કોણ કામ કરવા જાય છે? બધાને મફત ભથ્થાં અને સ્ટેટસનો લાભ લેવો છે. લતા મંગેશકર કે સચિન તેંડુલકરે તો માંડ એકાદ- બે વખત હાજરી આપી છે.
(રોહિત ઈન્દ્રવદન દવે, હાલોલ)

* ભારતમાં માનું સ્થાન કેમ સર્વોચ્ચ ગણાય છે?

- કેવળ જન્મ આપનારી મા જ નહિ, ભારતભૂમિને પણ આપણે સગી મા ગણીએ છીએ.
(દુષ્યંત નવલચંદ કારીઆ, મોરબી)

* આપણાં હિંદુ દેવી દેવતાઓનું એક યા બીજી રીતે અપમાન કરનારાઓને શું સજા થવી જોઈએ?

- માત્ર આપણા જ નહિ, વિશ્વના કોઈપણ ધર્મના ભગવાન સામે આંખ ઊંચી કરનારને પ્રજાએ જ સજા કરવી જોઈએ.
(ડૉ. અમિત પી. વૈદ્ય, ડેમાઈ- બાયડ)

* કોંગ્રેસના અંદરોઅંદર ઝગડાથી પ્રજાએ શું સમજવાનું?

- પ્રજાએ સમજવી પડે, એટલી મજબુત હજી કોંગ્રેસ થઈ નથી.
(નલિન હ. ત્રિવેદી, જામનગર)

* લાલકૃષ્ણ અડવાણીનું હાલનું સ્ટેટસ શું છે?

- 'કબ સે તન્હા ઘુમ રહા હૂં, દુનિયા કે વીરાને મેં, 

ખાલી જામ લિયે બૈઠા હૂં, કબ સે ઈસ વીરાને મેં, 

કોઈ તો હોગા, મેરા સાથી, કોઈ તો પાસ બુલાયેગા...'

(હરીશ મણીયાર, જેતપુર)

* મોબાઈલ ફોનની અસરકારકતા વિશે શું માનો છો?

- સૉશિયલ- મીડિયા જ એક દિવસ દેશને ડૂબાડશે. અફવા ફેલાવવા કેવો બિભત્સ ઉપયોગ થઈ રહ્યો છે!
(પંકજ એન. દફ્તરી, રાજકોટ)

* અન્ય ભગવાનોમાં 'રાધે- શ્યામ' કે 'સીતા- રામ' બોલાય છે... માત્ર 'શંકર- પાર્વતી'માં જ પહેલા 'શંકર' કેમ આવે છે?

- શિવભક્તોમાં ઘરમાં પતિનો દબદબો વધારે હોય!
(પુષ્કર ગઢીયા, જૂનાગઢ)

* તમે જામનગરના પાનના તો વખાણ કરો છો, પણ પાન ખાનારાઓએ ગમે ત્યાં મારેલી પિચકારીઓ માટે શું કહેશો?

- પોલીસે પહેલા દસને જ પકડીને એમની પાસે બધાના દેખતા એ પિચકારીઓ સાફ કરાવવી જોઈએ.
(નૈષધ દેરાશ્રી, જામનગર)

* આજકાલ યુવાનો મોબાઈલમાં જ કેમ વધુ ધ્યાન આપે છે?

- પૉસ્ટમેનો ચતુર થઇ જાય તો કુછ બાત બને!
(ચતુરભાઈ પોસ્ટમેન, અંકલેશ્વર)

* સોનિયાજી વિદેશી હોવા છતાં દેશના સૌથી જૂના રાજકીય પક્ષના સર્વેસર્વા કેમ? એમનું પ્રદાન શું?

- રાહુલ ગાંધી.
(અશોક ર. પરીખ, પાટણ)

* કાગડો દહીંથરૂં લઈ જાય તો કાગડી શું લઈ જાય?

- કાગડો.
(કરણ જોબનપુત્રા, જૂનાગઢ)

* મનગમતું કરવાનો સમય ન મળતો હોય તો શું કરવું?

- હરિહરિ...
(શ્રીમતી સ્વીટી બારોટ, વડોદરા)

* ટીવી- સીરિયલો સ્ત્રીઓ કેમ વધારે જુએ છે?

- કારણ કે, એ સ્ત્રીઓ છે.
(શાંતિલાલ ચંદારાણા, વડોદરા)

* ફેસબૂક પર લોકો આટલું બધું ચેટિંગ..?

- અડધા કલાક પહેલા કરતા અત્યારે પોતે કેટલા વધુ સુંદર દેખાય છે, એની જાહેરાત કરવા સેલ્ફીઓ મોકલાય માટે.
(ખૂશ્બૂ જોબનપુત્રા, જુનાગઢ)

* ખેડૂતો આત્મહત્યા કરે જાય છે... કયા મોઢે વિકાસની વાતો?

- આપણને છીંક-ઉધરસ પણ આવે, તો ય ઢોળવાની સરકાર ઉપર!
(હર્ષદ ત્રિવેદી, ભાવનગર)

* બધા ધર્મોના સારા તત્ત્વો ભેગા કરીને એક માનવ- ધર્મ ન સ્થાપી શકાય?

- એવો એક ધર્મ સ્થપાઈ ચૂક્યો છે. 'ભારત- ધર્મ'.
(દિવાન ઈબ્રાહિમશા ઉસ્માનશા, કરજણ)

* આપની મુહિમ પછી હવે અનેક સંસ્થાઓ એમના કાર્યક્રમોમાં રાષ્ટ્રગીત ગવડાવે છે... પણ ધાર્મિક કાર્યક્રમોમાં કેમ નહિ?

- ઈગો.
(વિદ્વત્તા જી. મેહતા, વડોદરા)

* વીતેલા જમાનાની વિવાદાસ્પદ અભિનેત્રી રેહાનાનું સરનામું આપશો?

- લખી લો. 'જહન્નૂમ'.
(સુરોમા કાયસ્થ, સુરત)

* મા- બાપને વૃધ્ધાશ્રમમાં મૂકી આવનાર સંતાનો શું વિચારતા હશે?

- આને 'વૃધ્ધાશ્રમ કહેવાય', એવી અમારા સંતાનોને ખબર પડવી ન જોઈએ.
(જયકાંત પી. ઠાકર, અમદાવાદ)

* કાને ઓછું સાંભળનારાઓ માટે મશિન કે ઓછું દેખનારાઓ માટે ચશ્મા.... પણ મગજ ઢીલું હોય એનો શું ઉપાય?

- એની પાસે 'એન્કાઉન્ટર' વંચાવો.
(ઉષા જે. સોતા, મુંબઇ)

* ચાની 'પત્તી' કહેવાય છે, તો 'પતિ'ને શું કહેવાય?

- કૂચો.
(માલતી ચંદ્રકાંત વોરા, પોરબંદર)

* શનિ, રાહુ, મંગળ નડે... તો માયા, મમતા, કેજરીવાલ... લાલુ... કયા ગ્રહો કહેવાય?

- આકાશને અભડાવો નહિ!
(વિશનજી નરભેરામ ઠક્કર, મુંબઇ)