1 ‘ણ’થી શરૂ થતું હોય એવું કોઇ નામ આપો ને!
- ‘ણલિણકાંત’.
(નલિનકાંત હ. ત્રિવેદી, જામનગર)
2 શું હજી ગુજરાત આખું ભયભીત છે?
- હવે એવું કહેનારા પોતે ભયભીત છે... ચૂંટણીના રીઝલ્ટ પછી.
(રાહુલ બગડા, જૂનાગઢ)
3 તમે કોની મમ્મીના પપ્પાના દીકરા?
- મારા ભાણાની.
(હિના ડી. શમા, કોસંબા)
4 ભક્તોના ધસારાથી ભગવાનો અકળાઇ નહિ જતા હોય?
- ભક્તો ભગવાનને એમના બાપનો માલ સમજે છે.
(લલિત ઓઝા, જૂનાગઢ)
5 સરકારી કર્મચારીઓ ૧૦૦ ટકા પ્રામાણિક બને, તો ભ્રષ્ટાચારનો નાશ થાય કે નહિ?
- તમારાથી સરકારી કર્મચારીઓનું આટલું બઘું બુરૂં ન ઈચ્છાય...!
(બી.એસ. જેજરીયા, ધંઘૂકા)
6 વારંવાર સવાલો પૂછનાર વાચકોને તમે ઓળખી શકો ખરા?
- ના. મને નામો યાદ નથી રહેતા.
(અખિલ બી. મેહતા, અમદાવાદ)
7 અમેરિકાએ લાદેનને માર્યા પછી દરિયામાં કેમ નાંખ્યો હશે?
- એનું ક્યાંય સ્મારક ન બની જાય માટે.
(વિશ્વા નાણાવટી, રાજકોટ)
8 આપણા રાષ્ટ્રપતિ અને વડાપ્રધાનની જોડી તમને કેવી લાગી?
- આપણા વડાપ્રધાનની બાજુમાં ઊભેલો તો કોઇપણ માણસ બુઘ્ધિશાળી લાગે!
(નિરાલી ચૌહાણ, ચોટીલા)
9 છોકરીઓ ચાલે તેને ‘કૅટ-વૉક’ કહેવાય, તો છોકરાઓ ચાલે એને?
- ચાલુ.
(ઈન્દ્રવદન શિવલાલ જોગી, મુંબઇ)
10 ‘ઍનકાઉન્ટર’માં સવાલ પૂછનારના નામ, સરનામાં ને મોબાઇલ નંબર માંગવામાં આવે છે... ફોટો કેમ નહિ?
- આપણે વાચકોને ‘એ રીતે’ નથી હસાવવાના!
(અતુલ બિનીવાલે, વડોદરા)
11 ફિલ્મોમાં ભૂત તરીકે સ્ત્રીઓને જ કેમ બતાવવામાં આવે છે?... પુરૂષો કેમ નહિ?
- એટલા પૂરતી આપણી ફિલ્મો સત્યની વઘુ નજીક હોય છે.
(દિલીપ લોટીયા, મુંબઇ)
12 મારે વજન વધારવું છે. શું કરું?
- છાપાઓમાં વજન ‘ઘટાડવાની’ જાહેરખબરો આવે છે, એનો લાભ લેવાથી વજન વધશે.
(સ્નેહ જી. પટેલ, આકરૂંદ)
13 હાલમાં ડિમ્પલ કાપડીયાને તમારી વધારે જરૂર છે....
- ડૉન્ટ વરી... એની સંભાળ માટે આપણા ‘અક્ષુ’ને મૂક્યો છે.
(શિવાની ઓઝા, રાજકોટ) અને (સુધીર ભટ્ટ, ભાવનગર)
14 ‘વર’ અને ‘ડ્રાયવર’ વચ્ચે શું ફરક?
- ઘર ચલાવવા કરતાં ટ્રક ચલાવવાની વઘુ સલામત છે, એની ડ્રાયવરને ખબર છે.
(કમલેશ દફ્તરી, રાજકોટ)
15 ‘ઉંબરાવાળી’ માને મૂકીને લોકો ‘ડૂંગરાવાળી’ માને પૂજવા કેમ જાય છે?
- ડૂંગરે પહોંચ્યા પછી ઠેસ વાગે ત્યારે મ્હોંમાંથી રાડ તો ઉંબરાવાળી માની જ નીકળે છે.
(શ્રીમતિ બિંદુ દોશી, વડોદરા)
16 મલ્લિકા શેરાવત તમને સપનામાં હાથ મિલાવે તો શું કરો?
- મલ્લુએ તમારૂં કાંઇ બગાડ્યું છે? સપનામાં શું કામ?
(ચતુર પોસ્ટમૅન, અંકલેશ્વર)
17 મનુષ્યોની જેમ પશુઓમાં જાતીયપરિવર્તન થતું કદી સાંભળ્યું નથી...!
- શું કામ છે તમારે?
(રમાકાંત જોશી, રાજકોટ)
18 ક્યાંય ન ચાલે, તે રાજકારણમાં કેમ ચાલી જાય છે?
- ચૂંટણીના પરિણામો જોજો... હારેલાઓ તો ત્યાં ય ચાલે એવા નહોતા!
(વલ્લભ એમ. પારેખ, કાલોલ)
19 સદાબહાર દેવ આનંદના અવસાનને એક વર્ષ થયું... આપની શ્રઘ્ધાંજલિ?
- એ હવે ‘દેવ’ થઇ ગયા!
(પી.આર. સોનપાલ, ભાવનગર)
20 બધા કૌભાંડીઓ જામીન ઉપર છુટી જતાં હોય છે, એનો શું અર્થ?
- એ જ કે, જામીન ‘નીચે’ ન છુટાય!
(ફાતેમા/તસનીમ વ્હોરા, ઉમરેઠ)
21 સુંદર સ્ત્રીઓમાં અક્કલ ન હોય, એવું કોણે કીઘું?
- શું કામ પુરવાર કરવા માંગો છો?
(મણીબેન પટેલ, ઊંટડી-વલસાડ)
22 ઈશ્વરપ્રાપ્તિનો સરળ માર્ગ કયો?
- તમે મને ગમે ત્યારે મળવા આવી શકો છો.
(સુનિલ નાણાવટી, રાજકોટ)
23 વરરાજાના હાથમાં શ્રીફળ જ કેમ? અન્ય ફળ કેમ નહિ?
- એ તો પરણ્યા પછી જેને યાદ રહ્યું હોય એને ખબર.
(જયેશ અંતાણી, ભાવનગર)
24 ચલણી નોટો ઉપર તમારી તસ્વીર ક્યારે છપાશે?
- ‘‘મેરી તસ્વીર લેકર ક્યા કરોગે... હોઓઓઓ!’’
(યોગેશ કૃ. દલાલ, સુરત)
25 ‘તેલ, તીખું અને દારૂ, એને મોદી સાથે સારૂં’
- તમારી કહેવતમાંથી કાં તો દારૂ બદલો ને કાં તો મોદી બદલો!
(ભૂપેન્દ્ર એચ. મોદી, વલસાડ)
****
સવાલોનું સરનામું
‘એનકાઉન્ટર’માં સવાલ
સાદા પોસ્ટકાર્ડ પર મોકલવા.
સરનામું : ‘એનકાઉન્ટર’,
ગુજરાત સમાચાર, ખાનપુર,
અમદાવાદ- ૩૮૦ ૦૦૧.
(પ્રશ્ન પૂછનારે પોતાનું નામ, સરનામું અને મોબાઈલ નંબર લખવો આવશ્યક છે.)
No comments:
Post a Comment