૧ મૂરતીયો છોકરી જોવા જાય ત્યારે કન્યા હાથમાં ચાની ટ્રે જ લઈને કેમ જાય છે ?
- પેલાને ગર્ભિત મૅસેજ આપવા કે, ‘આ છેલ્લીવારની જ ‘હું’ લઈને આવી છું...!’
(અજય વ્યાસ, બિલખા)
૨ ‘પરણ્યા એટલી પતી ગયા’નો અર્થ શું થાય ?
- ‘પતિ’ ગયો.
(ધર્મેશ બી. વેકરીયા, વિસાવદર)
૩ આ કોંગ્રેસવાળા ‘ઘરનું ઘર’ કરાવવા માંગે છે, એટલે શું ?
- એમનું ‘ઘરનું ઘર’ !
(ઈલિયાસ એસ. તરવાડી, ચલાલા)
૪ ગુજરાતી ભાષા ઉપર આપનું આટલું પ્રભુત્વ જોયા પછી એક સવાલ થાય છે કે, તમે ગુજરાતી ફિલ્મ કેમ બનાવતા નથી ?
- એટલું બઘું પ્રભુત્વ નથી.
(મિતેશ આઈ. દોશી, અમદાવાદ)
૫ આપણી સંસદને નેતાઓએ શાકમાર્કેટ બનાવી દીધી છે કે નહિ ?
- સ્મશાન ભૂમિ.
(વિસનજી નરભેરામ ઠક્કર, થાણા)
૬ ઓછું ભણેલા ક્રિકેટરો કરોડોમાં આળોટે છે, એનું શું ?
- કંઈક પુરવાર કર્યા પછી કમાયા છે ને ? એ લોકો નેતાઓ નથી !
(રાજેશ મોદી, અમદાવાદ)
૭ આ કેશુબાપાના સર્કસમાં જે ‘ગોરધન’ આવે છે, તે આપની કૉલમવાળો તો નહિ ને ?
- જબાન સમ્હાલકર બોલો... આપણો ‘ગોરધન’ ચારે બાજુથી નિષ્ફળ નથી ગયો!
(દિવ્યેશ ત્રિપાઠી, ન્યુયૉર્ક-અમેરિકા)
૮ એક જ ચહેરો... લગ્ન પહેલા દયામણી અવસ્થામાં અને લગ્ન પછી મુંઝાયેલી અવસ્થામાં કેમ ?
- તમે સ્ત્રીઓ ઉપર આક્ષેપ મૂકી રહ્યા છો !
(મૈત્રી હેમાંગ માંકડ, જામનગર)
૯ લગ્ન કરીને પસ્તાવું, એના કરતા ન કરીને પસ્તાવું શું ખોટું ?
- ભરાયા છો ...?
(કેશવ ક્ક્કડ, અમદાવાદ)
૧૦ આપણા દેશમાં વિઘૂરો કરતા વિધવાઓની સંખ્યા વઘુ કેમ ?
- આમાં તમે નસીબદારોની સંખ્યા વઘુ કીધી કહેવાય !
(અસગરઅલી નોમાનઅલી, બારીયા)
૧૧ મોટા ભાગના પુરૂષો પરિણિત સ્ત્રીઓને કેમ વઘુ ચાહે છે ?
- અનુભવીને પ્રથમ પસંદગી.
(મીનાક્ષી નાણાવટી, રાજકોટ)
૧૨ રોટી, કપડા અને મકાન સરળતાથી મેળવવાનો કોઈ ઉપાય ?
- કરી નાંખો કોઈનું !
(પી.આર. પટેલ, હીરાપુરકંપા, ધનસુરા)
૧૩ તમને શિવજી મળે તો શું માંગો ?
- એમની સાથે લાઈફટાઈમ મૅમ્બરશીપ.
(મણીબેન પટેલ, ઊંટડી-વલસાડ)
૧૪ તમારા હાથમાં સત્તા આવે તો દારૂબંધી બાબતે શું કરો ?
- પીધા પછી આપણું કાંઈ નક્કી નહિ...!
(શિવરાજસિંહ વાઘેલા, થરા-કાંકરેજ)
૧૫ ઘરેલું હિંસાના મામલે સ્ત્રીઓનું દુઃખ દૂર કરવાનો કોઈ ઉપાય ?
- હમણાં જરા પુરૂષોનું પતવા દો ને, બહેન... પછી તમારો કૅસ હાથમાં લઈએ!
(સ્મિતા તલકચંદ શાહ, જામનગર)
૧૬ સાથમાં કપડાં ધોતી હેમા, રેખા, જયા અને સુષ્માઓ વિશે કાંઈ કહેશો ?
- આખી જા.ખ. જ ખોટી છે. સાચા નામો મહેશ, ગૌતમ, કિરીટ અને નીતિન હોવા જોઈએ.
(યોગેશ દવે, આદિપુર-કચ્છ)
૧૭ મતાધિકાર ૧૮-ની ઉંમરે તો લગ્ન કેમ નહિ ?
- કોણ બેવકૂફ છે, એ સમજવા માટે ૧૮-ની ઉંમર પૂરતી છે, પણ પોતે કેટલો બેવકૂફ છે, એ સમજ તો ૬૦-ની ઉંમરે ય નથી આવતી... માટે જે છે તે બરોબર છે. પંખો ચાલુ કરો.
(ભરત ડી. સાંખલા, ડીસા)
૧૮ ઘેર વિઝિટે આવેલા ડૉક્ટરને ‘‘આવજો’’ કહેવાય ખરૂં ?
- એ વખતે ફી નહિ આપવાની... એની મેળે પાછા આવશે !
(મીરાં કે. સોઢા, સુરેન્દ્રનગર)
૧૯ આ ‘પ્રથમ દ્રષ્ટિના પ્રેમ’ પછી ‘દ્વિતીય દ્રષ્ટિનો પ્રેમ’ હોય ખરો ?
- મારે તો આંખે બેતાલાં છે !
(ઓ.વી. સાગર, રાજકોટ)
૨૦ એવું કહેવાય છે કે, થાઈલૅન્ડ જવું હોય તો વાઈફને સાથે ન લઈ જવાય. લઈ જઈએ તો હોટલમાં ટિફીન લઈને જતા હોઈએ એવું લાગે... તમારે કેમનું છે ?
- હું મારી વાઈફને બધે લઈ જતો નથી.
(કનુ બારોટ, અમદાવાદ)
૨૧ રાજકારણીઓ વાતેવાતે ‘આમ આદમી’નો ઉલ્લેખ કરે છે, તે કોણ ?
- આમ ઔરતને ખબર...! (આપણા દેશમાં આમ આદમી સવાસો કરોડ છે... ‘‘આમ ઔરત’’ એક જ છે !)
(શિરીષ વસાવડા, વેરાવળ)
૨૨ ફરી પાછો અન્ના હજારેનો એક નવો પક્ષ...?
- પ્રજાને ઉલ્લુ બનાવવા માટે આ એક માણસ કાફી છે.
(દેવાનંદ લખમીચંદ, અમદાવાદ)
૨૩ દવા અને દારૂ વચ્ચે શું તફાવત ?
- બન્ને ભેગા કરીને પી જાઓ... બઘું ભૂલાઈ જશે !
(રમેશ મોદી, ઈટાદરા-માણસા)
૨૪ સત્યમેવ જયતે ?
- હઓ !
(હેમાંગ પી. ત્રિવેદી, પેટલાદ)
૨૫ તમને પ્રવચન કરતા જોયા... તમારા પ્રેમમાં પડી જવાનું મન થાય છે...! શું કરૂં?
- હવે ઘરમાં મારે હકીને પ્રવચન કરતી જોવાનો વખત આવ્યો !
(કલ્યાણી સુ. પટેલ, અમદાવાદ)
૨૬ શું સ્ત્રીઓ સાથે વિચાર કરીને જ વાત કરવી જોઈએ ?
- વિચાર જ નહિ... કસરત પણ કરી લેવી !
(પ્રણવ કારિયા, મુંબઈ)
૨૭ કોંગ્રેસને ‘રાહુલ દ્રષ્ટિ’ નડે છે ને ભાજપને ‘નીતિન દ્રષ્ટિ’... સુઉં કિયો છો ?
- પ્રશ્નમાં તમે ઘણી ઉદારતા બતાવી... આ બન્ને પાસે કોઈપણ પ્રકારની દ્રષ્ટિ છે, એવું ધારી લેવા બદલ !
(અરૂણ વ્યાસ, અમદાવાદ)
No comments:
Post a Comment