૧. આપણે રાહુલ ગાંધીને ક્યાં સુધી સહન કરવાના છે?
- તમારે તો કાંઈ ન કહેવાય... એમની પાર્ટીએ જે સહન કરવું પડ્યું છે... ઉફ!
(પૂજા પી. દફતરી, રાજકોટ)
૨. ‘કાનુડો કરે એ લીલા...’ એટલે શું?
- ભારતીય સંસ્કૃતિમાં કાનુડો એક જ મહાન વિચારધારા છે, જે અન્ય ભગવાનો કરતા આપણી વઘુ નજીક છે. આ એક જ ભગવાનને દોસ્તીના દાવે આવી તોછડાઈથી તમે બોલાવી શકો છો. ક્યાંય સાંભળ્યું, ‘શંકરીયો’, ‘રામડો’ કે ‘અંબાડી...’? આવી સરળ લીલા તો કેવળ કૃષ્ણની જ હોય ને?
(અમિત કમલ ત્રિવેદી, અમદાવાદ)
૩. ‘ખુરશીને નિકમ્મા કર દિયા હમ કો, વર્ના હમ ભી આદમી થે કામ કે’...!
- આપણે ત્યાં જીતેલો ઉમેદવારે ય કોઈ કામનો નથી, ત્યાં હારેલો આવી બડાશ ક્યાંથી મારી શકે?
(રશિદા શબ્બીર તરવાડી, ચલાલા)
૪. ગાંધીજીએ અંગ્રેજોને શું કામ ભગાડ્યા?
- આખા દેશમાં એ એક તો મરદ હતો.
(લીલાધર ભારદીયા, પૂના-મહારાષ્ટ્ર)
૫. તમારી ખૂબ ચહિતી ડિમ્પલ ગંગા સ્વરૂપ થઈ ગઈ... હવે તમારું શું થશે?
- ‘‘...કૌન કમબખ્ત કહેતા હૈ કિ ડિમ્પુ ‘ગંગા સ્વરૂપ’ હો ગઈ... અભી હમ જીંદા હૈ!’’ (આવું કાંઈ પૂછાય તો વાચકોએ મને જરા સાચવી લેવો! હું બહુ કડક માણસ છું !)
(નલિન હ. ત્રિવેદી, જામનગર)
૬. ‘સત્તા આગળ શાણપણ નકામું’, એવું કહેનાર કાયર કહેવાય?
- શાણપણ હોય તો જ સત્તા હોય!
(દેવેન્દ્ર શાહ, વડોદરા)
૭. બ્રશ કરતી વખતે અરીસામાં દાંતને બદલે ચેહરો કેમ જોવાય છે?
- ચેહરાના અન્ય ભાગો ઉપર બ્રશ ન ફરવા માંડે માટે.
(વિશ્વા નાણાવટી, રાજકોટ)
૮. ભગવાને આગળ જોવા માટે આંખો આપી છે, તો પાછળ જોવા માટે કેમ નહિ?
- તમારા અક્ષરો ઉકેલવા માટે ગાલ, કાન, લમણું, બગલ, ઢીંચણ અને પગના તળીયામાં ય પ્રભુએ આંખો આપવી પડત...! (હવે પછી, કોઈ માણસ પાસે પોસ્ટકાર્ડ લખાવજો!)
(અરવિંદ દેસાઈ, વિજલપુર)
૯. ભાજપ અને કોંગ્રેસ એકબીજા સાથે લડી-ઝગડીને મરી ફિટવાને બદલે ભેગા મળે તો દેશનો કેવો ઉઘ્ધાર થાય?
- એ બન્ને મળેલા છે, એ તો મોટી મોંકાણ છે!
(ગીરિશ વાઘેલા, અમદાવાદ)
૧૦. ગંગા અવતરણ વખતે રાજા ભગીરથે ગૂર્જરભૂમિને યાદ કરી હોત તો, ગુજરાતીઓને હરદ્વાર સુધી લાંબા થવું ન પડત, કે નહિ?
- એમ તો મારે ય અમદાવાદમાં એક વિશાળ દરીયો નંખાવવો છે...
(મહેશ એચ. મકવાણા, અમદાવાદ)
૧૧. પહેલા દૂધવાળા સાયકલ પર આવતા, હવે બાઈક પર આવે છે... વિકાસ?
- પેટ્રોલ-પંપવાળા પેટ્રોલમાં પાણી ભેળવે તો આ લોકો ‘બીએમડબલ્યૂ’ લઈને આવશે! જૂની ટેવ કાંઇ જાય?
(અસગરઅલી નોમાનલી, બારીયા)
૧૨. આપની કૉલમ અહિંસક છે, છતાં નામ કેમ હિંસક છે?
- નામ મનમોહન છે... ક્યાંય મોહી પડાય એવું લાગે છે?
(સૈયદ અકબરઅલી, ઈલોલ)
૧૪. આજનું રાજકીય વાતાવરણ જોતા, ભવિષ્યમાં આપણો દેશ ‘સુપર-પાવર’ બની શકે, એવું લાગે છે?
- અફ કૉર્સ બની શકે. ફક્ત એટલું કહો, પૈસા ક્યાં ખવડાવવાના છે?
(એસ.કે. ભુસાવાલા, ભરૂચ)
૧૫. બદનામ મુન્ની, જવાન શીલા કે ચીકની ચમેલીની ઘૂનો પર નાચતી આજની પેઢી ક્યાં જશે?
- અઅઅ... મોટે ભાગે તો આ ત્રણ જવાનીઓના ઘર સુધી તો જશે!
(મિતેશ દોશી, અમદાવાદ)
૧૬. બીજું સંતાન આવતા, પહેલા માટે પ્રેમ ઓછો થશે, એ સાચું?
- આવું તો કેવળ બીજી વાઇફોવાળા કિસ્સામાં થાય!
(મોના જે. સોતા, મુંબઈ)
૧૭. સ્ત્રી અતિ સુંદર હોય પણ માથામાં ચકાચક તેલ નાંખેલું હોય, એવી ચાહકને તમે ઑટોગ્રાફ આપો ખરા?
- અલ્યા... કોઈ મારી રીવૉલ્વર લાવો તો જરા...!
(જીતેન્દ્ર જી. કેલા, મોરબી)
૧૮. સાઘુ તો ચલતા ભલા, તો ગોરધન...?
- ઠેર ઠેર ‘ચરતા’ ભલા!
(મહેશ માંકડ, અમદાવાદ)
૧૯. ‘ધીરે સે આજા રી અખીયન મેં, નીંદીયા...’ એ ફિલ્મ ‘અલબેલા’ની લોરી બેનમૂન છે કે નહિ?
- તે આમ અડધે ‘ઍનકાઉન્ટરે’શું કામ પૂછો છો?... પતાઇને સૂઈ જજો ને!
(કરીમ સોઢા, સુરેન્દ્રનગર)
૨૦. નિષ્ફળ જવાનો કોઇ ફાયદો પણ બતાવશો?
- ભારતના વડા પ્રધાન બની શકાય છે.
(મિતુલ જોગલ, ભાળઘર-ખંભાળીયા)
૨૧. તમે જન્મ્યા ત્યારે અન્ય બાળકોની જેમ રડ્યા હતા કે, હસ્યા હતા?
- સાંભળ્યું છે કે, મને જોઇને ડૉક્ટરો અને નર્સો ખુબ હસ્યા’તા... કે, ‘‘આપણું બાળક પણ આવું સુંદર જોઇએ...’’ ને તો ય આટલી ઉંમરે મને અભિમાન નહિ... હું રડતો’તો છતાં ય !
૨૨. ‘કરવા ચોથ’નું વ્રત કરી, પતિને લાંબુ જીવાડ્યા પછી પત્નીઓ બિચારાનું જીવન હરામ કેમ કરી નાંખે છે?
- ટૅઇક ઇટ ઈઝી, માય બૉય...! અમે બધા તમારી સાથે છીએ.
(પ્રબોધ જાની, વસઇ-ડાભલા)
૨૩. પરણીને દીકરી પારકે ઘેર જતી રહે છે, ત્યારે મન મનાવવાનું કે, એ તો પારકી થાપણ છે, પણ પરણીને દીકરો માં-બાપથી અલગ જતો રહે, એનું શું?
- બઘું અહીંનું અહીં છે. તમે તમારા માં-બાપને પ્રેમપૂર્વક રાખ્યા હશે, તો તમારા સંતાનો તમને રાખશે. સંસ્કાર તો તમારામાંથી જ આવ્યા હોય, ના?
(ઉષા જગદીશ સોતા, મુંબઈ)
૨૪. આંખ-કાન નબળાં હોય તો ચશ્મા કે કાનનું મશિન લેવાય, પણ જેનું મગજ નબળું હોય એનું શું કરાય?
- પૈણાઇ દેવાનો!
(અનુજ અનિલ કારીયા, મુંબઇ)
૨૫. ૧૦૦-ભ્રષ્ટાચારી દેશોમાં આપણો નંબર ૮૫-મો...! સુઉં કિયો છો?
- આટલો નંબર મેળવવા ય પૈસા ખવડાવવા પડ્યા હશે.
(ડૉ. પ્રવિણગીરી ગોસ્વામી, પોરબંદર)
૨૬. તમે ધર્મ કરતા દેશને વઘુ મહત્ત્વ આપો છો, એનું ખાસ કારણ?
- બહુ નસીબદાર હો તો ભારતમાં જન્મ મળે. માથું ભરાઈ જાય, એટલી દેશની માટી નાંખીએ, એ માટીના કણ કણના આપણે એહસાનમંદ છીએ. તમે જોયું તો હશે જ કે, આપણા દેશના ધર્મોએ જ આપણને દેશથી દૂર રાખ્યા છે.
(કૃપા પટેલ, અમદાવાદ)
****
સવાલોનું સરનામું
‘એનકાઉન્ટર’માં સવાલ
સાદા પોસ્ટકાર્ડ પર મોકલવા.
સરનામું : ‘એનકાઉન્ટર’,
ગુજરાત સમાચાર, ખાનપુર,
અમદાવાદ- ૩૮૦ ૦૦૧.
(પ્રશ્ન પૂછનારે પોતાનું નામ, સરનામું અને મોબાઈલ નંબર લખવો આવશ્યક છે.)
No comments:
Post a Comment