* નેતાને પૂછ્યું, 'દેશ કા હાલ કૈસા હૈ ?' તો નેતાએ કહ્યું, 'દેશ કા તો પતા નહિ....હમારા હાલ બઢીયા હૈ...' આપ ક્યા બોલતે હો, અશોકજી ?
- આટલો પ્રામાણિક નેતા ઍટ લીસ્ટ....આપણા દેશમાં તો ન હોય !
(અવતારસિંઘ જાસલ, અમદાવાદ)
* 'અશોક' અને 'અશોકા' વચ્ચે કેટલો ફરક ?
'આ......' ટલો મોટો !
(તસ્નીમ હકીમુદ્દીન વ્હોરા, ઉમરેઠ)
* જેલના સુપ્રીન્ટેન્ડૅન્ટ પોતાની જ જૅલમાં જાય....એ કેવું ?
- ઘર કે બુધ્ધુ ઘર કો આયે !
(મુનિરા એફ. બારીયાવાલા, ગોધરા)
* ભાજપ-કૉંગ્રેસ દરેક વાતે દોષના ટોપલા એકબીજા ઉપર કેમ નાંખે છે ?
- સમજવાનું આપણે છે. બેમાંથી એકે ય દેશનું ભલું કરી શકે એમ નથી.
(પ્રિન્સ બારોટ, અંકેવાળીયા-લીમડી)
* મચ્છર મારવાની આટઆટલી દવાઑ છતાં મચ્છરો જતા કેમ નથી ?
- કૉંગ્રેસ વિશે તમારી જાણકારી ઊંડી છે.
(દેવેન્દ્ર શાહ, વડોદરા)
* લગ્ન વખતે ચઢાવામા કન્યાની ડોકમાં સોનાનો હાર અને વરની ડોકમાં સોનાની ચૅઇન....આવો ભેદ કેમ ?
- વરને ય સોનાનો હાર પહેરાવો તો બે બહેનો લગ્ન કરતી હોય, એવું લાગે!.
(નવનીત પરમાર, રાજકોટ)
* ભારતીય રાજકારણ ગાંધી-પરિવારમાંથી ક્યારે મુક્ત થશે ?
- 'મકાન એવી જગ્યાએ એમણે રાખ્યું છે પોતાનું, ગમે તે રસ્તે જાઓ, એમનું રસ્તામાં ઘર આવે.' (રુસ્વા મઝલૂમી)
(કેશવ કક્કડ, અમદાવાદ)
* પાર્ટી કે સ્ટેજ પર પોતાની પત્નીને બીજાની સાથે ડાન્સ કરતી જોઇને એ હીરોઇનના ગોરધનને શું થતું હશે ?
- એના ય થોકબંધ પૈસા મળે છે ને ....? ભલે આગળ વધતી.
(મોહિની ચંદ્રકેશ મહેતા, વડોદરા)
* પ્રેમ આંધળો કેમ હોય છે ?
- મને એવું કશું દેખાતું નથી !
(પિનાકીન ઠાકોર, અમદાવાદ)
* એક જંગલી દીપડાએ ૨૦-૨૫ ઘેટાઓને પતાવી દીધા, એનો ફોટો આપના અખબારમાં છપાયો, પણ આપ તો દર સપ્તાહે ૨૫-૨૫ નિર્દોષોનું 'ઍનકાઉન્ટર' કરો છો, છતાં આપનો ફોટો કેમ નહિ ?
- મારા ફોટા દીપડાં જેવા સારા નથી આવતા !
(શશીકાંત મશરૂ, જામનગર)
* કોંગ્રેસને વધુ મજબુત બનાવવા માટે મહામંત્રીપદે પ્રિયંકા અને પ્રમુખ તરીકે રોબર્ટ વાડ્રાને મૂકાય તો ?
- ફૂટપાથ પર ખેલ બતાવતા મદારીઓ વાંદરા-વાંદરીને ઝભલાં પહેરાવે છે, તેથી કાંઇ એની આવકમાં વધારો થતો નથી !
(વિમલ ધોળકીયા, અમદાવાદ)
* સવારે ઉઠતાવ્હેંત તમે કોનું મોંઢું જુઓ છો.....પત્નીનું કે ડિમ્પલ કાપડીયાનું ?
- સંસારના તમામ ચેહરાઓ કરતા મને સૌથી વધુ અરીસો પસંદ છે... જય હો !
(સુમન વડૂકૂળ રાજકોટ)
* વરઘોડા જેવા પ્રસંગોએ નાચતા નાચતા રૂપીયાની નોટૉ ઉડાડનાર સાબિત શું કરવા માંગે છે ?
- એ જ કે... એક જમાનામાં આ બધા પૈસા મેં આવા પ્રસંગે નોટો વીણી વીણીને ભેગા કર્યા હતા !
(કપિલ જે. સોતા, મુંબઈ)
* શું તમે પહેલી નજરના પ્રેમમાં માનો છો ?
- હું તો વાઇડ-ઍન્ગલ નજરના પ્રેમમાં માનું છું.
(દીપ્તિ એ. રાવળ, બોટાદ)
* ટાલ પુરૂષને માથે જ કેમ ? સ્ત્રીને કેમ નહિ ?
- કહે છે કે, શરીરના જે અંગનો વધારે ઉપયોગ થતો હોય, ત્યાં ઘસારો તો પહોંચવાનો !
સાંભળ્યું છે કે, મગજ માથામાં આવ્યું છે!
(એચ.કે. કાત્રોડીયા, રાજકોટ)
* ધર્મ મોટો કે વિજ્ઞાન ?
- દેશ.
(અસગરઅલી નોમાનઅલી, બારીયા)
* પવિત્ર પુરૂષોત્તમ માસમાં અમારે ત્યાં 'કથામૃત' રાખ્યું છે. આપ ઉદઘાટન કરવા આવશો ?
- હું ધ્યાનમાં બેઠો હોઉં, એવી એક પ્રતિમા બનાવડાવી લો. હું સર્વવ્યાપી છું.
(ડૉ. પ્રવીણગીરી ગોસ્વામી, પોરબંદર)
* પિયર ગયેલી પત્ની એના ગોરધનને રોજ ફોન કેમ કરતી હશે ?
- ગોરધનને જ કરે, એ જરૂરી છે !
(ઉમર કોલસાવાલા, મુંબઈ)
* શ્રેષ્ઠ સુખ સ્વર્ગનું ગણાય છે, છતાં માનવીને એનું પ્રલોભન કેમ થતું નથી ?
- ત્યાંની ટીકીટ બહુ મોંઘી પડે છે !
(વિમલ સવજીયાણી, જામજોધપુર)
* લોકો જીંદગી વધારવા માંગે છે, સુધારવા નહિ. એવું કેમ ?
- કેટલાક બગાડવા પણ માંગતા હોય છે... બીજાની !
(રમેશ 'ટ્રોવા' સુતરીયા, મુંબઈ)
* 'બહોત લમ્બા, બહોત બેવકૂફ'....એ વાત સાચી છે ?
- મને સીધી રીતે બેવકૂફ કહી દો ને, બેન !
(રમાગૌરી ભટ્ટ, ધોળકા)
* દરેક હાસ્યલેખક પાછળ એક દર્દ છુપાયેલું હોય છે. તમને શેનું દર્દ છે ?
- મગજનું!
(મણીબેન પટેલ, ઊંટડી-વલસાડ)
* મનુષ્યના વ્યકિતત્વના પાસાં વિરોધાભાસી કેમ હોય છે ?
- કઇ ગાય કે કયા પાડાનું વ્યક્તિત્વ તમે વિરોધાભાસ વગરનું જોયું ?
(અરવિંદ દેશપાંડે, વિજાપુર)
* શું શ્રેષ્ઠ પુરૂષોનું નિર્માણ અકાળે મૃત્યુ પામવા માટે જ થયું છે ?
- ચિંતા ન કરો. મને કાંઇ નથી થયું.
(નિરંજન વૈષ્ણવ, જૂનાગઢ)
* અશોકવાટીકામાં સીતાજીને રાખ્યા હતા. તમારી વાટીકામાં કોને રાખ્યા છ?
- હનુમાનજીને.
(ડૉ. બી.પી. પરમાર, રામોલ-પેટલાદ)
* મને કૅટરીના કૈફ યાદ આવે છે. શું કરવું ?
- તાર તો બંધ થઇ ગયા... તમે ટપાલે ય બંધ કરાવશો !
(ચતુર પોસ્ટમૅન, અંકલેશ્વર)
No comments:
Post a Comment