ઍનકાઉન્ટર : 06-02-2017

* શું આપણું ફ્યૂચર ખરેખર બ્રાઇટ છે ?
- પગાર તારીખે ખબર પડે !
(વેદાંત દિવેચા, વડોદરા)

* તમે આમ આડાઅવળા જવાબો આપવાનું બંધ કરીને સીધા અને સાચા જવાબો આપવાનું ક્યારે શરૂ કરવાના છો ?
- એને માટે મોટા થઇને તમે અમારી બાળસાપ્તાહિક પૂર્તિમાં સવાલો પૂછો.
(હિતેન્દ્ર કાકડીયા, સુરત)

* સચિન તેન્ડુલકર વિશે બાયોપિક બનાવો તો હીરો તરીકે કોને લેશો ?
- હિંદી ફિલ્મોવાળા પાસે વિષયો ખૂટી ગયા છે.. હવે તો ગમે તેવા, ઐરા, ગૈરા, નથ્થુ ખેરાની બાયોપિક બનવા માંડી છે.. એ હિસાબે મારી ય બનશે...
(આસિફ મનસુરી, ગાંધીનગર)

* સારા માણસો રાજકારણમાં કેમ નથી આવતા ?
- એમની પાસે બીજા કોઇ કામધંધા હોય કે નહિ ?
(ધવલ જે. સોની, ગોધરા)

* રાહુલ ગાંધી કહે છે, 'મોદી જવાનોના ખૂનની દલાલી કરે છે.' આવા માણસો વિશે તમે શું કહેશો ?
- રાહુલજી જવાન છે. કદાચ, આ નિવેદન એમની આત્મકથાનો ભાગ હોય !
(હસમુખ એન. વોરા, ધોરાજી)

* કેજરીવાલને ઊંધો કરવાથી 'લવારી જ કે ?' થાય ને ?
- આવા માણસો પાછળ શું કામ આપણી વર્લ્ડ-ફૅમસ કૉલમની જગ્યા બગાડવી ?
(સુરેશ કાકલોતર, સુરત)

* માત્ર કૉપી-પૅસ્ટ વૉટ્સઍપ મૅસેજોથી બચવા શું કરવું ?
- આવો કચરો નહિ મોકલવા માટે પહેલા રીકવૅસ્ટ કરો. છતાં ય ન માને તો, કોઇનો ય ડર રાખ્યા વિના સામે 'આવડી ને આવડી' મોકલો.
(ડૉ. હેમંત રાઠવા, વલ્લભ વિદ્યાનગર)

* ડૉ. મનમોહનસિંઘનું મૌન ક્યારે તૂટે એમ લાગે છે ?
- એ બોલે, એમાં ય દેશને કદી ફાયદો થયો નથી.
(નીલ કુંભાણી, સુરત)

* અર્બન ગુજરાતી ફિલ્મોને પ્રમોટ કરવાને બદલે વખોડવાનો ટ્રેન્ડ કેમ ચાલી રહ્યો છે ?
- અભિષેક જૈન, જિતેન્દ્ર ઠક્કર કે આશિષ કક્કડ જેવી સારી ફિલ્મો બનાવો તો પ્રશંસા થાય છે જ... હવે 'પ્ર.જા.'ની એક સુંદર ગુજરાતી ફિલ્મ આવી રહી છે...
(હાર્દિક જી. રાવલ, સુરેન્દ્રનગર)

* લેખકો જુદાં જુદાં ઉપનામોથી ઘણી જગ્યાએ લખતા હોય છે... તમે ક્યાં ક્યાં લખો છો?
- હું જગતના સર્વોત્તમ નામે-એટલે કે, ફક્ત 'અશોક દવે'ના નામે જ લખું છું અને તે પણ વિશ્વના સર્વશ્રેષ્ઠ અખબારમાં જ !
(દિનેશ પંચાલ, અમદાવાદ)

* સો થપ્પડ ખાધી ને એક મારી... એમાં તો જાણે વિશ્વયુદ્ધ જીત્યા જેવી ઉજવણી ?
- ડૉન્ટ પૅનિક ! આપણા જવાનોને મારવા માટે હવે પાકિસ્તાની આતંકવાદીઓની જરૂર પડે એમ નથી... જવાનોને અપાતું જમવાનું કાફી છે !
(મૂકેશ પી. મહેતા, સુરત)

* તમે ક્યારેય સર્જિકલ સ્ટ્રાઇક કરી છે ?
- હજી આ શબ્દોનું ગુજરાતી કરવાનું ય બાકી છે !
(હર્ષ એસ. હાથી, ગોંડલ)

* કાશ્મીરમાં ત્રણ મહિનાથી હિંસા ચાલુ છે. ઉપાય શું ?
- ન્યૂસ જોવા/વાંચવાના બંધ કરો.
(મધુકર મેહતા, વિસનગર)

* શરદ પવાર કહે છે, એ રક્ષામંત્રી હતા ત્યારે આવી તો બહુ સર્જિકલ-સ્ટ્રાઇકો કરી હતી... !
- રમકડાંની દુકાને આવી સર્જિકલ-સ્ટ્રાઇકની ગૅમ્સ બહુ મળે છે. બાબો રમતો હશે !
(નીરત ઊનડકટ, રાજકોટ)

* ચાયનીઝ ચીજોના બહિષ્કારનો વાયરો ચાલ્યો છે, પણ મને હોટેલમાં 'મન્ચૂરિયન' બહુ ભાવે છે.. શું કરવું ?
- હું ચીનમાં જેટલું ફર્યો છું, એમાં એકે ય હોટેલમાં આપણા ઇન્ડિયાની હોટેલોમાં ચાયનીઝ ડિશ મળે છે, એવી એકે ય જોઈ નથી... અહીં માત્ર ચાયનીઝ નામો આપી દીધાં છે. તમે ત્યારે દાબે રાખો.
(નીતા ગાંધી, જૂનાગઢ)

* 'ઍનકાઉન્ટર' ચા સાથે વાંચવું જોઈએ કે કૉફી સાથે ? જવાબ આપો, તો ખબર પડે... બંને ઠંડાં થાય છે.
- તમે અમદાવાદના નથી લાગતા. ચા હોય કે કૉફી, કોને ત્યાં પીવા બેઠા છો, એ ઉપરથી જવાબ નક્કી થાય !
(જયમિન પટેલ, બાર્ટલૅટ-શિકાગો, અમેરિકા)

* આપણો દેશ દુનિયાની સૌથી મોટી તાકાતવાળો દેશ ક્યારે બનશે ?
- હજી દિલ્હીથી નવી કોઇ સિક્સર નથી આવી.... ! આવે પછી કહું.
(અફરોઝબેન મીરાણી, મહુવા)

* આ દુનિયામાં કોના ઉપર વિશ્વાસ કરવા જેવો છે ?
- આપણું કાંઇ ઠેકાણું નહિ, બૉસ... હમણાં મને આઘો રાખજો.
(ઘનશ્યામ વરીયા, સુરત)

* સંતાન માટે હંમેશાં છત્ર બની રહેતાં મા-બાપ માટે સંતાનો આધાર-કાર્ડ કેમ બની શકતા નથી ?
- તમે તમારાં મા-બાપને જેવી દશામાં રાખ્યાં હશે, એ બધું તમારાં સંતાનો અત્યારે જુએ છે.. એ લોકો નકલ તમારી જ કરશે !
(જયેશ અંતાણી, ભાવનગર)

* મને ૬૭-વર્ષ થયાં. મારી ઇચ્છા તમારી ૨૫-મી વર્ષગાંઠ ઊજવવાની છે. મુંબઇ તો આવશો ને ?
- ડોસીનું તો તમે કાંઇ બોલ્યા જ નહિ ! એને લેતો આવું કે ઘરમાં જમા કરાવી ને ?
(કાંતિલાલ વી. ખંડોર, મુંબઈ)

* શીરડી મંદિરમાં રૂ. ૫-કરોડનું દાન... ! અંબાજીમાં ૨૫-તોલા સોનું... કોના માટે?
- હું તો અમદાવાદમાં જ હતો... !
(પિયુષ સોની, અમદાવાદ)

* હવે પંખો ચાલુ કરતાં ટાઢ વાય છે... હવે સુઉં કિયો છો ?
- બાને પૂછીને બધું કરવું... ખિજાય નહિ !
(ભાર્ગવ ગોપાણી, ભાવનગર)

* બીજી એક સર્જિકલ સ્ટ્રાઇક કરીને મોદીજી ઇ.સ. ૨૦૧૯-નું ઇલૅકશન જીતી શકશે ?
- એમને ઈલેકશન નથી જીતવાનું.... પાકિસ્તાન જીતવાનું છે !
(જતિન દેસાઈ, મુંબઇ)