એનકાઉન્ટર : 15-07-2018

* મળવામાં પહેલી પ્રાયોરિટી કોને ? અક્ષય કુમાર કે શાહરૂખ ખાન... ?
- અક્ષય ડિમ્પલનો જમાઈ છે... એટલે એને ! અમારે ય વ્યવહારમાં રહેવું પડે!
(નિકુંજ આર. ગોર, મોડાસા)

* 'નવરો બેઠો મોબાઈલ મચડે...' નવી કહેવત ?
- નવરી બેઠી સેલ્ફી પાડે!
(જીતેન્દ્ર કેલા, મોરબી)

* સાચા ધર્મની વ્યાખ્યા શું ?
-  હજી સુધી એક પણ ઘર્મ પેદા થયો નથી , જે બીજા ઘર્મનું પોતાના ઘર્મ જેટલું સન્માન કરે.
(હિતેશ કે. વ્યાસ, ભાવનગર)

* નજર સામે ખોટું થતું જોઈ રહેનારાઓ શું સાબિત કરે છે ?
- આપણા બાપનું શું જાય છે?
(સંકેત કે. વ્યાસ, રાલીસણા)

* 'એનકાઉન્ટર' માટે સવાલ પસંદ થયો છે, એની જાણ કરવામાં આવે છે ?- હા. જે રવિવારે સવાલ પસંદ થયો ન હોય, તેનાથી ખબર પડે !
(જગદિશ કપૂરીયા, જૂનાગઢ)

* જગતનું સૌથી મોટું જૂઠ ક્યું ?
- એ ફક્ત પાકિસ્તાનીઓને આવડે છે, કે 'કાશ્મિર અમારૂં છે.'
(વિશાલ માધડ, અમરેલી)

* ભાજપ કેટલા વર્ષો સુધી રાજ કરશે ?
- એ લોકોને ભાજપ-ફાજપમાં રસ નથી. મોદી કેટલા વર્ષ રાજ કરશે, એની ચિંતા  છે.
(ગોપાલ સોલંકી, પડોદર-કેશોદ) અને (દીપક પંડયા, બિલિમોરા)

* ગાયક-સંગીતકાર હેમંત કુમાર વિશે કાંઈ નહિ કહો... ?
- લતા મંગેશકરે કહેવાનું એવું મધુરૂં કહી દીધું છે કે, બીજાને બોલવાનું રહેતું જ નથી. હેમંત દા ના પવિત્ર સ્વર માટે લતાએ કીધું હતું, 'હેમંત દા ગાતા હોય ત્યારે કોઈ ટેકરી ઉપરના મંદિરમાં પૂજારી સ્તુતિ ગાતા હોય એવું લાગે !'
(નિલેષ પ્રેસવાળા, ભરૂચ)

* ભારતને સાચા અર્થમાં આઝાદી ક્યારે મળશે ?
- આઝાદી તો ચાલે જ છે, ગુલામી નો આવે એ જોવાનું ?
(મુકેશ ખંડોર, મુંબઈ)

* આજના જમાનામાં સુપરમેન ન હોય ?
- મારા ખોટા વખાણ ન કરો... !
(મનિષ નિરંજન વર્મા, ગોધરા)

* કોઈ છોકરીને ક્યાં સુધી પ્રેમ કરવો જોઈએ ?
- એના બાપા બોચી પકડે નહિ ત્યાં સુધી.
(શૈલેષ લશ્કરી, ભાવનગર)

* ઈ.સ. ૨૦૧૯-ની ચૂંટણીનો શંભુમેળો સફળ થશે ?
- સફળ થાય તો પણ એ લોકો એકબીજા સાથે ટકે છે કેટલા કલાક... એ જોવાનું!
(અશ્વિન મોરે, વડોદરા)

* પોતાનું નામ 'ગુજરાત સમાચાર'માં છપાવવા માટે 'એનકાઉન્ટર' કરીને રાહ  જોવાની ?
-  તમે આનાથી વધુ સારૂં કામે ય કરી શકો છો.
(સરફરાઝ શેખ, અમદાવાદ)

* કેવા સવાલોને તમે ઊડાડી મારો છો ?
-  જસ્ટ... પોતાનું નામ છપાવવા ચારે બાજુના છાપાં-મેગેઝીનોમાં નિયમિત સવાલો મોકલતા રહે, એ અહીંથી પોતાનું સ્થાન ગૂમાવે છે.
(શ્રેયા કે. પટેલ, વડોદરા)

* જો તમને રીયલ લાઈફમાં કોઈનું એનકાઉન્ટર કરવાનો મોકો મળે તો કોનું કરો ?
- ભગવાને શબ્દો આપ્યા છે, શસ્ત્રોની જરૂર ના પડે.
(કરણ સોની, રાજકોટ)

* ભારતમાં અભણો રાજ કરે ને શિક્ષિતો બેકાર રહે, એનું કારણ શું ?
- ભારતમાં તો એ બન્ને રાજ કરે છે.
(શેહજાદ આઈ. શેખ, લુણાવાડા)

* આપણે શ્રીફળ વધેરીએ, એ બલિદાન છે કે સમર્પણ ?
-  અંધશ્રધ્ધા.
(ઉમંગ કંસારા, માધવપુર-ઘેડ)

* કાશ્મિરની સમસ્યાનો ઉકેલ કોણ લાવી શકશે ?
- ઉકેલ આવી જાય તો ભલભલી રાજકીય પાર્ટીઓ ઘેર બેસી જાય... ઉકેલમાં કોને   રસ છે ?
(જગદિશ સભાડ, શેઢાવદર-ભાવનગર)

* શુક્રવારની તમારી 'ફિલ્મ ઈન્ડિયા' કોલમમાં ગુજરાતી ફિલ્મો વિશે કેમ લખતા  નથી ?
-  કોલમનું નામ 'ફિલ્મ ગુજરાત' કરીએ, ત્યારે એવું થશે !
(વિનોદ ની. શુકલ, વડોદરા)

* સલૂનમાં દાઢી કરાવતી વખતે પરમ શાંતિનો અનુભવ કેમ થાય છે ?
-  અમને તો છોલાય છે... !
(નીતિન જોશી, વડોદરા)

* 'યૂ-ટયૂબ'ના નિર્માતા પહેલા ટાયર-ટયૂબનો ધંધો કરતા હતા ?
- અજમેરમાં તપાસ કરો... નહિ તો પછી આણંદમાં !
(આદિલ શકીલ એહમદ અજમેરી, આણંદ)

* રોટલીનો આકાર ગોળ જ કેમ વણવાનો ? બીજો કોઈ આકાર કેમ ન ચાલે ?
-  ધેટ્સ ફાઇન... દાળ છરી-કાંટા વડે પીવાનું રાખી શકાય !
(અપર્ણા ભદ્રેશ દેસાઈ, નાલાસોપારા)

* 'ખુશ્બૂ તેરે બદન સી, કિસી મેં નહિ નહિ...' આમાં ભાઈસાહેબના સુધરવાના  ચાન્સ કેટલા ?
-  સંબંધિત બહેનજી પણ આવી સામી ખુશ્બુઓથી ટેવાઈ ગયા હોય !
(મયૂર અંજારીયા, રાજકોટ)

* સવાલ વાંચતી વખતે જવાબનો વિચાર કરવા બેસવું પડે છે કે, જવાબ સ્વાભાવિક સૂઝી જાય છે ?
- પરણ્યાને ૪૨-વર્ષ થયા.
(જીજ્ઞાસા માંકડ, મુંબઈ)

* બ્રાહ્મણ ગમે તેટલો ધનવાન હોય, છતાં આજીવન ગરીબ જ કેમ ?
-  મારે તો હજી સુધી એકે ય ગરીબ બ્રાહ્મણને મળવાનું થયું નથી.
(ડૉ. મહેન્દ્ર મૈસૂરીયા, અમદાવાદ)