૧.
પોસ્ટખાતાની બેદરકારીને લીધે પ્રેમિકાનો પત્ર મોડો મળ્યો, સમયસર
પત્ર ન મળવાથી એ બીજે પરણી ગઇ. શું હું પોસ્ટખાતા ઉપર નુકસાનીના વળતરનો દાવો કરી
શકું ?
- સાલું
આવું ઍક્ટિવ પોસ્ટખાતું અમારા વખતમાં ક્યાં હતું....? તમારા
જેવું અમારે લોકોને થયું હોત તો આજે લાખો ગોરધનો કેટલા સુખી હોત ? તમારે તો ભારતભરના ટપાલીઓને લાઈનમાં ઊભા રાખીને ચરણસ્પર્શો
કરવા જોઇએ....!
(રમેશ
દેસાઇ, અમદાવાદ)
૨.
ગાર્ડનમાં ફરતું યુગલ પ્રેમીઓનું છે કે અન્ય, તે શી
રીતે જાણવું ?
- જાણવાની
કોઇ જરૂર......???
(ગૌરી
વી. કાચા, અમદાવાદ)
૩.
સત્યનો જય થાય છે, એ
તમારા મતે સાચું છે ?
- સત્ય
બેવકૂફોનું કામ છે...ને એક બેવકૂફ એનો જવાબ આપી રહ્યો છે !
(હસમુખ
બી. ઠક્કર, કરજણ)
૪.
પ્રજાનો અવાજ શાસકો સુધી પહોંચાડવાનો કોઇ રસ્તો ?
- લાઉડ-સ્પીકર
સારા માઈલું લાવવું.
(પુષ્પેન્દ્ર
નાણાવટી, જામનગર)
૫.
મોંઘેરા મેહમાન અજમલ કસાબને આ સરકારે રાષ્ટ્રપતિ કેમ ન બનાવ્યો ?
- એને
જેલમાં જ રખાશે. એનો જેલનો ખર્ચો રાષ્ટ્રપતિના પગાર કરતા વધારે આવે છે !
(અશ્વિન
ઠક્કર, વડોદરા)
૬. જે
પતિદેવ પત્નીની વાત જ સાંભળતા ન હોય, એવા
પતિદેવને શું કહેવાય ?
- એ દેવ
થઇ ગયા કહેવાય !
(જ્યોત્સના
હિંડોચા, રાણાવડવાળા-પોરબંદર)
૭. શું
દરેક ઘરમાં પત્નીનું જ ચાલતું હશે ?
- તમારી
પત્નીનો જવાબ હમણાં જ આપીને માંડ કળ વળી છે....તમારે તો રોજનું થયું.... અમને જરા
શ્વાસ લેવા દો !
(ગુલાબ
હિંડોચા, રાણાવડવાળા-પોરબંદર)
૮.
મૃત્યુ નિશ્ચિત હોવા છતાં ઘણા મિથ્યાભિમાનમાં કેમ રાચતા હશે ?
- મિથ્યાભિમાન
તો રોજેરોજ રાખવા મળે.. મૃત્યુનો લાભ રોજ ના મળે કાંઇ...!
(ગિરા
પટવારી, અમદાવાદ)
૯.
ચાલુ વરસાદે બગીચામાં વૃક્ષોને પાણી પીવડાવવા કેવી રીતે જવાય ?
- રહેવા
દો... આ બાળકોનું કામ નથી !
(ગૌતમ
પાટણવાડીયા, વડોદરા)
૧૦.
ટીવી સીરિયલના પ્રાયોજક તરીકે ચૂર્ણની ઍડ..?
- બેવકૂફો
છે. આ સીરિયલો જોયા પછી બઘું ઑટોમૅટિક પતતું હોય છે...!
(વિદુર
પંડ્યા, ગાંધીનગર)
૧૧.
તમે કહી શકશો, મારા મગજની શી વિશેષતા છે ?
- નંખાવી
લો.
(જયદીપસિંહ
રાયજાદા, કેશોદ)
૧૨.
દેશનું સુકાન શાસકોના હાથમાં નથી......આપણું ભાવિ ?
- તમે
મારા ઉપર વધારે પડતી આશા રાખીને બેઠા છો.
(શુકન
વહિયા, અમદાવાદ)
૧૩. જે
દેખાય છે એ શહેરોનો આડેધડ વિકાસ છે કે રકાસ ?
- ‘ઝક્કાસ’ છે, બૉસ !
(જમીલા
એ. મુન્શી, કાવી)
૧૪.
અમારે અંતરીક્ષ જોવું છે, તો શું
કરવું ?
- બાલ્કનીમાં
આવી જાઓ.
(કોમલ/હિત, બકોરી-સિદસર)
૧૫.
તમારા લગ્ન તમારી મરજીથી થયા હતા કે માતા-પિતાની પસંદગીને માન આપવું પડેલું ?
- ટ્રાયલ-ઍન્ડ-ઍરર
પદ્ધતિથી !
(ડી.કે.
માંડવીયા, પોરબંદર)
૧૬.
કાશ્મિરની આતંકવાદી છાવણીઓ ઉપર આપણા વડાપ્રધાન સપાટો કેમ બોલાવતા નથી ?
- ગળામાંથી
નાનકડો ખોંખારો નીકળતો નથી ને તમારા સપાટા કઢાવવા છે... કોઇ પંખો ચાલુ કરો !
(ધીમંત
નાયક, બારડોલી)
૧૭.
ક્રિકેટની જેમ ‘ઍનકાઉન્ટર’ના
જવાબો ઉપર સટ્ટો રમાય છે.. શું કરવું ?
- જીતતા
હો, તો રમો.
(રશીદા
શબ્બીર તરવાડી, ચલાલા)
૧૮. ‘જો ખુશી સાલી મેં નહિ, વો
ઘરવાલી મેં હૈ...’ તમે
શું માનો છો ?
- આમાં
મારા કરતા મારા સાઢુઓ શું માને છે, એ
વધારે મહત્ત્વનું છે ?
(અનિલ
દેસાઇ, નિયોલ-સુરત)
૧૯.
અમારે તો મૃત્યુને પણ મહોત્સવ બનાવવો છે...!
- ઇશ્વર
તમારી મનોકામના જલ્દી પૂરી કરે.
(સુરેશ
એન. બાલુ, થરાદ)
૨૦. આપ
પંખાનું કહો છો... લ્યો, અમે તો
એ.સી. ચાલુ કરી દીઘું...હવે ?
- એસી
બંધ કરીને પંખો ચાલુ કરો !
(નીલમ
પ્રતિક વ્યાસ, સુરેન્દ્રનગર)
૨૧. ‘બુધવારની બપોર’ના ‘મુઝકો અપને ગલે લગા લો’ મુજબ, અનેક પતિ-પત્ની એકબીજાને ભેટતા જ નથી... શૉકિંગ ને...?
- કેટલાક
તો બહાર પતાવતા હોય ને ! બઘું સરભર થઇ જાય...!
(પરેશ
પંચોલી, વલ્લભ વિદ્યાનગર)
૨૨.
શું મિલન અને વિરહ, બંને
એક સિક્કાની બે બાજુઓ છે ?
- તમારા
અડધો અડધ સિક્કાઓ તાબડતોબ વેચી નાંખો, ભ’ઇ !
(ઝુલ્ફિકાર
રામપુરવાલા, મુંબ્રા)
૨૩. દર
મહિને ‘દારૂ નિષેધ દિન’ ઉજવવામાં
આવે તો ?
- ‘થૅન્ક
ગૉડ’ કે, ‘ઍનકાઉન્ટર’માં આવું પૂછનારનું સરનામું છપાતું નથી !
(રવીન્દ્ર
નાણાવટી, રાજકોટ)
૨૪.
શાહજહાને મુમતાઝ માટે તાજમહલ બનાવ્યો, તમે
પત્ની માટે શું બંધાવશો ?
- રિવરફ્રન્ટ
ઉપર એક બાંકડો.
(મંજુલા
પરમાર, ગાંધીનગર)
૨૫.
સ્ત્રીઓ માટે આપ શું કરી શકો છો ?
- એ હું
કરી ચૂક્યો છું.
(શૈલા
માધવ પટેલ, અમદાવાદ)
No comments:
Post a Comment