* કેજરીવાલ...?
- લાંબુ નહિ ટકે! અત્યાર સુધી તો એ માણસ ચોખ્ખો લાગે છે, પણ એની ગૅન્ગના ફોલ્ડરો ભાજપ કે કોંગ્રેસના માણસોથી સહેજ પણ જુદા નથી લાગતા!
(ચેતન કે. મીરાણી, જૂનાગઢ)
* કેળવણી અને અભ્યાસ વચ્ચે કેટલો તફાવત?
- ગુરૂ અને માસ્તર જેટલો.
(ઈશ્વર બી. પરમાર, અમદાવાદ)
* દેશ આખો સટોડીયો થઇ ગયો છે. કઇ વાતમાં સટ્ટો રમાતો નથી?
- તમારી વાત ખોટી છે. બોલો, લાગી હજાર-હજારની?
(મહેન્દ્ર જે. ગાંધી, સુરેન્દ્રનગર)
* ડિમ્પલ સાથે એકતરફા પ્રેમથી તમને ઠેસ નથી પહોંચતી?
- બહુ પહોંચે છે. હું એને ઘણી વાર સમજાવું છું કે, તું રહેવા દે... આપણું પતે એવું નથી.... એટલે એને ઠેસ પહોંચે છે.
(અફરોઝબેન મીરાણી, મહુવા)
* કેજરીવાલ પોતાના ઝાડુથી દિલ્હીની સફાઇ કરી શકશે?
- શીલા દિલ્હી આખું સાફ કરતી ગઇ છે... હવે જે કાંઇ બચ્યું હશે, એ કેજરીના માણસો સાફ કરી નાંખશે.
(રમણિક જોટાણીયા, રાજકોટ)
* તમને હમણાં એક પાર્ટીમાં જોયા. સરસ પર્સનાલિટી છે, છતાં ય તમારા લેખોમાં તમારી જાતને કેમ ઉતારી પાડો છો?
- હું મારી કે મારી પત્નીની ફિલમ ઉતારૂં, એમાં લોકો રાજી થાય છે. એમની ઉતારૂ કે મારા વખાણ કરૂં, તો કોને ગમે ? મારી કૉલમો બંધ કરવી પડે!
(ઝરણા સી. મેહતા, અમદાવાદ)
* આપ લૅડીઝના સવાલોના જવાબો વહેલા આપો છો...!
- ઓહ... સૉરી, મને ખબર નહિ કે તમે-----
(હસમુખ રાજાણી, રાજકોટ)
* અમારા હળવદના બ્રાહ્મણો ખાવામાં વિશ્વવિખ્યાત છે. આપ કેટલા લાડુ ખાઇ શકો?
- ઘેર એક.
(દીપક એ. રાવલ, હળવદ)
* સંગીતકારોની જોડી હોય છે, એમ હાસ્યલેખકોની જોડી કેમ નથી હોતી?
- હાસ્યલેખકો, હોય એને ય તોડવામાં વ્યસ્ત છે, જોડવામાં નહિ!
(અલીઅસગર સાઇગર, માંડવી-કચ્છ)
* સાંભળ્યું છે કે, તમે મૅન્ટલ હૉસ્પિટલમાં ગાંડાઓને સાજા કરવા 'માનદ' સેવાઓ પણ આપો છો!
- તમને હવે કેમ છે?
(કિશોર વ્યાસ, ઘોઘા)
* તમારા જામનગરના વિશ્વવિખ્યાત સ્મશાનને તમારૂં નામ આપીને વધુ વિખ્યાત કરવાનું ત્યાંની પ્રજા વિચારે છે...!
- (કાનમાં સાંભળજો).... કોઇ પ્રસૂતિગૃહનું નામ જોડાય એવું નથી?
* આસા(રામ)ની મદદે કળીયુગના લાલ(કૃષ્ણ) કેમ નથી આવતા?
- હાલમાં આ કૃષ્ણ પોતે ગોથા ખાય છે કે હું લાલ ક્યારે થઇશ!
(અંકિત જી. ત્રિવેદી, મોડાસા)
* તમે અને ડિમ્પલ હોટેલમાં ડિનર લેતા હો ને અચાનક તમારા વાઇફ આવી જાય તો શું થાય?
- એટલો ટાઇમ મળે તો શું અમે ''જમવામાં'' વેડફીએ?
(ફેસલ છીપા રેશમવાલા, અમદાવાદ)
* દરેક 'ઍનકાઉન્ટર'માં શ્રેષ્ઠ સવાલને ઇનામ આપવાનું રાખો તો હાલમાં પૂછાય છે, એના કરતા વધુ મોટી સંખ્યામાં સવાલો મળે!
- આજના 'ઍનકાઉન્ટર'નું તમારૂં ઇનામ તમે ગુમાવ્યું.
(કુત્બુદ્દીન ગુલામઅલીવાલા, દાહોદ)
* 'તારી ભલી થાય, ચમના' કહીને આશીર્વાદ આપો છો, પણ મારા દોસ્ત 'ચમન'નું ક્યારે ગોઠવાશે?
- આવી ઠંડીમાં એને 'પંખો ચાલુ કરવાનું' કોણે કીધું'તું...???
(મથુર ચુનીલાલ વાઘેલા, રાજકોટ)
* માર્ચમાં તમે અમેરિકા જઇ રહ્યા છો, પછી 'ઍનકાઉન્ટર' કોણ સંભાળશે?
- નરેન્દ્ર મોદી માને તો કહીશું એમને!
(ઓ.વી. સાગર, રાજકોટ)
* સગાઇની આગળ પાછળ વાગ્દત્તાનો હાથ પકડવો અને હવે આ ઉંમરે પત્નીનો હાથ પકડવામાં શું ફેર હોય?
- પહેલામાં પકડવાની હોય... બીજામાં ખસેડવાની હોય!
(લલિત ઓઝા, જૂનાગઢ)
* ચમનાને તમે આટલા બધા આશીર્વાદો આપો છો, 'તારી ભલી થાય ચમના...' પણ એકે ય ચમનાને તમારા આશીર્વાદ ફળ્યા ખરા?
- હા. એક ચમનાનો ફોન આવ્યો હતો... એને છુટાછેડા મળી ગયા... ખૂબ આભાર માનતો'તો!
(રીવા-ઈવા કનખરા, જામનગર)
* સાધુઓએ તો બ્રહ્મચર્ય પાળવાનું હોય, છતાં એ લોકો આવું કેમ કરે છે?
- પૂરી જવાબદારીપૂર્વક કહું છું. સાધુઓનો વાંક નથી. પોતાની પત્ની કે માં-બહેનોને પરપુરૂષો પાસે જવા દેતા કહેવાતા હરિભક્તો અને ખુદ આવી સ્ત્રીઓનો વાંક છે.
(અસગરઅલી નોમાન અલી, બારીયા)
* નરેન્દ્ર મોદી અને ડૉ. મનમોહનસિંઘ વચ્ચે શું તફાવત છે?
- એ તો મોદી સાહેબ પાઘડી પહેરે તો ખબર પડે!
(હનીફ વૈયલ નૉડે, લુડીયા-કચ્છ)
* તમને કોઇ મહિલા બ્લૅકમૅઇલ કરીને મોટી રકમ આપવાની ધમકી આપે તો શું કરો?
- પહેલા તો જે મુદ્દા ઉપર બ્લૅકમૅઇલ કરતી હોય, એ મુદ્દો ઠાઠથી પહેલીવાર ભોગવી લઉં... ને પછી એને સીધી મારી વાઇફ પાસે મોકલી આપું... બ્લૅકમૅઇલ જેટલા પૈસા અમને એ સામેથી આપીને જતી રહેશે!
(ફિરોઝ ડી. ગાર્ડ, અમદાવાદ)
* તમને જીવનમાં કોઇ ઍવૉર્ડ મળ્યો છે ખરો?
- રોજ મળે છે. મારા પુત્ર-પુત્રી કહેતા હોય છે, ''યૂ આર ધ બેસ્ટ ફાધર ઇન ધ વર્લ્ડ.'' (આનું આ જ વાક્ય સાલી વાઇફ પણ કહી દે છે!.... કોઇ પંખો ચાલુ કરો!)
(અ.રહેમાન બોગલ, ગોધરા)
* વર્ષો પહેલા આપના પુસ્તક 'પેટ છુટી વાત'માં આપની પસંદગીની દસ-સ્ત્રીઓમાં સોનિયા ગાંધીને તમે પ્રથમ નંબર આપ્યો છે. હાલમાં પરદા પાછળ રહી મૌન પૂતળાંને નચાવતા સોનિયાજી હજી આપની પ્રથમ પસંદગીમાં આવે છે?
- હા-હા... હવે યાદ આવ્યું...! એ જમાનામાં હું દારૂ પીતો હતો!
(રાજેશ જોષી, રાજકોટ)
* સુંદર સ્ત્રીઓ હંમેશા ઢંગધડા વગરના પતિ કેમ પસંદ કરે છે?
- હવે એમાં આપણાથી કોઇ ફેરફાર ન થાય... સાલો બધે પેલીનો હાથ પકડીને જ ઊભો હોય છે!
(ધ્રૂવ પંચાસરા, વિરમગામ)
No comments:
Post a Comment